Bible in duytsche (Delftse bijbel 1477)

§ Capittel .v.

1

ENde die here sprac tot moysen ende seide.

2

Beuele den kinderen van israhel: dat si vten tenten doen gaen elken lazarus ende die van sade vloeyt ende die besmit is van enen dode.

3

Beide man: ende wijf doet gaen buten den tenten: dat sise niet en besmitten als si mit v wonen.

4

Ende die kinder van israhel deden also: ende dreuense buten den tenten also die here moysen seide.

5

Ende die here sprac tot moysen ende seide.

6

Spreect totten kinderen van israhel. Een man of een wijf als si ghedaen hebben van alle den sonden die den mensche plegen te ghenaken. ende si bi rokeloesheden des heren ghebot hebben gebroken ende misdaen

7

so sullen si haer sonden belien: ende alsulken hooft weder gheuen ende dat vijftendeel daer bouen den genen daer si ieghen misdaen hebben.

[p. *179]

8

Mer en is niemant die dat ontfaet soe sullen sijt den here gheuen ende het sal des papen wesen: wtghenomen enen ram die men offert voer die suueringe dattet si ene ontfanclike offerhande

9

Alle die primicien die die kinder van israhel offeren behoren den pape toe:

10

ende soe wat dat elc offert in die sanctuarie ende datmen in des papen handen leuert dat sal sijn wesen.

11

Ende die here sprac tot moysen ende seide.

12

Spreect totten kinderen van israhel ende du suls tot hem segghen. Een man wies wijf ghedoelt heeft: ende haren man veronwaert

13

ende mit enen anderen man geleghen heet. ende haer man dies niet gewaer worden en mach dat ouerspel dat heymelic is. so datmen niet wrogen en mach mit oerconde. om datmense niet gheuonden en heeft int onreyn werck:

14

ist dat die gheest van wantrouwelheden den man porret ieghens sijn wijf die besmet is of diemen aenvaert mit valscher waninghen.

15

hi salse brenghen totten paep: ende hi sal voer haer offeren een offerhande een thiendendeel van satum ghersten meels. Ende hij en sal daer ghene olye op ghieten noch wieroec op legghen. want die sacrificie is wantrouwelhede: ende die offerhande is ondersokende ouerspel.

16

Dus salse die paepe offeren ende settense voerden here:

17

ende hi sal heilich water nemen in een aerden vat: ende een luttel aerden van die vloer des tabernakels sal hi werpen int water.

18

Ende als dat wijf in des heren aenscouwen staet soe sal hi haer hooft ondecken: ende hi sal op haer handen setten die sacrificie des ghedenckenis ende die offerhande der wantrouwelheit Mer hi sal houden dat bitter water. daer hi die vloke inghedaen heeft:

19

ende hi salse besweren ende segghen. En heeft gheen vreemt man mit di gheleghen. ende en bistu niet besmet latende dijn mans bedde. so en sullen di dese bittere wateren niet scaden daer ic die vloec heb ingedaen.

20

Mer bistu ghekeert van dinen man bistu besmet. ende hebstu met enen anderen man ghelegen:

21

so sulstu wesen onder desen vloken. God moet di geuen in een malediccie ende in een exempel van allen menschen in sijn volc. Hi moet dijn dyen doen rotten: ende dijn buyc moet heffen ende bersten

22

Die vermaledide wateren moeten in dinen buyc gaen: ende dijn buyc moet heffen ende dijn dyen rotten Ende dat wijf sal antwoerden. Amen amen

23

Ende die paep sal dese vloken scriuen in enen beief: ende hi salse ofdoen mitten water daer hi die vloke inghedaen heeft:

24

ende salt haer drincken gheuen.

25

Ende als sijt wtgedronken heeft. so sal die paep van haer hant nemen die sacrificie der wantrouwelheit ende hi salse opheffen voer den here ende hi salt legghen opten outaer:

26

ia aldus dat hi eerst daer of neme een hantuol vander sacrificien diemen offert ende verbrant opten outaer: ende dan sal hi den wiue gheuen te drincken die bitter wateren.

27

Ende als sijt ghedroncken heeft. is sij besmit. ende is si des ouerspels sculdich haren man veronwaerdende: so sullen die wateren der vermaledijtheit doer haer

[p. *180]

gaen. ende haer buyc sal zwellen ende haer dye rotten: ende dat wijf sal wesen in malediccie ende in een exempel alle den volck

28

Mer en is si niet besmit so en salt haer niet deren: ende si sal kinder draghen.

29

Dit is die wet van wantrouwelheden. Ist dat haer een wijf keert van haren man ende is sij besmit:

30

ende haer man wort geporret mitten gheest van wantrouwelheden ende brenctse in des heren aenscouwen. ende haer die pape duet na al dat hier bescreuen is.

31

die man sal sonder misdaet wesen: ende si sal haer quaetheit ontfaen