Bible in duytsche (Delftse bijbel 1477)

§ Capittel .xix.

1

DIe here sprac tot moysen ende seide.

2

Spreet tot alder vergaderinge der kinder van israhel: ende du suls tot hem segghen. Weest heilich: want ic bin heilich die here v god

3

Elc ontsie sinen vader ende sijnre moeder. Wachtet mine saterdaghe. Ic bin die here v god.

4

En wilt niet worden ghekeert totten afgoden: noch ghi en sult v gheen ghegoten goden maken. Ic bin die here v god.

5

Offert ghi een hostie van payselijcheden den here dat si bequaem si:

6

in dien daghe dat ghijse gheoffert hebt ende inden anderen daghe: sult ghijse eten. Mer wat daer ouer blijft in den derden daghe: dat suldi mitten vuer verbranden.

7

Soe wie daer of eten sal naden anderen dach hi sal onsuuer wesen ende misdadich vander quaetheit:

8

ende hi sal sijn quaetheit self draghen. want hi heeft des heren heilich besmet ende die ziel sal veruaren van midden haren volke.

9

Als ghi sult hebben dat

[p. *156]

coerne van uwen lande gheoest. so en suldijt niet ofsnyden totten gronde vander aerden bouen. noch du en suls niet vergaderen die aderen die daer bliuen:

10

noch in dinen wijngaert die druuen ende die besien die neder vallen en selstu niet vergaderen: meer du sulstese laten te sniden den aermen. ende den vreemden Ic bin die here v god.

11

Du en sulste gheen diefte doen: ghi en sult niet lieghen. noch niemant en sal sinen naesten bedrieghan.

12

Du en suls niet versweren in minen naem: noch du en suls dijns heren dijns gods naem niet besmetten. Ic bin die here.

13

Du en suls genen ouerdaet doen dijnen naesten: noch du en sulsten mit cracht niet verduwen. Dat werck dijns ghehuerts knapen en sal dij niet blijuen tot smorghens.

14

Du en sulste den douen niet vloken. noch du en suls voerden blinden niet legghen daer hi hem an stoet: mer du suls dijnen here dinen god ontsien want ic bin die here.

15

Du en suls niet doen dat onrecht is: noch ongerechtelijc vonnissen Du en suls niet merken des armen menschen persone: noch du en suls niet eren des machtighen menschen aensichte. Vonnisse gerechtelijc dijnen naesten.

16

Du en sulste niet wesen inden volke ouerdadich noch runende. Du en sulste niet staen ieghen dijns naesten bloet. Ic bin die here

17

Du en suls dijnen broeder niet haten in dijn herte: mer berispten openbaerlijc: dattu van hem gheen sonde en hebs

18

Du en suls gheen wrake soken: noch du en suls niet herdenckelijc wesen des onrechts dijnre poorteren. Du sulste dijnen vrient minnen ghelijc dij seluen. Ic bin die here.

19

Wacht mijne wet Dijn vye en sulstu niet doen springhen mit beesten van ander manieren. Du en suls dijnen acker niet saeyen mit menigherhande saet. Een cleet dat van tween manieren gheweuen is en sulstu niet andoen.

20

Ist dat een man slaept mit enen wijue ende natuerlijc is mit haer die ioncwijf is noch te huwen. ende si nochtan niet verlost en is mit ghelde noch der vryheit ghegheuen: so salmense beide slaen ende si en sullen niet steruen: want si en was niet vry

21

Want voer sijn misdaet sal hi offeren ter doren vanden tabernakel der oercondscap enen ram

22

ende die paep sal voer hem bidden ende voer sijn misdaet den here ende hi sal hem goedertieren worden: ende hem sal die sonde verlaten worden.

23

Als ghi int lant comen sult wesen. ende ghi plant daer in hout dat appelen draghet: soe suldi wech doen haer eerste dracht. Want die appelen die sij draghen. sullen v onreyn wesen: ende ghi en sulter niet of eten.

24

Int vierde iaer sal al haer vrucht den here louelic worden gheheilicht.

25

Mer inden vijften iaer suldi haer vruchten eten: ende vergaderen die appelen die sij brenghen Ic bin die here v god

26

Ghi en sult dat vleysch mitten bloede niet eten. Ghi en sult niet toueren: noch drome houden.

27

Noch ghi en sult v haer niet rontscheren: noch uwen baert scheren.

28

Ende onder doder wille en suldi in v vleysch niet sniden: noch ghi en sult v ghene

[p. *157]

figuren noch litteyken maken. Ic bin die here.

29

Du en suls dijn dochter int bordeel niet setten: dattet lant niet en worde besmet ende veruult mit misdade.

30

Wacht minen saterdach: ende ontsiet mine sanctuarie. Ic bin die here

31

En gaet ten waersaghers niet noch en vraecht den waersaghers niet: op dat ghi bi hem niet en wort besmet. Ic bin die here v god.

32

Stant op voer een graeu hoeft: ende eer des ouden menschen persoen: ende ontsich den here dijnen god Ic bin die here

33

Ist dat in uwen lande woent een toecomeling. ende woent hij onder v. en verwijt hem niet:

34

mer hi sal onder v wesen als een ingeboren: ende gi sulten minnen ghelijc v seluen. Want ghi waert oec toecomelinghen int lant van egipten. Ic bin die here v god

35

En wilt niet onrecht doen in vonisse: in regule. noch in ghewichte. noch in mate.

36

Die waghe sal wesen gherechtelijc. ende die wichte ghelijc: ende die mate sal wesen gerechte: ende dat sestendeel ghewarich. Ic bin die here v god: die v gheleit heb vten lande van egipten

37

Wacht alle mine gheboden ende alle mine vonnissen: ende doetse. Ic bin die here.