Bible in duytsche (Delftse bijbel 1477)

§ Ca .xviij.

1

DIe here sprac tot moysen ende seide.

2

Spreect den kindereren van israhel: ende du suls tot hem segghen. Ic bin die here v god.

3

Ghi en sult niet doen na die ghewoente des lants van egipten daer ghi in ghewoent hebt: ende ghi en sult niet doen nader zeden des lants van chanaan. daer ic v inleiden sal ende ghi en sult in hare wettelichinet niet wandelen.

4

Ghi sult doen mij vonnissen ende houden mijn gheboden: ende daer in wandelen. Ic bin die here v god.

5

Wachtet mijn wet ende mijne vonnissen: wat mensche diese duet hi salder in leuen Ic bin die here v god.

6

Gheen mensche en sal toegaen ten naesten sijns bloeds: noch haer vuylheit ondecken. Ic bin die here.

7

Du en suls niet ondecken die vuylheit dijns vaders ende dijnre moeder. Het is dijn moeder: du en sulste haer vuylheit niet ondecken.

8

Du en suls niet ondecken die vuylheit van dijns vaders wijf. Want het is dijns vaders vuylheit

9

Du en sulste niet ondecken die vuylheit dijnre suster van dijnen vader of van dijnre moeder die thuys of daer buyten ghewonnen is.

10

Du en sulste niet ondecken die vuylheit dijns soens dochter of dijnre nichten van dijnre dochter: want het is dijn vuylheit

11

Du en sulste niet ondecken die vuylheit dijns vaders wijfs dochter dien si dinen vader ghebaert heeft: ende is dijn snster

12

Du en sulste dijns vaders suster vuylheit niet ondecken: want het is dijns vaders vleysche.

13

Du en sulste niet ondecken dijnre moeder suster vuylheit om dattet dijnre moeder vleysche is.

14

Du en sulste dijns oems vuylheit niet ondecken: noch du en suls te sijnen wijue niet gaen: die dij mit maechscappen gheuoghet is.

15

Du en suls niet ondecken dijnre behuweder dochter vuylheit: want si is dijns soens wijf: noch du en sulste haer scamelheit niet ondecken.

16

Ende niemant en sal nemen sijns brueders wijf. Du en sulste niet ondecken die vuylheit

[p. *155]

van dijns broeders wijf want het is dijns broeders vuylheit

17

Du en sulste niet ondecken dijns wijfs haerre dochter vuylheit. Du en suls niet nemen haers soens dochter noch haerre dochter dochter om haer vuylheit te ondecken: want si sijn haer vleysch: ende dustanighe vergaderinghe sijn onnuttelijc

18

Du en suls niet nemen dijns wijfs suster te haren lachter: noch du en suls haer vuylheit niet ondecken also langhe als dijn wijf noch leeft.

19

Du en suls niet gaen tot enen wiue die haer maentsuueringhe gedoghet: noch du en suls haer stinckentheit niet ondecken.

20

Du en sulste mit dijns naestens wijf niet gaens hebben: noch te haer worden gheuoghet mitter vergaderinghe dijns saets.

21

Du en suls van dijnen sade niet gheuen datmen consacreer den afgod moloch: noch du en suls dijnes gods naem niet besmetten. Ic bin die here.

22

Du en suls di niet menghen met enen man alsomen mit enen wiue pleghet te sijn: want het is te veronwaerden.

23

Du en suls mit gheenre beesten yet te doen hebben natuerlijc: noch di besmitten mit hem. Een wijf en sal onder een beest niet leggen noch daer mede te doen hebben: want het is ouerdaet.

24

En wort niet besmet in allen desen daer alle die heydenen mede besmet sijn dien ic verdriuen sal voer uwen aenscouwen:

25

ende daer dat lant mede besmit is. wes quaetheit ic visiteren sal: so dattet wtwerpen sal die op haer wonen.

26

Wachte mine wet ende mine vonnissen: ende ghi en sult niet doen alle dese onwaerdicheden beide ingheboren ende aertwinre die woent onder v luden.

27

Want alle dese onwaerdicheden deden die lantwinres vanden lande die voer v waren ende si besmetten dat lant.

28

Daer om wachtet v oec dattet v niet wt en werp als ghi sulke dinghen hebt ghedaen: also si die luden wtgheworpen heeft die voer v waren.

29

Elke ziele die yet doet van desen onwaerdicheden: hi sal veruaren van midden haren volc. Wachtet mine gheboden.

30

Ende en wilt niet doen dat dese deden die voer v waren: ende en worter niet in besmet. Ic bin die here v god