Bible in duytsche (Delftse bijbel 1477)

§ Ca .xvi

1

Na aarons twee sonen doot doe sij vreemt vuer offerden: ende si ghedoet worden:

2

so sprac die here tot moysen: ende gheboet hem ende seide. Spreec tot aaron dinen brueder. dat hi te alle tide niet en gae inder sanctuarie. dat binnen die gordine is voer die propiciatorie daer die arcke mede ghedect is. dat hi niet en sterue. want ic sal in eenre wolken openbaren bouen die oracule:

3

hi en doe dit te voren. Hi sal offeren een calf voir die sonde: ende een ram in holocauste.

4

Hi sal eenen linen roc an doen: ende hij sal sijn scamelheit bedecken met linen broken. Ende men sallen gordden mit enen linen gordel: ende hi sal enen linen miter op sijn hoeft setten. Want dit sijn heilighe cleder: als hi ghedwoghen wesen sal so sal hi mit alle dese clederen worden ghecleet

5

Ende hi sal ontfaen van alle der menichte der kinder van israhel twe bocken voer die sonde: ende enen ram in holocaust

6

Ende als hi dat calf sal hebben gheoffert ende hi heuet ghebeden voer hem ende voer sijn huys.

7

so sal hi doen staen die twe bocken voerden here in die dore vanden tabernakel der oercondscap:

8

ende worpen op beide loth. die een den here. die ander den bock wtsender:

9

op den welken dat loth valt van den here.

[p. *152]

die sal hi offeren voer die sonde:

10

ende welc loth valt den boc wtsender. dien sal hi leuende doen staen voerden here. om dat die bedinghe sal stortten op hem: dat hien senden sal inder wildernissen.

11

Als hi dus dit ghedaen heeft. so sal hi dat calf offeren: ende bidden voer hem ende voer sijn huys ende hi salt doden.

12

Ende hi sal nemen een wieroecs vat dat hij gheuolt heeft mit colen vanden outaer ende hi sal sceppen mitter hant ghemaect thimiama te wieroeck: ende hi sal gaen binnen die gordine in sancta sanctorum.

13

om dat die roke ende die neuel vanden specien die op dat vuer gheleit waren die orakel ouerdecken sal die ouer die oercondscap leit: ende dat hi niet en sterue

14

ende hi sal draghen van des calfs bloede: ende seuenwerf besprenghen mitten vingher ieghen die propiciatorie oestwert.

15

Ende als hi den bock ghedoot heeft voer des volcs sonde. soe sal hij sijn bloet dragen binnen die gordine alsoet beuolen is van des calfs bloede: om dat hijt spreyen sal ieghen die oracule.

16

ende hi sal suueren die sanctuarie van den kindere van israhels onsuuerheden: ende van haren ouerdaden. ende van allen haren sonden Na dese manier sal hi doen den taberbakel der oercondscap dat onder hem luden is: in midden der lotten haerre woninghen.

17

Gheen mensche en sal inden tabernakel wesen als die bisscop gaet in die sanctuarie. om dat hi bidden sal voer hem ende voer sijn huys. ende voer alle die vergaderinghe van israhel: voer dat hi wt die tabernakel comt.

18

Ende als hi wtghecomen is ten outaer die voerden here is sal hi voer hem bidden: ende hi sal nemen dat bloet vanden calue ende vanden bock ende stortent op sijn hoornen al om ende om:

19

ende hi sallen mitten vingher seuenwerf besprenghen. ende suueren ende heilighen vanden kinderen van israhels onsuuerheden.

20

Ende als hi die sanctuarie sal heb ghesuuert. ende den tabernakel. ende den outaer. dan sal hi den leuenden bock offeren:

21

ende hi sal beide die handen op sijn hoeft legghen ende hi sal belien alle der quaetheit der kinder van israhel ende alle haer misdaet ende haer sonden: ende hi sal bidden op sijn hooft ende hi sallen wtsenden inder wildernissen mit enen mensche die daer toe ghereet sal wesen.

22

Ende als die bock heeft ghedraghen alle haer quaetheden int woeste lant ende hi is laten gaen inder wildernissen.

23

soe sal aaron wederkeren inden tabernakel der oercondscap: ende hi sal oflegghen de cleder die hi te voren an had doe hi inder sanctuarien ghinc. ende hi salse daer laten.

24

ende hi sal sijn vleysch dwaen in die heilighe stat: ende hi sal sijn cleder aen doen Ende als hi wtgecomen is ende sijn holocaust gheoffert heeft ende des volcs: soe sal hi bidden voer hem seluen ende voer dat volc:

25

ende sal dat vette dat gheoffert is voer die sonden opten outaer verbranden.

26

Mer die ghene die den bock wtsender heeft laten gaen hi sal sijn cleder dwaen ende sijn lichaem mit water: ende also sal hi binnen den tenten comen.

27

Mer dat calf ende den boek die voer die sonde waren gheoffert ende daermen dat bloet of binnen

[p. *153]

droech datmen die. die suueringhe doen soude binnen der sanctuarien. die sullen si draghen buyten den tenten ende verbernense mitten vuer beide haer vleysch ende haer vel ende haer missche:

28

ende so wie datse verbernen sal. sijn cledere ende sijn vleysch sal hi mit water dwaen: ende also sal hi comen binnen den tenten

29

Ende dit sal v luden ewelic wettelijc wesen. In die seuende maent in den tienden daghe vander maent. soe suldi uwe zielen quellen: ende ghi en sult gheen werck doen weder hi ingheboren is of toecomeling die onder v vreemt is.

30

In desen daghe sal die suueringhe van v luden wesen ende dat verclaren: ende ghi sult worden ghesuuert voerden here uwen god van al uwen sonden.

31

Want het is die vierte van ruste: ende gi sult uwe zielen quellen met eweliken religioen.

32

Want die pape die geconsacreert sal sijn ende wies handen gheconsacreert sijn. dat hi des paepscap ghebrukich is voer sijn vader: hi sal die suueringhe doen. Ende hi sal enen linnen rock aendoen ende die heilige cleder:

33

ende hi sal die sanctuarie suueren ende die tabernakel der oercondscap ende den outaer: ende die papen ende al dat volc.

34

Ende dit sal v luden ewelijc wettich wesen dat gi bidden sult voer die kinder van israhel. ende voer al haer sonden: eenwerf binnen den iaer. Dus dede hi also die here moysen beuolen had