Bible in duytsche (Delftse bijbel 1477)

§ Capit .xi

1

HIer en binnen so rees murmureringhe onder dat volc: iegen den here als of si rouwe hadden gehat om die pine. Doe die here dat hoerde soe wort hi gram: ende des heren vuer wort in hem ontsteken. ende verbrande dat achterste deel vanden ghetelden.

2

Ende doe dat volc tot moysen riep: so bat hi den here. ende dat vuer versanc.

3

Ende hi hete den naem van dier stat ontstekinge: om dat daer des heren vuer ieghen hem ontsteken was.

4

Ende dat ghemeen gilde volc dat mit hem ghecomen was. wort ontsteken mit begheerte van vleysche ende sat ende weende. ende mit hem waren die kinder van israhel geuoecht: ende si seiden. Wie sal ons vleysch teten geuen?

5

Wi ghedenken der wisschen die wi in egipten te dancke aten: ons comen in die ghedachten die cucumeren. ende die cabuyscolen. ende die parreyden. ende yuyn. ende dat loec.

6

Onze ziel is droech: ende onse oghen en sien anders niet sonder manna.

7

Want manna dat was als coriander saet van verwe als bdellium.

8

Ende dat volc ghinc om. ende gaderdent. ende bract mit enen

[p. *189]

steen of wreeft in enen mortier: ende biect in een pot ende maecter brodekens of dat smaecte als gheolijt broot

9

Ende als des nachtes die douwe bouen den tenten neder quam: so quam daer oec mede manna neder.

10

Ende moyses hoerde dat volc wenende bi haren familien: elken voer die dore van sijnre tenten. Ende des heren toren wort seer gram: mer het dochte moyses een ondrachtelijc dinc:

11

ende hi seide totten here. Waer bi hebste dinen knecht gequelt? Waer om en vinde ic ghene gracie voer di? Ende waer bij hebstu den last van alle desen volc op mi gheleit?

12

Heb ic di alle dese menichte ghewonnen of ontfaen inden buyc. dattu mi segges. draechtse in dinen scoot also een voetster pleecht een kindekijn te draghen: ende draechtse int lant daer ic haren vaderen of ghesworen heb?

13

Waen sal mi dat vleysch comen: dat ic gheuen sal aldus groter menichten? si wenen voer mi ende segghen: gheeft ons vleysch dat wij eten moghen.

14

Ic en mach alleen al dit volc niet ghedogen: want het is mi te zwaer

15

Ende dunct di anders niet: soe bid ic di dattu mi dodes. ende ic sal vinden moghen gracie in dinen oghen: dat ic aldus vele quaets niet en ghedoghe.

16

Ende die here seide tot moysen. Vergadert mi tseuentich mannen vanden outsten van israhel. dien du wetes dat die outste vanden volke sijn ende meesters. ende du sulstese leiden ter doren vanden tabernakel der beloften. ende du sulstese daer mitti doen staen

17

ende ic sal neder comen ende spreken totti: ende ic sal nemen van dinen gheeste ende gheuent hem: om dat si mitti sullen gedoghen den last vanden volke: ende dattu alleen niet en wortste belast.

18

Du sulste oec totten volke segghen. Wordet gheheilicht. Morgen suldi vleysch eten. Want ic heb v ghehoert segghende. Wie sal ons spisen van vleysche geuen? Ons was in egipten wel. Daer om sal v die here gheuen vleysch dat ghi eten sult.

19

niet enen dach noch twe noch vijf noch tien. noch twintich.

20

mer totter maent van daghen: tot dattet doer uwen nosegaten comen sal wt ende worden verkeert in walghinghe. om dat ghi den here hebt versteken die in midden v luden is: ende hebt gheweent voer hem segghende. Waer om sijn wij wt egipten ghegaen dat wi vergaen souden in die wildernisse?

21

Ende moyses seide totten here. Des volkes is seshondertdusent mannen te voet. Ende du segste ic sal hem gheuen spise van vleysch een gheheel maent?

22

Salmen slaen een menichte van ossen ende van scapen. datter ghenoech sal moghen sijn te spise: of sullen alle die visschen vander zee in een worden vergadert dat sijse saden moghen?

23

Ende die here antwoerde hem. Is des heren hant onmachtich? Te hant sulstu mi sien: of mijn redene sal worden voldaen mitten werke.

24

Dus quam moyses ende vertelde den volc des heren woerden. ende vergaderde die tseuentich mannen vanden ouders van israhel: ende die dede hi staen omtrent den tabernakel

25

Ende die here quam neder mitter wolken ende sprac tot hem:

[p. *190]

ende nam vanden gheeste die in moyses was: ende gaffen den tseuentich mannen. Ende doe die gheest in hem gherust was so propheteerden si: ende voert meer en hielden si niet op.

26

Mer inden tenten waren twe mannen ghebleuen. van den welken die een hiet heldad. ende die ander medad: ende op hem soe ruste oec die gheeste: want si waren oec bescreuen: mer si en waren niet wtghegaen totten tabernakel. Ende doen si propheteerden inden tenten:

27

soe liep een kint ende boetscaptet moysen ende seide. Heldad ende medad propheteren inden tenten

28

Ende te hant seide iosue nuns sone moyses dienre. die wt velen ghecoren was Moyses here mijn. verbietet hem

29

Ende moyses seide: wat benijtstuut om minen wille? Wie sal gheuen dat al dat volc prophetere: ende dat hem die here sinen gheest gheue?

30

Ende moyses ende die meeste van gheboerte van israhel keerden weder inden tenten.

31

Ende een wint quam wt vanden here ende begreep die patrisen ouer die zee ende brachtse ende deedse nedervallen inden ghetelden. al om ende om van allen siden vanden ghetelden also verre weghes alsmen in enen dach mach gaen: ende si vlogen in die luchte twee cubitus hoech bouen der aerden.

32

Ende dat volc stont op alle dien dach ende alle die nacht ende des anderen daghes. ende vergaderde een menichte van desen patrisen ende sij ghereiden tien choros. ende droechdense al om ende om den tenten.

33

Noch was dat vleysch binnen haren tanden. ende die spise en hadde hem niet ghebroken: ende siet des heren toerne wort verwect in den volke. ende hi sloecht mit harder groter plaghen.

34

Ende die stat wort geheten grauen der begheerten: want daer grouen si dat volc dat vleysch begeert hadde. Ende si tiden wech vanden grauen der begheerten ende quamen in aseroth: ende bleuen daer