Bible in duytsche (Delftse bijbel 1477)

§ Capittel .xx.

1

ENde die here sprac tot moysen ende seide.

2

Dit sulstu segghen den kindere van israhel. Een mensche vanden kinderen van israhel of vanden toecomelinghen die in israhel wonen: soe wie dat gheuen sal van sijnen natuerliken sade den afgode moloch. hi sal den doot steruen. Ende tvolc vanden lande sal hem stenen:

3

ende ic sal mijn aensicht ieghen dien setten. ende ic sallen ofcortten van midden sijnen volke: om dat hi van sijnen sade moloch heeft ghegeuen. ende mine sanctuarie heeft besmet ende om dat hi minen heilighen naem heeft besmet.

4

Ende ist dattet volc vanden lande verrokeloest ende also luttel mickende si op mijn ghebot. Laet dien mensche gaen dien van sijnen sade heeft ghegheuen moloch. ende en willen sijs niet doden:

5

soe sal ic mijn aensicht setten op dien mensche ende op sijn maesscap: ende ic sallen ofcorten ende alle dieghene die mit hem hielden. dat hi vernoyeren soude mit moloch van midden sijnen volke.

6

Een ziel die haer ghekeert heeft aen kokelaers ende aen waersaghers ende mit hem vernoyet wort: ic sal mijn aensichte ieghen hem setten: ende ic salse doden van midden minen volke

7

Wert heilich ende weest heilich: want ic heilich bin die here v god.

8

Wacht mijn gheboden: ende doetse. Ic bin die here: die v heilighe.

9

Die sijnen vader of sijn moeder vloken sal. die sal den doot steruen. Die vader of moeder vloken sal: sijn bluet sal wesen op hem

10

Heeft een onkuysheit ghedaen mit eens anders wijf. ende ouerspul mit sijns naesten wijf: si sullen den doot steruen die ouerspeelre ende die ouerspeelinre.

11

Die slapen sal mit sijn stiefmoeder ende sijns vaders scamelheit ondect: sij sullen beide den doot steruen. Haer bloet si op hem.

12

Die slaept mit sijn soens wijf sij sullen beide steruen: want sij hebben ouerdaet ghedaen. Hoer bloet si op hem.

13

Die slaept mit enen

[p. *158]

man alsmen natuerlijc is mit enen wijue. si hebben qnaet beide ghedaen: sij sullen den doot steruen. Haer bloet si op hem

14

Die bouen die dochter die sijn wijf is. neemt haer moeder: hi heeft ouerdaet ghedaen. Hi sal leuende mit haer barnen: ende al so groot ouerdaet en sal in midden v luden niet blijuen

15

Die mit een quicke of mit een beest misdoet: hi moet den doot steruen: ende men sal die beest oec doden.

16

Een wijf die onder enighe beest gaet ligghen: sij sal mitten beest ghedoot worden. Haer bloet sij op hem.

17

Die nemet sijn suster. sijns vaders dochter of sijnre moeder dochter. ende haer vuylheit ondect siet. ende si haers broeders scamelheit ondect: si hebben een quaet dinc ghedaen si sullen beide voer haer volc worden ghedoot: om dat si onderling haer onreynicheit hebben ondect: ende si sullen hare quaetheit draghen.

18

Die leit bi enen wijue int vloeyen haerre suueringhe ende haer vuylheit ondect. ende si ontdoet die fonteine haers bloedes: si sullen beide worden ghedoot in midden haren volc

19

Du en suls niet ondecken die vuylheit dijnre moeder suster noch dijns oems wijf: die dit doet hi heeft die scamelheit sijns vleysches ondect: si sullen beide haer quaet draghen

20

Die leghet bi sijns oems soens wijf of bi sijns oems wijf ende ondect die scamelheit sijnre maechscap: si sullen beide haer sonden draghen. Ende si sullen sonder kinderen steruen

21

Die sijns broeders wijf neemt hi doet een ongeoerloft dinc: hi heeft sijns broeders scamelheit ondect: sij sullen sonder kinder wesen.

22

Wacht mijn wette ende mijn vonnissen ende doetse: dat v dat lant oec niet wt en werp daer gi ingaen sult ende in wonen

23

Ende wilt niet wandelen in die wettelicheden dier gheslachten: die ic verdriuen sal voer v. Want si hebben al dit ghedaen: ende ic hebse veronwaert.

24

Mer uwen luden soe seg ic. Besittet haer lant die ic v gheuen sal in erfachticheit: dat lant dat vloeyt van melc ende van honich. Ic bin die here v god: die v verscheiden heb vanden anderen volken.

25

Daer om verscheit ghi die onsuuer beeste vanden suueren: ende die onsuuer voghelen vanden suueren Dat ghi uwe zielen niet en besmet inden vee ende in den voghelen ende in allen dieren die beruert worden inder aerden: ende in allen dien die ic v getoent heb besmet te wesen.

26

Ghi sult mij heilich wesen: want ic die here bin heilich: ende ic heb v verscheiden vanden anderen volken om dat ghi mi wesen soudt in volc.

27

Een man of een wijf daer die gheest des phitoens of van waersagerien in is. hi sal den doot steruen: sij sullense bewerpen mit stenen. Haer bloet sal op haer hoeft wesen.