Bible in duytsche (Delftse bijbel 1477)

§ Ca .xxiiij.

1

ENde die here sprac tot moysen ende seide.

2

Ghebiede den kinderen van israhel: dat sij brengen harde fijn ende claer olye van oliuen om die lichtuaten altijt daer mede te doen bernen buyten die gordine der oercondscap. inden tabernakel der beloeften.

3

Ende aaron salse setten van des auonts tot des morghens voerden here: mit eweliker zeden ende castumen in uwen geslachten.

4

Men salse altoes setten op. alte finen candelaer in des heren aenscouwen

5

Du suls oec nemen bloeme. ende daer of sulstu backen twaelf broden: ende elc sal hebben twe thiendendele.

6

Ende du sulste legghen die ses ieghen die ses die een tegens die ander op die harde fine tafel voerden here

7

ende du sulste daer bouen legghen harde claer wieroec: om dattet broot sal sijn in een ghedencken van des heren offerhande

8

Alle saterdaghe salmense verwandelen voerden here. ende ontfanghense vanden kinderen van israhel in eweliker wet:

9

ende si sullen aarons ende sijnre sonen wesen ende sij sullense eten in die heilighe stat: want het is heylich der heilighen van des heren sacrificien met eweliken rechte.

10

Siet het ghinc

[p. *164]

wt eens wijfs soen van israhel dien si ghebaert had van enen man van egipten onder die kinder van israhel: ende hi wort scheldende inden tenten mit enen man van israhel

11

ende doe hi des heren naem had gheblasfemeert. ende hi en geuloect hadde: so brochtmen tot moysen. Ende sijn moeder hiet salumith dabris dochter van dans geslacht

12

Ende si deden in enen kerker: tot dat si weten souden wat die here beuelen soude.

13

Ende die here sprac tot moysen ende seide

14

Leide den blasfemeerre buyten den tenten: ende alle diet hoerden sullen haer handen op sijn hooft legghen ende alle dat volc sullen stenen:

15

ende du suls totten kinderen van israhel segghen. Een mensche die sinen god vloken sal hij sal sijn sonden draghen:

16

ende die des heren naem sal blasfemeren: hi sal den doot steruen Alle die menichte vanden volke sullen mit stenen werpen. Weder hi poerter wesen sal of toecomeling: die des heren naem blasfemeren sal die sal den doot steruen.

17

Die een mensche slaet ende dodet hi sal den doot steruen.

18

Die een beeste slaet alsodanich sal hi weder gheuen: dats ziel om ziel

19

Die enighen van sinen poorters enige smette gheeft: men sal hem doen.als hi ghedaen heeft.

20

Dat is breken voer breken: oghe om oghe: tant om tant sal hi weder gheuen. Alsulken smet als hi ghedaen heeft: alsodanich salmen dwinghen teghedoghen

21

Die een beeste ghesleghen heeft: hi sal een ander beeste wedergheuen Ende die een mensche slaet: men sallen castien.

22

Gherechte vonnisse sal onder v lude wesen. Weder een vreemde. of een poorter onder v gesondicht heeft: want ic bin die here v god

23

Moyses seide dit totten kinderen van israhel: ende si leiden buten den tenten wt: die daer gheblasfemeert hadde. ende si worpen hem doot mit stenen. Ende die kinder van israhel deden also die here moysen beuolen had