Bible in duytsche (Delftse bijbel 1477)

§ Capittel .xxvij

1

ENde die here sprac tot moysen ende seide.

2

Spreect den kindren van israhel: ende du suls tot hem segghen. Een mensche die belofte ghedaen heeft ende gode sijn ziel beloeft heeft: nader ghissinghe so sal hij den prijs gheuen.

3

Ist een man van twintich iaren tot tsestighen toe so sal hi geuen vijftich cyclen siluers ter maten vander sanctuarie:

4

ist een wijf dertich cyclen.

5

Een man van vijf iaren totten twintichsten toe hi sal gheuen twintich ciclen: ende een wijf tien.

6

Van eenre maent totten vijfsten iaer salmen geuen voer een knechtken vijf cyclen: ende voer dat meysken drie.

7

Een man van tsestich iaren ende daer bouen sal gheuen vijftien cyclen: ende dat wijf tien.

8

Ende is hi een arm mensche ende en mach hi nader settinge niet geuen: so sal hi voerden paep staen: ende alsoe vele als hi scatten sal ende hi siet dat hi mach gheuen. also vele sal hi geuen

9

Soe wie een beest beloeft diemen den here offeren mach si sal heilich wesen

10

ende men en salse niet moghen wisselen. dat is. men en sal gheen beter voer dat quade gheuen: noch gheen quader voer dat guede. Ist dat hijt wisselt. so salt den here gheconsacreert wesen dat datter verwisselt. ende oec dat. daert om verwisselt is

11

Ist dat yemant beloeft een onsuuer beest diemen den here niet offeren en mach. soe salmense brenghen voerden paep:

12

ende hi sal vonnissen weder dattet guet of quaet is: ende hij sal den prijs setten.

13

Ende willen die ghene gheuen diet offert. so sal hi daer toe doen bouen die scattinghe dat vijfte deel.

14

Heeft een mensche sijn huys belouet ende gheheylicht den here: die paep salt besien weder het guet of quaet is: ende men salt vercopen naden prijs dat hijt scatten sal.

15

Ende ist datten die gene lossen wil diet beloefde so sal hi dat vijfstendeel vander scattinghe daer bouen gheuen: ende hij sal dat huus hebben.

16

Ende heeft hij ghelouet enen acker van sijnre possessien

[p. *170]

ende den here gheheylicht: so salmen den prijs scatten nader maten vanden sade. Saeytmen dat lant mit dertich mudde ghersten: soe salment vercopen om vijftich cyclen siluers.

17

Ist dat hij den acker belouet heeft te hant van dien iaer dat iubileus begint: also vele als hi waerdich wesen mach. soe salmen scatten

18

Ende ist enich grote tijt. na also vele sal die paep dat ghelt scatten. na dat ghetal vanden iaren die ouer sullen sijn tot iubileum: ende men salt oftrecken vanden prise.

19

Mer wilde hij den acker lossen dien beloefde. soe sal hi daer dat vijftendeel toe doen vanden ghescatten ghelde: ende hij sallen besitten.

20

Ende en wilde hi des niet lossen. ende men yemant anders vercoept. voert so en sal hien niet lossen mogen die ghene dien beloefde:

21

want als die dach van iubileo comen sal so sal hi den here gheheilicht wesen: ende die consacreerde possessie behoert ten papen rechte.

22

Ist dat die ackrr gecocht is ende niet den here geheilicht vander meerre luden possessien:

23

so sal die paep den prijs scatten naden ghetal vanden iaren tot iubileum: ende die gene dien belofde den here die sal den prijs gheuen.

24

Mer in iubileo so sal hi wederkeren totten eersten here dien vercocht had: ende dien hadde ghehat inden deel sijnre possessien.

25

Alle scattinghe salmen wegen met cycle vanden sanctuarie Die cicle heeft twintich hellinghen.

26

Die eerste gheboren die den here toe behoren. en mach nyemant heilighen noch belouen. Weder het osse of scape is si sijn des heren

27

Ende is die beeste onsuuer. so salse die gene diese offerde lossen na haer scattinghe: ende hi salre dat vijftendeel toe doen vanden prise. Ende en wil hijse niet lossen so salmense enen anderen vercopen: om also veel alst voer ghescat is.

28

Alle dat den here wort gheheilicht weder het mensche is of beeste. of acker men en salt niet vercopen: noch men macht niet lossen wat dat eenwarf gheconsacreert is. dat sal den here wesen heilich der heilighen.

29

Ende alle consecracie die van enen mensche wort gheoffert die en salmen niet lossen: mer sij sal den doot steruen.

30

Alle tienden vanden lande beide van vruchten ende van bomen appelen. sijn des heren: ende hem sijn si gheheilicht.

31

Mer soe wie sijn tiende lossen wil: hi salre toe doen dat vijfte deel van alle sinen tienden.

32

Die coe dat scaep die gheyt die onder des herden ruede sijn: so wat totten tiensten comt dat sal den here worden geheilicht

33

Men sal niet wtkiesen dat guede noch dat quade: noch om een ander verwisselen. So wie dat verwisselt. ende datter verwisselt is. ende daert om ghewisselt is sal den here worden gheheilicht: ende men en salt niet lossen.

34

Dit sijn die gheboden die die here moysen gheboot den kinderen van israhel: opten berch van synai.

§ Hier eyndet der leuiten boock.