Bible in duytsche (Delftse bijbel 1477)

Ca .ij

1

ENde die here sprac tot moysen ende aaron ende seide.

2

Elc van den kinderen van israhel sullen haer tenten slaen bi haren scaren. teykennen ende bannieren ende bi den husen van haren maechscappen: al omtrent die tabernakel der beloften.

3

Ten oosten sal iudas sijn tenten slaen biden scaren van sinen heer: ende die prince van sinen kinderen sal wesen naason aminadaps sone:

4

ende alle die somme van sinen gheslachten die vechten mochten was vier ende tseuentich dusent ende ses hondert

5

Neuen hem slogen tenten die van ysachars gheslachte. welker prince was nathanahel suars sone:

6

ende alle sijnre vechters ghetal was vier ende vijftich dusent ende vier hondert

7

In zabulons geslachte was die prince eliab helons sone:

8

ende alle dat here van sinen gheslachte der vechters was seuen ende vijftich dusent ende vier hondert.

9

Alle die in iudas tenten getelt waren. was hondert dusent ende ses ende tachtich dusent ende vier hondert ende dese sullen eerst gaen bi haren scaren.

10

Ter zwtsieden in rubens kinder gheslachte sal prince wesen elisur sedeurs sone:

11

ende al dat heer van sinen vechters die ghtelt waren. was ses ende veertich dusent ende vijf hondert.

12

Neuen hem so sloghen tenten van symeons gheslachte. welker prince was salamihel surisaddais sone:

13

ende al dat heer van sinen vechters die getelt waren. was neghen ende vijftich dusent ende drie hondert.

14

In gads geslachte was die prince helyasaph duels sone:

15

ende alle dat heer van sinen vechters die ghetelt waren. was vijf ende veertich dusent ende ses hondert ende vijftich.

16

Ende alle die in rubens tenten ghetelt waren. was hondert dusent een ende vijftich dusent vier hondert ende vijftich: dese sullen tiden bi haren scaren in die anderde stat

17

Want die tabernakel der oercondscap. sal worden gherecht bider leuiten dienst ende bi haren scaren. Also ment rechten sal: also salment oec neder setten. Elke sullen tiden bi steden ende na haren ordinancien.

18

Ter westziden sullen effrayms kinder tenten wesen: welker prince was elisama ammiuds sone.

19

Ende alle dat heer van sinen vechters die ghetelt waren. was veertich dusent.

20

Ende met hem sloech tenten dat ghescachte van manasses kinder. welker prince was gamaliel phadassurs sone:

21

ende alle dat heer van sinen vechters die ghetelt waren. was twe ende dertich dusent ende twe hondert.

22

In dat gheslachte van benyamins kinder. was prince abidan gedeons sone:

23

ende al dat heer van sinen vechters die ghetelt waren. was vijf ende dertich dusent ende vier hondert.

24

Alle die ghetelt waren in effrayms getelden waren hondert dusent acht dusent ende

[p. *174]

hondert: dese sullen in die derde stat tiden bi haren scaren.

25

Ter noertziden sloghen tenten dans kinder: welker prince was abiezer amissaddais sone.

26

Ende al dat heer van sinen vechters die ghetelt waren. was twe ende tsestich dusent ende seuen hondert.

27

Neuen hem sloghen tenten van asers gheslachte: welker prince was phegiel ochrans sone.

28

Ende al dat heer van sinen vechters die ghetelt waren: was een ende veertich dusent ende vijf hondert

29

Van neptalims kinder gheslachte was prince ahira henans sone

30

Ende al dat heer van sinen vechters die ghetelt waren: was drie ende vijftich dusent ende vier hondert.

31

Alle die getelt waren in dans tenten. waren hondert dusent ende seuen ende vijftich dusent. ende ses hondert: ende dese sullen achterste tiden.

32

Dit is dat ghetal der kinder van israhel bi haren maechscappen ende husen ende biden scaren van haren ghedeelden here: ses hondert dusent drie dusent vijf hondert ende vijftich.

33

Mer die leuiten en waren niet ghetelt onder die kinder van israhel. Want also had die here moysen beuolen.

34

Ende die kinder van israhel deden na al dattie here beuolen hadde. Ende si slogen tenten bi haren scaren: ende tiden naden familien ende haerre vader husen