Bible in duytsche (Delftse bijbel 1477)

§ Capittel. .x

1

ENde die here sprac tot moysen ende seide

2

Make di twe silueren gesmede trompen: daer du die menichte mede sulste vergaderen alsmen die tenten porren sal.

3

Ende alstu sulste trompen mitter trompen: so sal al die scare tot di vergaderen ter doren vanden tabernakel der beloften.

4

Ist dattu eenwerf trompes: so sullen totti comen die princen ende die hoofden der menichten van israhel.

5

Mer als dit gheluyt grouer ende langher trompet: so sullen die eerste die ter oestziden sijn haer tenten roeren.

6

Ende inden anderen gheluyt ende in alsodanich gheluyt vander trompen sullen si haer tenten heffen die te zwtwert legghen: ende na deser manier sullen die ander doen in dat voert tiden als die trompen luden.

7

Mer alsmen dat volc vergaderen sal. so salt een simpel gheluyt wesen mit trompen: ende sij en sullen niet grofliken luden.

8

Aarons des papen sonen sullen trompen mitten trompen: ende dit sal ewelic wettich wesen in uwen gheslacahten.

9

Ende ist dat ghi gaen sult ten stride wt uwen lande. ieghens uwe vianden die iegen v oerloghen. so suldi mit trompen blasen: ende het sal een ghedencken wesen voerden here uwen god: dat ghij sult worden beschermt van uwer vianden handen.

10

Of wanneer gi sult hebben werscap ende heilighe daghen ende kalenden. so suldi blasen mit trompen op v holocauste ende op uwe danckelike victimen: om dattet v sal sijn een gedencken des heren uwes gods. Ic bin die here v god.

11

Int ander iaer ende in die ander maent. opten twintichsten dach vander maent. so wort die wolke gheheuen van die tabernakel der beloften.

12

Ende die kinder van israhel tiden voert bi haren scaren vander wildernissen van synai: ende die wolc rustede inder wildernissen pharan.

13

Ende na des heren ghebot by moyses hant so roerden si eerst haer tenten.

14

Iudas kinder bi haren scaren: welker prince was naason aminadaps soen.

15

In ysachars kinderen gheslachte was prince nathanael suars sone.

16

In zabulons gheslachte was prince helyab helons soen.

17

Ende die tabernakel deedmen of: ende gersons ende merarijs kinder ghinghen wt ende droghent.

18

Ende rubens kinderen tiden voert bi haren scaren ende bi hare ordinancie: welker prince was helysur sederus sone.

19

In symeons kinderen gheslachte was prince salamihel surisaddais sone:

20

ende in gads geslachte was

[p. *188]

prince helyasaph duels sone.

21

Ende caahts kinderen tiden oec voert: ende droghen die sanctuarie. Men droech die tabernakel also langhe: tot dat si quamen totter stat daermense rechten soude.

22

Effrayms kinder roerden oec haer tenten bi haren scaren: in welker heere was prince elizama amiuds soen.

23

Ende in manasses kinder gheslachte was prince gamaliel phadassurs soen:

24

ende in benymins geslachte was prince abidan gedeons soen.

25

Ende int achterste van alden tenten so tiden dans kinder voert bi haren scaren: in welker heere prince was abiezer amisaddais soen.

26

In azers kinder geslachte was prince phagaihel ochrans soen:

27

ende in neptalims kinder gheslachte was prince ahyra henans soen

28

Dit sijn der kinder van israhels tenten. ende haer voert tidinghen bi haren scaren doen si voert toghen.

29

Ende moyses seide tot obab rahuels soen van madian sinen swagher. Wij liden ter statwert die ons die here gheuen sal: coemt mit ons ende wi willen di wel doen: want die here heeft israhel guede dingen gheloeft.

30

Ende hi antwoerde. Ic en sal niet mitti gaen: mer ic sal wederkeren in mijn lant daer ic in gheboren bin.

31

Ende moyses seide: en wilt ons niet laten. Want du wetes in wat steden inder wildernissen wij tenten slaen sullen: ende du sulste onse leitsman wesen.

32

Ende als du mit ons gecomen sijs: so wat dat alre best wesen sal vanden rijcheden die ons die here geuen sal. dat sullen wi di gheuen.

33

Dus tiden si wech van des heren berghe den wech van drien daghen: ende die arke van des heren belofte ghinc voer hem drie daghen: ende voersach die stat vanden tenten.

34

Ende des heren wolke was bouen hem als si ghinghen .

35

Ende doemen die arke ophief. soe seide moyses. Stant op here ende dine vianden moeten worden ghesceiden: ende die di haten moeten vlien van dijn aensichte.

36

Ende doemen die arke nedersettede. so seide hi Here keer weder ter menichte van israhels heere