Bible in duytsche (Delftse bijbel 1477)

§ Capit .xxiij.

1

DIe here sprac tot moysen ende seide

2

Spreect den kinderen van israhel: ende du suls tot hem segghen Dit sijn des heren dagen die ghi sult heeten heylich.

3

Ses dagen suldi werck doen: den seuenden dach want hij des saterdaghes ruste is soe salmen heilich heeten. Gheen werck en suldi daer in doen. Het is des heren saterdach in allen uwen woninghen.

4

Dit sijn dan des heren heylige dagen: die ghi vieren sult te haren tiden.

5

In die eerste maent inden viertienden daghe vander maent des auonts so ist des heren phase:

6

ende inden vijftienden daghe van deser maent soe ist die feeste vanden deruen broden Seuen dagen suldi deruen broot eten.

7

Die eerste dach sal v sijn harde seer te vieren. ende heylich. Gheen dienstelic werck en suldi daer in doen:

8

mer ghi sult inden vuer den here sacrificie offeren. seuen daghen Ende die seuende dach sal meer te vieren sijn ende heyligher: ende gheen dienstelic werck en suldi daer in doen.

9

Ende die here sprac tot moysen ende seide.

10

Spreket den kinderen van israhel: ende du suls tot hem segghen. Als ghi ghecomen sult sijn int lant dat ic v geuen sal ende ghi dat coren hebt gheoest: so suldi brengen die scouen vanden aeren die primicien uwes ouxtes totten pape.

11

Ende hi sal dat bondekijn opheffen voerden here dattet ontfanclic sal wesen voer v inden anderen saterdaghe: ende hi sal dat heylighen.

12

Ende in desen seluen daghe dat dese scoue wort gheheylicht. soe salmen slaen een eeniarich lam onbesmet in des heren holocaust:

13

ende men sal die libamenten

[p. *162]

daer mede offeren twe thiendendeel blomen besleghen met olye in des heren brant ende in harden soeten roeck ende verssche offerhande van wijn. dat vierendeel van hin.

14

Ghi en sult vanden coren niet eten broot noch pap noch wellinghe: voer dien dage dat gi daer of offeren sult uwen gode. Dit is een ewelijc ghebot in uwen gheslachten. ende in allen uwen woninghen.

15

Van den anderen daghe totten saterdaghe daer ghi in offerde die scoue van uwen primicien sul dij tellen seuen volle weken

16

totten anderen daghe tot dat die seuende weke volmaect wort dat is vijftich daghen: ende aldus sul di niewe sacrificie offeren den here.

17

wt allen uwen woningen. twe broden van primicien van tween tiendendelen blomen ghehefdeacht: die ghi backen sult den here in primicien.

18

Ende ghi sult mitten broden offeren seuen onbesmette lammeren eeniarich ende een calf vanden vee. ende twe rammen: ende sij sullen wesen in holocaust mit haren libamenten in harden sueten roke den here

19

Gi sult oec doden een bock voer die sonde: ende twe eeniarighe lammeren in hostien van paeyselicheden.

20

Ende als se die paep heeft opgheheuen voerden here mitten broden der primicien: soe sullen si vallen te sinen deel.

21

Ende ghij sult desen dach heten seer te vieren ende herde heylich. Gheen dienstelic werck en suldi daer in doen. Dit sal ewelic wettich wesen in uwen woninghen ende in uwen gheslachten.

22

Want als ghij sult ouxten dat coerne van uwen lande so en suldijt niet ofsniden. totter aerden noch gij en sult niet vergaderen die aderen die daer bliuen: mer gij sultse laten den armen eude den vreemden. Ic bin die here v god

23

Ende die here sprac tot moysen ende seide

24

Spreect den kinderen van israhel. In die seuende maent inden eersten dach vander maent soe salt v sijn een ghedenckenisse vierte ende ghij sult blasen met trompen: ende men salse heylich heeten.

25

Gheen dienstelijc werc en suldi daer in doen: ende ghij sult den here offeren holocauste.

26

Ende die here sprac tot moysen ende seide.

27

Die tiende dach van deser seuender maent dat is die dach der suueringhe ende hi sal wesen harde seer te vieren. ende men sallen heeten heylich: ende gij sult uwe zielen quellen daer in: ende ghi sult den here offeren holocaust:

28

Gheen werc en suldi doen inden tide des dages. want het is die dach der goedertierenheit: dat v die here uwe god goedertieren sij.

29

So wat ziele in desen daghe niet en sal worden ghequelt. si sal veruaren van haren volke:

30

ende die yet wercs duet: ic salse of plamen van haren volke

31

Daer om en suldier niet wercs in doen. Het sal v ewelic wettich wesen in al uwen geslachten ende woninghen.

32

Het is die vierte der rusten: ende ghij sult uwe zielen quellen. Vanden neghenden dage vander seuender maent. vanden auonde totten auont so suldi uwe vierten vieren.

33

Ende die here sprac tot moysen ende seide.

34

Spreect den kinderen van israhel. Vanden vijftienden dage van de-

[p. *163]

ser seuender menat so sullen wesen die daghen vanden tabernaculen seuen daghen den here.

35

Die eerste dach sal harde seer te vieren heten ende harde heylich. Gheen dienstelic werc en suldi daer in doen:

36

ende seuen daghen suldi den here offeren holocaust. Ende die achtsten dach sal v harde seer wesen te vieren ende harde heilich: ende ghi sult den here offeren holocaust Want het is een dach der menichten ende der vergaderinghen. Gheen dienstelic werc en suldi daer in doen.

37

Dit sijn des heren daghen dat ghij heten sult harde seer te vieren ende harde heilich: ende ghi sulter in offeren den here offerhande. holocausten ende libamenten naden zeden van elken daghe:

38

wtghedaen des heren saterdaghen ende uwe ghiften. ende dat ghi offeren sult van beloeften ende dat ghij al willens gheuet den here.

39

Daer om vanden vijftienden daghe vander seuender maent als ghij alle die vrucht van uwen lande sult hebben vergadert. soe suldi des heren vierte vieren seuen daghen. Inden eersten dage ende inden achtsten dage soe salt vierte wesen: dat is ruste.

40

Ende gi sult v nemen inden eersten daghe die vruchte van enen harden sconen boem ende bladen van palmen ende telgher van houte met dicken loueren ende willigen van eenre riuieren. ende ghi sult verbliden voerden here uwen god:

41

ende ghi sult sijn feest vieren seuen dagen eenwarf des iaers. Het sal ewelic wettich wesen in uwen gheslachten. In die seuende maent suldi feesten vieren:

42

ende ghij sult wonen in hutten seuen dagen. Elc die vanden gheslachte van israhel is sal wonen in tabernaculen:

43

om dat uwe nacomelinghen sullen leren dat ic die kinder van israhel dede wonen in tabernaculen. doe icse leide vten lande van egipten. Ic bin die here v god.

44

Ende moyses sprac van des heren feesten totten kinderen van israhel