Bible in duytsche (Delftse bijbel 1477)

§ Ca .iiij

1

ENde die here sprac tot moysen ende aaron ende seide.

2

Neem van midden der leuiten die somme van caaths kinderen bi haren husen ende familien

3

vanden dertichsten iaer ende daer bouen totten vijftichsten iaer: haerre alre die ingaen. te staen ende te dienen in die tabernakel der beloften.

4

Dit is zede van caaths sonen. Alsmen die tenten porren sal: so sal aaron ende sijn sonen gaen in die tabernakel der beloften ende in sanctum sanctorum:

5

ende si sullen die gordine of doen die voer die dore hanghet. ende si sullen daer in winden die arke der oercondscap.

6

ende si sullense echter ouerdecken mit enen decsel van blaeuwen vellen. ende si sullen daer ouer hangen enen mantel al van blaeu: ende doen die grendelen daer in.

7

Ende si sullen oec die tafel der voerlegghinghe winden in enen blaeuwen mantel: ende si sullen daer mede in legghen wijroecuate ende die moertiersteen ende die gedecte nappen daermen die versche offerhanden mede ghiet. Ende die broden sullen daer altoes op legghen.

8

Ende daer bouen sullen si legghen enen roden mantel ende daer bouen sullen si echter spreiden een blaeu decsel van vellen: ende si sullen daer die grendelen in steken

9

Ende si sullen nemen enen blaeuwen mantel daer si den candelaer mede sullen decken mit sinen lichtuaten ende schaerkens. ende mit sinen bluschuaten. ende mit alle den vaten van olye die nootorftich sijn om die lichtuaten mede te houden:

10

ende bouen al sullen sij legghen een ouerdecsel van blaeuwen vellen. ende sij sullen die grendelen daer in steken.

11

Si sullen oec den gulden outaer winden in een blaeu cleet: ende si sullen

[p. *177]

daer bouen spreiden een ouerdecsel van blaeuwen vellen: ende si sullen die grindelen daer in steken.

12

Alle die vaten daermen mede dient in die sanctuarie sullen si winden in een blaeu cleet: ende sij sullen daer ouerspreyden een ouerdecsel van blaeuwen vellen: ende si sullen die grindelen daer in steken.

13

Mer den outaer sullen sij suueren vander asschen. ende si sullen winden in een root cleet.

14

ende si sullen daer mede legghen alle die vaten diemen besicht te sinen dienste: dat is die wieroec vaten die crauwels die vorken die haken ende die vuerpannen. Ende alle die vaten vanden outaer sullen si ouerdecken mit enen ouerdecsel van blauwen vellen: ende si sullen daer die grindelen in steken.

15

Si sullen dragen alle die vaten daermen mede dient in die sanctuarie ende als aaron ende sijn sonen die sanctuarie hebben gewonden ende alle sine vaten int roeren vanden tenten: dan sullen caaths sonen daer in comen om te draghen dat bewonden is: ende si en sullen die vate vanden sanctuarie niet ghenaken dat si niet en steruen. Dit sijn caaths sonen lasten in die tabernakel der beloften.

16

ende bouen hem sal wesen eleazar aarons des papen sone: ende te sijnre sorghe behoert die olye om die lichtuaten bernende te houden ende die ghemaecte wieroec ende die sacrificie diemen altoes offert ende die olye der consecracien ende so wat dat behoert ter oefeninge vanden tabernakel: ende van allen den vaten die inder sanctuarien sijn.

17

Ende die here sprac tot moysen ende aaron ende seide

18

En wilt niet verliesen dat volc van caath van midden der leuiten:

19

mer doet hem dat sij leuen moghen: ende niet en steruen ist dat si genaken die heilige der heilighen. Aaron ende sijn sonen sullen daer in gaen: ende si sullen elken sijn werc bescicken: ende si sullen deylen wat elc dragen sal

20

Mer die ander en sullen met geenre naersticheit besien dat in die sanctuarie is voer dat si bewonden sijn: anders sullen si steruen.

21

Ende die here sprac tot moysen ende seide.

22

Neem oec die somme van gersons sonen biden husen ende familien van haren maechscappen

23

van dertich iaren out ende daer bouen tot vijftich iaren. Teltse alle die ingaen ende dienen in die tabernakel der beloften.

24

Dit is die officie van gersons familien:

25

dat si draghen die cortinen vanden tabernakel ende dat dac der beloften. dat ander ouerdecsel. ende bouen alle dat blaeu ouerdecsel: ende die tente die hangt inden inganc der tabernakel der beloften.

26

die cortinen vanden vrijthoue ende die gordine vanden inganc die voer die tabernakel is. Ende alle dat den outaer toebehoert. die coerden ende die vaten vanden dienste

27

dit sullen gersons sonen draghen als hem aaron ende sijn sonen beuelen: ende elc sal weten te wat laste hi toebehoert.

28

Dit is gersons sonen ofeninge inden tabernakel der beloften. Ende si sullen wesen onder ythamar aarons des papen soens hant.

29

Du suls oec tellen merarijs sonen biden familien ende husen haerre vaderen

30

van dertich iaren out ende daer bouen tot vijftich iaren: alle die ingaen ter officien van haren dienste

[p. *178]

ende ter ofeninge vander beloften der oercondscap.

31

Dit sijn haer lasten. Sij sullen draghen die tafelen vanden tabernakel ende sijn grindelen. die colummen ende haer voeten:

32

ende die colummen oec vanden vrijthoue al om ende om mit haren voeten ende stecken ende mitten coerden. Alle die vaten ende die huysraet sullen si mit ghetael ontfaen: ende also sullen sijt draghen.

33

Dit is die officie van merarijs sonen familie ende die dienst inden tabernakel der beloften: ende sij sullen wesen onder ythamars hant aarons des papen sone.

34

Dus telden moyses ende aaron ende die princen vander synagoghen caaths sonen bi haren maecscappen ende hare vader husen

35

van dertich iaren out ende daer bouen totten vijftichsten iaer: alle die in ghinghen ten dienste vanden tabernakel der beloften:

36

ende men vanter twe dusent seuen hondert ende vijftich.

37

Dit is dat ghetal van caaths volc: die ingaen inden tabernakel der beloften. Dese telde moyses ende aaron na des heren woert bij moyses hant

38

Ende gersons sonen waren oec getelt mit hare maechscapen ende hare vader husen

39

van dertich iaer out ende daer bouen tot den vijftichsten iaer: alle die ingaen om te dienen inden tabernakel der beloften:

40

ende men vanter twe dusent ses hondert ende dertich.

41

Dit is dat volc van gersons sonen: die moyses ende aaron telden na des heren woert.

42

Ende merarijs sonen waren oec ghetelt mit haren maechscappen ende haerre vader husen

43

van dertich iaren out ende daer bouen totten vijftichsten iaer: alle die inghingen om te voldoen die zeden vanden tabernakel der oercondscap:

44

ende men vanter drie dusent ende twee hondert.

45

Dit is dat ghetal van merarijs sonen: die moyses ende aaron telden na des heren ghebot bi moyses hant

46

Alle die vanden leuiten getelt waren. ende die moyses ende aaron ende die princen van israhel ten name telden naden maechscappen ende haere vader husen

47

van dertich iaren out ende daer bouen totten vijftichsten iaer: die inghingen ten dienste vanden tabernakel. ende om die lasten te dragen

48

waren te gader acht dusent vijf hondert ende tachtich.

49

Na des heren woert so telde moyses yghelijc na sijn officie ende sijn last: also als hem die here beuolen had