Bible in duytsche (Delftse bijbel 1477)

§ Ca .xxi.

1

DIe here seide tot moysen Spreec totten papen aarons sonen: ende du suls tot hem segghen. Een pape en sal hem niet besmetten in die doot sijnre poorters:

2

sonder alleen in sijnen maghen ende in sijnen neuen: dat is op die vader ende op die moder ende opten zoon ende op die dochter. ende opten broeder

3

ende op die suster die maghet

[p. *159]

is ende ghenen man en heuet:

4

hi en sal oec niet worden besmet inden prince sijn volcs.

5

Si en sullen haer hoeft noch haren baert niet scheren: noch sij en sullen in haren vleysch gheen sneden maken

6

si sullen heilich wesen den here haren god: ende si en sullen sijnen naem niet besmetten. Want si offeren des heren wieroec ende die broden haers godes: ende daer om sullen si heilich wesen

7

Een licht wijf ende een oneerlike bordeel vrouwe en sal hi te wijue niet nemen: noch ene die versteken is van haren man. want hi is sijnen gode gheconsacreert:

8

ende hi offert die broden der voerlegghinghe. Daer om sal hi heilich sijn: want ic die here bin heilich: die v heilighe

9

Wert eens papen dochter begrepen in onkuysheden. ende heeft si haers vaders naem besmet: soe salmense mitten vuer verbernen.

10

Die bisscop dat is die alre meeste pape onder sijn broeders. op wies hoeft ghestort is die olye der consecracien. ende wies handen in paepscap gheconsacreert sijn. ende die ghecleet is mitten heilighen clederen: hi en sal sijn hooft niet ondecken. noch sijn clederen niet scoren:

11

ende hi en sal al mit allen tot genen doden in gaen Hi en sal hem niet besmetten op vader noch op moeder:

12

noch hi en sal vten heilighen niet gaen dat hi gods sanctuarie niet en besmette: want die olye der heligher consecracien sijns gods is op hem. Ic bin die here.

13

Hi sal een maghet te wijue nemen.

14

Een wedue ende die versteken is ende besmet ende een licht wijf en sal hi niet nemen mer een ioncfrouwe van sinen volke:

15

dat hij dat gheslachte van sijnre coemsten niet en vermenghe mitten volke sijns volcs: want ic bin die here dien heilighe.

16

Ende die here sprac tot moysen ende seide.

17

Spreect tot aaron. Een mensch van dinen zade nader familien die een smet heeft hij en sal sijn gode gheen broden offeren noch en sal te sijnen dienste gaen.

18

Is hi blint. is hi manc. is hi mit cleinre of mit groter of mit crommer nosen:

19

is sijn voet of sijn hant te broken.

20

of heeft hi den bulte of is hi leep. of heeft hi wit int oghe. of inden lichaem eenpaerlike scorftheit. of litteiken of is hi ghescoert:

21

elc van aarons des priesters sade die smette heeft: hij en sal niet voertgaen sinen here hostien te offeren noch broden sijnen gode.

22

Nochtan sal hi eten vanden broden diemen offert inder sanctuarien.

23

also dat hy nochtan binnen der gordinen niet en gae: noch dat hi ten outaer niet en ga want hi heeft een smette: ende hi en sal mine sanctuarie niet besmetten. Ic bin die here die v heilighe.

24

Dus sprac moyses tot aaron ende sijnen sonen ende tot al israhel: al dat hem beuolen was