Bible in duytsche (Delftse bijbel 1477)

§ Capittel .xxvi

1

GHi en sult v gheen afgod maken noch beelde: noch caluere verheffen: noch ghi en sult binnen uwen lande gheen voerbarigen steen setten om te aenbeden. Want ic bin die here v god

2

Wacht mine vierte: ende ontsiet mine sanctuarie. Ic bin die here.

3

Ist dat gij wandert in minen gheboden ende mine gheboden wacht ende doetse:

4

so sal ic v reghen gheuen te sinen tiden. ende dat lant sal haer groeysel groeyen: ende die bomen sullen worden veruolt met appelen.

5

Ende dat dorsschen vanden ouxte sal begripen dat wijnagaertlesen ende dat wijngaertlesen sal dat saeyen ontledighen: ende ghi sult v broot eten in satheden: ende sonder sorge sult gij wonen in uwen lande.

6

Ic sal paeys geuen binnen alle uwe terminen: ende ghi sult slapen: ende niemant en sal wesen die v veruaren sal. Ic sal alle die quade beesten wech doen: ende dat zwaert en sal niet liden binnen uwen terminen

7

Ghi sult uwe vianden nauolgen: ende si sullen voer v vallen.

8

Vijf van v luden sullen veriaghen hondert vreemde: ende hondert van v luden sullen veriaghen tien dusent. Ende uwe vianden sullen in uwen aenscouwen vallen mitten zwaerde.

9

Ic sal v aenscouwen ende doen wassen: ghi sult worden ghemenichfoudicht: ende ic sal mijn belofte vast maken mit uwen luden.

10

Ende ghi sult die alre ouste vanden ouden eten: ende ghi sult die oude wech werpen als v die niewe opcomen sullen.

11

Ic sal mijn tabernakel in midden v luden setten: ende mijn ziel en sal v niet verwerpen

12

Ic sal onder v wanderen. ende wesen v god:ende gij sult wesen mijn volc.

13

Ic bin die here v god. die v vten lande van egipten heb gheleyt om dat ghi hem niet dienen en soudt: ende die ghebroken heb v die banden van uwen necken om dat ghij recht gaen sout.

14

Mer ist dat ghi mi niet en hoert. ende en duet ghi alle mine gheboden niet

15

ende ist dat ghi mine wet veronwaert ende versmaet mine vonnissen so dat ghise niet en duet die van mi gheset sijn. ende volbrenct ghi mine belofte niet:

16

soe sal ic v oec dit doen Ic sal v haestlic visiteren in armoeden ende in hetten die v oghen sal verderuen: ende uwe zielen verteren.

17

Ic sal mijn aensichte ieghens v setten. ende gi sult vallen voer uwe vianden: ende ghi sult onder worden ghedaen den ghenen die v haten. Ghij sult vlien sonder yemants nauolghen.

18

Mer en wilt gi mi noch aldus niet onderdaen sijn. so sal ic toe doen te uwen correccien seuenuout om uwe sonden:

19

ende ic sal vertreden die houerdie uwer herdicheit. Ende ic sal v den hemel bouen geuen ghelijc yser: ende die aerde metalen:

20

uwen arbeit sal worden verteert sonder profijt. Die aerde en sal geen groeysel voertbrenghen: noch die bomen en

[p. *168]

sullen gheen appelen gheuen.

21

Ist dat ghij teghen mij wandert. ende en wildi mi niet horen: so sal ic uwe plaghen toe doen seuenuoudich om uwe sonden.

22

Ende ic sal onder v wtsenden die beesten vanden velde die v ende uwe quicke verteren sullen: ende si sullent alte cleyn ghetal maken: ende uwe weghen sullen woest worden.

