Bible in duytsche (Delftse bijbel 1477)

§ Ca .xxij.

1

ENde die here sprac tot moysen ende seide.

2

Segt tot aaron ende sijn sonen. dat si wachten van dien die gheconsacreert sijn vanden kinderen van israhel: ende si en sullen niet besmetten den name der dinghen die mi gheheilicht sijn. die sij offeren. Ic bin die here.

3

Segt tot hem: ende tot haren nacomelinghen. Ende elc van uwen

[p. *160]

gheslachte die toegaen sal te dien die gheconsacreert sijn. die die kinder van israhel gheoffert hebben den here in den welken onsuuerheit in is: hi sal veruaren voer den here. Ic bin die here.

4

Een man van aarons zade die lasers sijn sal of ghedoghen dat vloyen van zade. hij en sal niet eten van dien die mi gheheilicht sijn: voer dat hi genesen wort. Die ghenaect enen onsuueren van enen doden. ende daer wt coemt saet als oft natuerlijc waer.

5

ende die genaect enen worm ende elc onreyn dinc wies ghenaken onsuuer is.

6

hi sal onsuuer wesen totten auont: ende hi en sal niet eten van dien die gheheilicht sijn mer als hi sijn vleysch sal hebben ghedwoghen int water

7

ende die sonne onderghegaen is. dan sal hi ghesuuert eten van alden gheheilichden. want het is sijn spise.

8

Si en sullen niet eten van ghestoruen corren of dat gheuanghen is van eenre beesten: noch daer in worden besmet Ic bin die here

9

Ende si sullen bewaren mijn gheboden. opdat si niet ondergheset en werden der sonden ende steruen in hoer sanctuarie als si die besmet hebben. Ic bin die here diese heilighe.

10

Gheen vreemde en sal eten vanden gheheilichden. Des papen ingheboren ende huerknaep en sullen daer niet of eten.

11

Mer dien die paep ghecoft heeft. ende die dienstknaep van sinen huse: dese sullen daer of eten.

12

Ist dat des papen dochter yemant van den volke te huwelic ghegheuen is: si en sal niet eten van dien die gheheilicht sijn ende vanden primicien.

13

Mer ist dat si wedue of versteken of sonder kinderen weder tot haers vaders huys ghekeert is: also si plach doe sij ioncwijf was. so salmense voeden mit haers vaders spisen. Gheen vreemde en heeft macht daer of te eten.

14

Die bi onwetenheit heeft ghegheten vanden gheheilichden. hi sal dat wijftendeel daer mede toedoen mit dat hi at. ende gheuent den pape in die sanctuarie.

15

ende si en sullen der kinder van israhels gheheilichde niet besmetten die si den here offeren

16

dat si machschien niet en gedogen die quaetheit haerre misdaet. als sij die geheilichde eten Ic bin die here: die v heilighe.

17

Ende die here sprac tot moysen ende seide.

18

Spreket tot aaron ende sijn sonen. ende tot alle die kinder van israhel: ende du suls tot hem segghen Een mensche vanden huse van israhel ende vanden toecomelinghen die mit v wonen. die sine offerhande offert of sijn belofte gheldende of al willens offerende: so wat dat hi offert in des heren holocanst dattet bi v lude worde gheoffert:

19

dat sal een onbesmet mannekijn wesen van ossen of van scapen of van gheyten.

20

Ende heeftet enighe smettesoe en suldijt niet offeren: noch ten sal niet ontfanclijc wesen.

21

Een mensche die offert victime van paeyselijchede den here. of sijn beloefte gheldende of al willens offerende beide van ossen ende van scapen: so sal hijt onbesmet offeren dattet ontfanckelijc sij. Gheen smette en sal daer in wesen.

22

Ist blint ofte broken. of heeftet litteiken. of pocken of scorftheit. of enighe vlecke. soe

[p. *161]

en suldijs niet offern den here: noch en sulter niet of verbranden op des heren outaer

23

Een osse of een scaep die die oren of die staert of hebben die moghestu willichlijc offeren: mer hier mede en machmen beloefde niet ghelden.

24

Elke beeste die gate heeft ghewreuen of ghescoert of gesneden of die natuerlike leden ofghehaelt. dat en suldi den here niet offeren: ende in uwen lande so en duet dit al met allen niet.

25

Van eens vreemdes hant en suldi uwen gode geen brode offeren. ende soe wat dat hij anders gheuen wil. want sij sijn al onsuuer ende besmet: ghi en sultse niet ontfaen

26

Ende die here sprac tot moysen ende seide.

27

Die osse. dat scaep. ende die gheit als si gheboren sijn. si sullen seuen dagen wesen onder haerre moeder borst: mer ten achsten daghe of daer na salmense den here moghen offeren.

28

Weder het is een coe of een scaep men salt in enen daghe met haer drachte niet offeren.

29

Ist dat gi den here offert ene hostie te dancke ende te loue dat sij bequaemlic mogen wesen:

30

so suldise inden seluen daghe moghen eten. Ende daer en sal niet of bliuen tot smorghens vanden anderen daghe. Ic bin die here

31

Wacht mine gheboden: ende duetse. Ic bin die here

32

En besmet minen heiligen naem niet: dat ic gheheylicht worde in midden der kinder van israhel. Ic bin die here. die v heylighe:

33

ende ic heb v gheleit vten lande van egipten. om dat ic v in god wesen soude. Ic bin die here