Bible in duytsche (Delftse bijbel 1477)

§ Ca .viij.

1

ENde die here sprac tot moysen ende seide.

2

Spreect tot aaron: ende segt hem. Als du die seuen lichtuaten setten suls: soe salmen die candelaer setten in die zuytzide. Hier om so gebiede dat die lichtuaten teghen dat noerden scouwen recht teghen die tafel vanden broden der proposicien: ende si sullen lichten teghens die zide die den candelaer scouwet.

3

Ende aaron dedet: ende settede die lichtuaten opten candelaer also die here moysen beuolen had

4

Want dit was dat maecsele vanden candelaer: hi was al van ghesmeden goude beide

[p. *185]

die middelste stake ende al dat wt beiden ziden vanden gardekens quam. Na den exemplaer dat die here moysen toende: also was die candelaer ghemaect.

5

Ende die here sprac tot moysen ende seide.

6

Neem die leuiten van midden den kinderen van israhel: ende du sulstese suueren in deser manieren.

7

men salse mit den water der suueringe bespreinghen: ende si sullen scheren al dat haer van haren vleysche. Ende als si haer clederen hebben ghedwoghen ende ghesuuert sullen wesen.

8

so sullen si nemen een osse vanden vee ende sijn libamente. blomen ghekneden mit olye: ende du suls enen anderen osse vanden vee nemen voer die sonde:

9

ende du suls die leuiten doen comen voer die tabernakel der beloften. ende vergaderen alle die menichte der kinder van israhel.

10

Ende als die leuiten voerden here sijn so sullen die kinder van israhel haer handen op hem legghen:

11

ende aaron sal die leuiten offeren. ter ghiften in des heren aenscouwen vanden kinderen van israhel: dat sij dienen sullen in sinen dienst.

12

Ende die leuiten sullen oec haer handen legghen opter ossen hoofden: vanden welken du den enen suls doden voer die sonde. ende den anderen in des heren holocaust: om dattu bidden suls voer hem.

13

Ende du suls die leuiten setten in aarons ende sijnre sonen aenscouwen. ende als sij gheoffert sijn so sustuse consacreren den here:

14

ende du sustese versceiden van midden der kinder van israhel dat sij mijn sijn:

15

ende daer na sullen si gaen in die tabernakel der beloften. dat si mi dienen sullen. Dus sulstu suueren ende consacreren in des heren offerhande:

16

want sij sijn mi ghegheuen in ghiften vanden kinderen van israhel. Voer die eerstgheboren die ontdoen alle vroulicheit in israhel so heb icse ontfaen.

17

Want alle die eerstgeboren der kinder van israhel sijn mijn: beide van menschen ende van beesten Van dien dage dat ic sloech alle die eerstgheboren van egipten . soe heb icse mi gheheilicht:

18

ende ic heb die leuiten ghenomen voer alle die eerstgheboren der kinder van israhel.

19

ende ic hebse in giften ghegeuen aaron ende sinen sonen van midden den volc. dat sij mi dienen sullen in die tabernakel der beloften voer die kinder van israhel: ende dat sij voer hem bidden dat inden volke gene plaghe en worde. worden si so coen dat sij mijnre sanctuarie toeghinghen

20

Ende moyses ende aaron ende alle die menichte der kinder van israhel deden op die leuiten dattie here moysen beual:

21

ende si worden ghesuuert ende dwoghen haer clederen

22

Ende aaron verhiefse in des heren aenscouwen ende bad voer hem: dat si ghesuuert souden moghen gaen in die tabernakel der beloften om haer officien te doen voer aaron ende sijn sonen. Also die here moysen beual vanden leuiten: also deedmen.

23

Ende die here sprac tot moysen ende seide.

24

Dit is der leuiten wet. Van vijf ende twintich iaren ende daer bouen: sullen si ingaen in die tabernakel der beloften om mi te dienen.

25

Ende als si dat vijftichste iaer van haerre outheit hebben leden so sullen sij ophouden

[p. *186]

te dienen:

26

ende sij sullen haere broeder dienres wesen in die tabernakel der beloften. ende si sullen hueden dat hem beuolen sal worden: mer si en sullen dat werck niet doen. Dus sulstu die leuiten ordineren in haerre hueden