23

Mer en wildi oec dus ghene dissipline ontfaen ende wandert ghi wederkeert ieghen mi:

24

soe sal ic oec teghen v incomen ende ic sal v seuenwerf slaen om uwe sonden:

25

ende ic sal op v brengen dat zwaert den wreker mijnre beloften. Als ghij gheuloghen sult wesen inden poirten. soe sal ic die sterfte in midden v luden senden: ende gij sult worden gheleuert in uwer vianden handen

26

als ic te broken sal hebben den stoc uwes broots. also dat tien wiuen sullen backen haer broot in enen ouen. ende si sullent wedergheuen mit ghewichte: ende ghi sult eten ende niet worden ghesadet.

27

Ende ist dat gi mi oec niet hier bi en hoert. mer wandert ghi ieghen mi:

28

soe sal ic oec incomen ieghens v. in toernighe teghenheit: ende ic sal v castien mit seuen plaghen om uwe sonden:

29

also dat ghi eten sult uwer sonen. ende uwer dochteren vlyesch.

30

Ic sal uwe hoecheden destrueren: ende uwe afgoden breken. Ghi sult vallen onder die valle van uwen afgoden. ende mijn ziel sal v veronwaerden:

31

also seer dat ic v poerten woest maken sal. ende ic sal uwe sanctuarie wilt maken. ende ic en sal voertmeer niet ontfaen den alten sueten roec.

32

ic sal oec v lant verderuen: ende uwe vianden sullen daer op verwonderen als si daer in wonen sullen

33

Mer v luden sal ic stroyen inden heydenen. ende ic sal achter v dat zwaert vter sceyden trecken: ende uwe lant sal wesen woest: ende uwe steden terneder gheworpen.

34

Dan sal den lande ghenoghen sine vierten alle die daghen sijnre woestheden: als ghi sult wesen in uwer vianden lant Soe salt vieren ende het sal rusten inden vierten sijnre woestheden:

35

om dattet niet en sal hebben gherust in uwen vierten: doe ghi daer in woende.

36

Ende die van v luden bliuen sullen ic sal hem anxt geuen in haren herten. in haerre vianden lant Dat gheluyt eens loefs dat vlyeghen sal dat salse veruaren: ende also sullen si als dat zwaert vlien. Si sullen vallen sonder yemants nauolghen:

37

ende elc sal vallen op sinen brueder. als of si den striden vloghen. Niemant van v luden en sal dorren den vianden wederstaen.

38

Ghi sult veruaren onder die heiden: ende der vianden lant sal v verteren.

39

Ende ist dat enighe van desen ouerbliuen sij sullen versmelten in haer quaetheit in haerre vianden lant ende si sullen worden ghequelt om haerre vadere sonden en om die haer.

40

tot dat si haer sonden sullen belien ende tot dat si haer quaetheit sullen bedencken daer sij die ouerdaet mede hebben ghedaen ieghen mi: ende hebben wederkeert iegen mi ghewandert.

41

Hier om sal ic oec ieghen hem wanderen: ende salse brenghen in haere vianden

[p. *169]

lant: tot dat hem scamen sal haer onbesneden hert. Dan sullen si bidden voer haren quaetheden:

42

ende ic sal gedencken mijnre beloften: die ic geset hebbe mit iacob ysaac ende abraham. Ic sal oec des lants ghedencken:

43

dat hem seluen ghenogen sal in sinen vierten alst van hem ghelaten sal wesen: dat sine woestheit sal ghedoghen om haren wille Mer si sullen bidden voer haer sonden: om dat si mine vonnissen verworpen hebben ende mijn wet veronwaert.

44

Mer nochtan doe si waren inder vianden lant. soe en verwarp icse alle met allen niet: noch ic en versmadese so niet dat si al verteert waren: ende dat ic met hem mijn belofte te niet maecte. Want ic bin die here haer god:

45

ende ic sal mijnre eerster beloften ghedencken: doen icse vten lande van egipten leide inder heydenen aenscouwen om dat ic haer god wesen soude. Ic bin die here god. Dit sijn die gheboden ende vonnissen ende die wet die die here gaf tusschen hem ende den kinderen van israhel opten berch van synai: by moyses hant