Bible in duytsche (Delftse bijbel 1477)

§ Ca iij.

1

DIt sijn moyses ende aarons geslachten in dien daghe dattie here tot moysen sprac opten berch van synai:

2

ende dit sijn aarons sonen namen. Sijn eerstgheboren was nadab: ende daer na abyu. ende eleazar. ende ythamar.

3

Dit sijn aarons sonen der papen namen die ghesaluet waren: ende welker handen gheuollet ende geconsacreert waren dat si der paepscap ghebrukich wesen souden.

4

Mer abiu ende nadab worden ghedodet doe si vreemt vuer souden offeren in des heren aenscouwen inder wildernissen van synai sonder kinderen: ende eleazar ende ythamar worden gebrukich der paepscap voer aaron haren vader.

5

Ende die here sprac tot moysen ende seide

6

Doet comen leuijs gheslacht ende doetse staen in aarons des papen aenscouwen dat si hem dienen

7

ende dat si hem wachten ende houden soe wat behoert ter ofeninghe. van al der menichte voer die tabernakel der oercondscap:

8

dat si wachten die vaten vanden tabernakel. dienende in sinen dienste.

9

Ende du suls die leuiten gheuen in ghiften aaron ende sinen sonen. ende si sijn hem ghegeuen vanden kinderen van israhel:

10

mer aaron ende sijn sonen sulstu setten op die ofeninghe vanden paepscap Een vreemde die daer toegaet om te dienen. hi sal steruen.

11

Ende die here sprac tot moysen ende seide.

12

Ic heb die leuiten ghenomen vanden kinderen van israhel voer alle die eerstegeboren die die vroulicheit ondoet inden kinderen van israhel: ende die leuiten sullen mijn sijn.

13

Want alle eerstgheboren is mijn. Van dier tijt dat ic sloech alle eerstgeboren inden lande van egipten: so heb ic mi gheheilicht soe wat dat in israhel eerst wort gheboren. Van mensche totten quicke si sijn mijn. Ic die here

14

Ende die here sprac tot moysen inder wil-

[p. *175]

dernisse van synai ende seide.

15

Telle leuijs kinderen biden husen haerre vadere ende familien: alle manne van eenre maent ende daer bouen.

16

Ende moyses telde also die here beuolen had:

17

ende men vant leuijs sonen bi haren namen: gerson. ende caath. ende merari.

18

Gersons sonen waren: lebni ende semei.

19

Caaths sonen waren: amram. ende iessaar. hebron. ende oziel.

20

Merari sonen waren: mooli. ende musi.

21

Van gerson waren twe familien. van lebnis kinderen ende semeis kinderen

22

vanden welken dat volc ghetelt is van mans maecsele van eenre maent ende daer bouen: seuen dusent ende vijf hondert.

23

Dese sullen tenten slaen achter die tabernakel ter westzide

24

onder die prince helyazaph iahels sone.

25

ende si sullen die wake hebben in die tabernakel der beloften. dat si sullen wachten die tabernakel ende sijn ouerdecsel. ende die tente diemen schiet voer die dore des daers der beloften

26

ende die gordinen vanden vrijthoue: ende die tente oec diemen hangt inden inganc vanden vrijthoue des tabernakels. Ende so wat dat der oeffeninghe vanden outaer toebehoert: die coerden des tabernakels ende alle sijn huysraet.

27

Caaths gheslachte sal hebben. van amrams geslachte maechscappen van iessaars ende hebrons: ende oziels geslachte. Dit sijn die familien van caath.

28

die ghetelt waren bij haren namen alle die van mans maecsele waren van eenre maent out ende daer bouen. acht dusent ende ses hondert: si sullen die waeck hebben vander sanctuarien.

29

ende si sullen tenten slaen ter zwtziden.

30

Ende haer prince sal wesen elizaphan oziels sone:

31

ende si sullen wachten die arke ende die tafel ende den candelaer. die outaren die vaten vander sanctuarien daermen in dient ende die gordine. ende alle al aldustanige huysraet.

32

Mer het sal prince wesen bouen den princen vanden leuyten eleazar aarons des papen sone. ende hi sal wesen bouen die wakers vander sanctuarien huede.

33

Mer van merari. sullen sijn volken van mooli ende van musi.

34

ende si waren ghetlt bi haren namen: ende alle die van mans maecsele waren van eenre maent out ende daer bouen. ses dusent ende twe hondert.

35

Haer prince was suriel abiaiels sone: dese sullen tenten slaen ter noertziden.

36

Ende onder haer hoede sullen sijn die tafelen vanden tabernakel ende die grendelen ende die colummen ende haer voeten ende al dat tot dusdaniger oeffeninghe behoert:

37

ende die colummen vanden vrijthoue al om ende om met haren voeten: ende die stecken met haren coerden.

38

Moyses ende aaron met haren kinderen: sullen tenten slaen voer die tabernakel der beloften dat is ter oestziden: ende sullen hebben die huede vander sanctuarien in midden der kinder van israhel. So wie vreemde is ende daer toe gaet. hi sal steruen.

39

Alle die leuiten die moyses ende aaron telden na des heren ghebot bi haren familien in mans gheslachte van eenre maent out ende daer bouen: waren twe ende twintich dusent.

40

Ende die here seide tot moysen. Telle die eerstgheboren vanden kinderen van israhel ende die van

[p. *176]

mans maecsele sijn ende van eenre maent out ende daer bouen: ende du suls haer ghetal hebben.

41

Ende du sulste mi die leuiten nemen: voer alle die eerstgheboren der kinder van israhel. Ic bin die here. Ende haer quicke: voer alle die eerstgheboren vanden quicke der kinder van israhel.

42

Ende moyses telde also die here beuolen had die eerstgeboren der kinder van israhel:

43

ende die mannen die waren van eenre maent ende daer bouen bi haren namen twe ende twintich dusent twee hondert ende drie ende tseuentich.

44

Ende die here sprac tot moysen ende seide.

45

Neemt die leuiten voer die eerstgheboren der kinder van israhel. ende der leuiten quicke voer hear quicke: ende die leuiten sullen mijn wesen. Ic bin die here.

46

Mer du suls nemen in prise van dien tween honderden ende drie ende tseuentich die vanden eerstgeboren der kinder van israhel comen

47

ouer dat ghetal vanden leuiten vijf cyclen van elken hoofde: ter maten vander sanctuarien. Die cycle heeft twintich helling.

48

Ende du suls dat gelt geuen aaron ende sinen sonen den prijs van dien die ouer zijn.

49

dus nam moyses dat gelt van dyen die ouer waren dien si verlost hadden vanden leuiten

50

voer die errstgheboren vanden kinderen van israhel dusent drie hondert ende vijf ende tsestich cyclen ter maten vander sanctuarie:

51

ende hi gaft aaron ende sinen sonen na dat woert dat hem die here geboden had