Bible in duytsche (Delftse bijbel 1477)

§ Ca .xv.

1

ENde die here sprac tot moysen ende aaron ende seide.

2

Spreect den kinderen van israhel: ende segt hem. Een man die gedoget dat vloyen sijns sades hi sel onsuuer sijn:

3

ende dan sal men hem vonnissen dat hi onder dit gebreck leit: als telker wilen an sinen vleysche cleeft. ende die vule verscheit daer mede wasset.

4

Elc bedde daer hij op slapen sal dat sal onsuuer sijn: ende so waer dat hi sittet.

5

So wat mensche sijn bedde ghenaket hi sal sijn cleder dwaen: ende als hi ghedwogen is mit water so sal hi onsuuer sijn totten auont.

6

Ist dat hi sit daer die gheseten hadde: so sal hi oec sijn clederen dwaen: ende als hi ghedwoghen is mit water so sal hi onsuuer sijn totten auont

7

Die sijn vleysch ghenaket hi sal sijn clederen dwaen: ende als hi ghedwoghen is mit water so sal hi onsuuer sijn totten auout.

8

Ist dat dusdanighen mensche spekel op hem werpt die suuer is so sal hi sijn cleet dwaen: ende als hij mit water ghedwoghen is soe sal hij onsuuer sijn totten auont.

9

Een cussen daer hi op gheseten heeft sal onsuuer sijn:

10

ende so wat dat onder hem wesen sal die ghedoget dat vloeyen sijns saets dat sal onsuuer sijn totten auont. So wie dat yet van desen ghedraghen heeft hi sal dwaen sijn cleet: ende als hi ghedwoghen is mit water so sal hi onsuuer sijn totten auonde.

11

Elke die ghenaken sal desen die dus ghedaen is indien dat hi sijn hande voer niet ghedwoghen heeft. hij sal sijn cleder dwaen: ende als hi ghedwoghen is mit water so sal hi onsuner sijn totten auont

12

Een aerden vat dat hij ghetast heeft dat salmen breken: mer een houten vat dat salmen dwaen mit water.

13

Wort hi ghenesen die dusdanich is. ende dese passie gedoget soe sal hi seuen dage tellen na sijnre suueringhe: ende als hi sijn cleder ende al sijn lichaem ghedwoghen heeft in leuende wateren. so sal hi suuer wesen.

14

Mer ten achsten daghe so sal hi nemen twe tortelen of twe duuen ionghen: ende hi sal in des heren aenscouwen comen ter doren vanden tabernakel der oercondscap ende hi salse den pape gheuen

15

Ende hi sal die een doden voer die sonde. ende die ander in holocauste: ende hi sal voer hem bidden voerden here dat hi mach worden ghesuuert van der vluet sijns saets.

16

Een man daer wt coemt saet sijnre naturen. hi sal al sijn lichaem dwaen mit water: ende hij sal onsuuer sijn totten auont

17

Dat cleet ende dat velle dat hi heeft die sal hi mitten water dwaen: ende hi sal onsuuer sijn totten auont.

18

Een wijf daer hi bij gheleghen heeft salmen dwaen mit water: ende si sal onsuuer sijn totten auont.

19

Een wijf die ten omkeren van der maent ghedoghet vlueyen haers bloets: men salse seuen daghe verscheiden.

20

Elc die hare ghenaken sal. hi sal onsuuer wesen totten auont:

21

ende die stede daer si in slapen sal of in sitten inden daghen haerre verscheidinghe. dat sal besmet worden.

22

Die haer bedde ghenaken sal. hi sal sijn cleder dwaen

[p. *151]

mit water: ende als hi ghedwoghen is so sal hi onsuuer wesen totten auont.

23

Elc vat daer si opsitten sal. so wie dat hem genaken sal hi sal sijn cleder dwaen: ende als hi ghedwoghen is mit water soe sal hi onsuuer sijn totten auont.

24

Ist dat een man mit haer slaept inden tide haerre maentsuueringhe soe sal hi onsuuer wesen seuen daghe: ende elc bedde daer hi in slapen sal dat sal worden besmet.

25

Een wijf die vele daghen ghedoghet vloeyen vanden bloede niet inder tijt der maentsuueringhe. of die nader maent suueringhe niet op en hout bloet te vloeyen: also langhe als si onder dese passie is soe sal si onsuuer wesen. ghelijc inder tijt der maentsuueringhe

26

Elc bedde daer si op slapen sal: ende vat daer si op sitten sal. dat sal besmet sijn.

27

Soe wie haer ghenaken sal hi sal sijn cleder dwaen: ende als hij ghedwoghen is mit water so sal hi onsuuer wesen totten auont.

28

Ist dattet bloet blijft staende ende ophout te vloeyen. so sal hi seuen daghen tellen haerre suueringhe:

29

ende inden achsten daghe so sal voer haer die pape offeren twe tortelen of twe duuen ionghen ter doren vanden tabernakel der oercondscap

30

ende hi sal die een doden voer die sonde ende die ander in holocaust: ende hi sal voer haer bidden voer den here: ende voer die vluet haerre onsuuerheit.

31

Dit suldi leren den kinderen van israhel dat sij hem wachten voer onsuuerheden: ende dat si niet en steruen in haren smetten als si besmet sullen hebben minen tabernakel: dat inden midden hem is.

32

Dit is die wet des gheens die ghedoghet dat vloeyen vanden sade. ende die besmet wort mit natuerliken sade:

33

ende die inden tide der maentsuueringhe wort verscheiden of die mit een paerliken bloede vloeyt: ende eens mans die dan mit haer te doen heeft