Bible in duytsche (Delftse bijbel 1477)

§ Ca .xvij.

1

ENde die here sprac tot moysen ende seide.

2

Spreect tot aaron ende sijn sonen ende alle den kinderen van israhel: ende segt tot hem. Dit is die redene die die here beuolen heeft segghende

3

Elc mensche vanden huse van israhel. die dodet een osse of een scaep. of een gheit binnen den tenten of buten den tenten.

4

ende die offerhande niet en brenct den here ter doren vanden tabernakel: hi sal des blueds misdadich wesen. Als of hi dat bloet ghestort had: so sal hij veruaren in midden van sijnen volke

5

Hier om sullen die kinder van israhel brenghen den paep haer hostien dien si doden inden velde om dat sij sullen worden gheheilicht den here voer die dore vanden tabernakel der oercondscap: ende dat sijse offeren sullen den here van hostien paeyselijcheden.

6

Ende die paep sal dat bloet stortten opten outaer des heren ter doren vanden tabernakel der oercondscap: ende hi sal dat vette verbernen in roke der sueticheit den here:

7

ende si en sullen voertmeer haer hostien niet offeren den duuelen daer si mede vernoyeert waren. Dit sal ewelijc wettih wesen ende haren nacomelinghen.

8

Ende du suls tot hem segghen. Een mensche vanden huse van israhel. ende vanden toecomelinghen die onder v sijn die offeren sal holocaust of victime.

9

ende diese niet en brenct ter doren vanden tabernakel der oercondscap om den here te offeren: hi sal veruaren van sijnen volc

10

Elc mensche vanden huse van israhel ende vanden toecomelinghen die onder hem wonen. ende bluet eet soe sal ic mijn aensichte besluten ieghen sijn ziel ende ic salse verdriuen van haren volc:

11

want des vleysches ziel is inden bloede: ende ic heb v ghegheuen. dat ghijt offeren

[p. *154]

sult voer uwe zielen op mijnen outaer ende om dattet bloet sal wesen voer der zielen misdaet.

12

Hier om so heb ic den kinderen van israhel gheseit. Gheen ziele van v luden en sal bloet eten: noch vanden toecomelinghen die onder v wonen.

13

Elc mensche vanden kinderen van israhel. ende vanden toecomelinghen die onder v wonen. ist dat hi bi iachte of mit vlieghen een beest of een voghel gheuanghen heeft diemen eten mach: so sal hi haer bloet wtlaten ende deckent mit aerde.

14

Want die ziele van allen vleysch die is in den bloede. Ende daer bi so heb ic den kinderen van israhel geseit Ghi en sult gheen bloet eten van ghenen vleysch: want des vleysches ziel is inden bloede: ende so wiet eten sal hi sal veruaren.

15

Een ziel die ghegheten heeft van enen corre die ghestoruen is of gheuanghen van een beeste. beide van ingheboren of van toecomelingen hi sal sijn clederen dwaen ende hem seluen mit water: ende hi sal onsuuer wesen totten auont: ende in deser manieren sal hi suuer worden.

16

Mer en dwaet hi sijn cleder niet of sijn lichaem: soe sal hi sijn quaetheit draghen