Bible in duytsche (Delftse bijbel 1477)

§ Ca .vi.

1

DIe here sprac tot moysen ende seide.

2

Spreect totten kinderen van israhel: ende du suls tot hem segghen. Een man of een wijf als si een belofte hebben ghedaen. om dat si sullen worden gheheilicht. ende sij hem willen den here consacreren:

3

so sullen si deruen van wijn ende van dien alle dat droncken maken mach. Si en sullen niet drincken edic van wijn. ende van alrehande ander dranck noch niet datmen wt druuen perst: noch si en sullen niet eten versche druuen noch droghe:

4

binnen allen dien daghen dat si van beloften den here worden gheconsacreert. Soe wat dat vanden wijngaerde wesen mach vander gheperster druuen totter wijnbeyen steenkens toe en sullen si niet eten.

5

Binnen alle dier tijt dat hi versceiden is soe en sal gheen scaermes op sijn hooft comen: voer dat die dach voldaen wort dat hi den here wort gheconsacreert. Hi sal heilich wesen ende dat haer sijns hoefts sal wassende wesen.

6

Binnen alle dier tijt sijnre consecracien: so en sal hi te genen doden ingaen

7

noch oec worden besmet van sijns vaders ende van sijnre moeders ende sijns brueders ende susters lijck want sijns gods consecracie is op sijn hooft.

8

Alle die daghe sijnre verscheiding sal hi heilich wesen den here.

9

Mer ist dat yemant haestelic voer hem sterft. hi sal int hooft sijnre consciencien te hants worden besmit: ende dat sal hij te hants scheren inden daghe sijnre suueringe: ende echter opten seuenden dach.

10

Ende inden achsten dach sal hi offeren twe tortelen of twe duuen ionghen den paep inden inganc vanden tabernakel der beloften der oercondscap.

11

ende die paep sal die een doden voer die sonde. ende die ander in holocauste. ende hi sal voer hem bidden om dat hi ghesondicht heeft op enen doden: ende in dien daghe sal hi sijn hooft heilighen.

12

ende consacreren den here die dagen sijnre ofscheidinghe. ende offeren een eeniarich lam voer die sonde: also nochtan dat die eerste daghen te niet bliuen: want sijn heilicheit wort besmit.

13

Dit is die wet vander consecracien. Als die dagen sullen worden voldaen. dien hi van beloften beloeft hadde. so sallen die pape brengen ter doren vanden tabernakel der beloften:

14

ende hi sal den here offeren sijn offerhande. ende een eeniarich onbesmit lam in holocauste. ende een eeniarich onbesmit scaep voer die sonde. ende enen onbesmetten ramme in eenre hostien van paeyselicheden:

15

ende enen korf derueu broden die besleghen sijn met olye. ende broden ghebacken sonder hef deach gesaluet mit olye ende elke versche offerhande:

16

ende

[p. *181]

die paep salse offeren voer den here: ende hi salt doen beide voer die sonde ende in holocauste.

17

Mer den ram sal hi offeren in hostie van paeyselichede den here: ende offeren mede den corue mitten deruen broden ende die libamenten diemen sculdich is van castumen.

18

Dan salmen desen nazareus sceren. voer die dore vanden tabernakel der beloften dat haer van sijnre consecracien: ende die paep sal sijn haer nemen ende leggent opt vuer dat onder die sacrificie van danckelicheden gesteken is:

19

ende die paep sal nemen die gesoden scouder vanden ram. ende vten corue een broot sonder hefdeach ende enen breden pannecoeck. ende hi salt leueren in des nazareus handen na dien dat sijn hooft ghescoren sal wesen:

20

ende hij salt weder van hem ontfaen ende heffent op voerden here. ende geheilicht sullen si des papen wesen: gelijc die borst die gheboden is te versceiden. Ende hier na sal dese nazareus wijn drincken

21

Dit is eens nazareus wet als hij sijn offerhande heeft beloeft den here in tiden sijnre consecracien: dien wtgenomen dien sijn hant vinden sal. Na dat hijt met herten beloeft hadde: also sal hij doen ter volmaectheit sijnre heilighinghe.

22

Ende die here sprac tot moysen ende siede.

23

Segt aaron ende sijn sonen. Dus suldi die kinder van israhel ghebenedien: ende sult hem segghen.

24

Die here moet di gebenedien: ende di behoeden

25

Die here moet di sijn aensicht tonen ende dijns ontfermen.

26

Die here moet zijn aensicht wtkeren: ende hi moet di vrede gheuen

27

Si sullen minen naem anropen op die kinder van israhel: ende ic sal hem ghebenedien