Bible in duytsche (Delftse bijbel 1477)

§ Ca .xiiij.

1

ENde die here sprac tot moysen ende seyde.

2

Dit is eens lazers zede alsmen suueren sal. So salmen brenghen totten paep:

3

ende hi sal tot hem wtgaen buten den tenten ende als hi gheuonden heeft dattie lazarie ghesuuert is.

4

so sal hi hem beuelen diemen suuert dat hi voer hem leuende offert twe musschen die geoorloft sijn teten: ende cedren hout. ende enen roden draet ende ysope.

5

Ende hi sal ghebieden een vanden musschen te doden bouen die leuende wateren in een aerden vat:

6

mer die ander mussche sal hi leuende binden mitten cedren hout ende mitten roden draet ende mitten ysope ende nettent inder ghedoder musschen bloet.

7

ende hi sal den ghenen diemen suueren sal daer mede seuenwerf bespringhen. dat hij na rechte worde gesuuert: ende hij sal die leuende mussche laten dat sij inden acker wech vlieghe

8

Ende als dese mensche sine clderen gedwoghen heeft soe sal hi scheren al dat haer van sinen lichaem. ende men sallen mit water dwaen. ende ghesuuert sal hij comen inden tenten: also dat hi nocht an seuen daghe bliue buten sinen huse:

9

ende ten seuenden daghe sal hi dat haer van sinen hoefde schren ende den baert ende die winbraeuwen ende al dat haer van sinen lichame. ende als hij echter ghedwoghen heeft sijn cleder ende sijn lichaem.

10

soe sal hi ten achtensten daghe mit hem nemen twe onbesmette lammeren. ende een eeniaerich scaep sonder smette ende drie thiendendeel blomen in sacrificie die besleghen sij mit olye: ende besiden een sestendeel olyen

11

Ende als die pape den mensche suuer-

[p. *148]

de hem ende al dit heeft gheset voer den here in die dore vanden tabernakel der oercontscap:

12

soe sal hi dat een lam nemen ende offerent voer die misdaet ende dat sestendeel olyen. Ende als hijt al voerden here gheoffert heeft.

13

so sal hi een lam doden daermen pleghet te doden die hostie voer die sonde ende die holocaust dat is in die heilighe stat. Want gelijc dat voer die sonde: also behoert oec voer die misdaet. die hostie den pape toe Want sij sijn heilich der heilighen.

14

Ende die paep sal nemen van der hostien bloet die ghedodet is voer die misdaet. ende hi salt leghen opt einde van des gheens rechter oer die men suuert. ende opten dumen vander rechter hant ende vander rechter voet:

15

ende hi sal in sijn luchter hant nemen dat sestendeel olyen

16

ende hi sal daer sijn rechter vingher in netten: ende hi sal daer seuen weruen mede bespreinghen teghen den here.

17

Mer datter ouer blijft vander olyen in die luchter hant. dat sal hi storten op dat einde van des gheens rechter oer diemen suuert. ende op die dumen vander rechter hant ende vander rechteren voet: ende op dat bloet dat wtghestort is voer die sonde:

18

ende op sijn hooft. Ende hi sal voer hem bidden voer den here: ende die sacrificie doen voer die sonde.

19

Ende dan sal hi doden die holocauste:

20

ende legghent inden outaer mit sijnen libamenten: ende aldus sal die mensche na die zede worden ghesuuert.

21

Mer is hi arm. ende en mach sijn hant niet vinden dat hier gheseit is. soe sal hi nemen een lam voer die misdaet ter offerhande. dat die paep voer hem bidde. ende een thiendendeel blomen bespreinghet mit olye in sacrificie. ende een sestendeel olyen.

22

ende twe tortelen of twe duuen ionghen vanden welken die een sal sijn voer die sonde. ende dander in holocauste:

23

ende hi salse offeren opten achsten dach sijnre suueringhe den paep ter doren vanden tabernakel der oercontscap voerden here.

24

Ende hi sal ontfaen dat lam voer die misdaet. ende dat sestendeel olyen ende heffent te gader op:

25

ende als hidat lam ghedodet heeft so sal hi van sijnen bloede legghen op des gheens diemen suuert rechter ore ende op den dumen van sijnre rechter hant ende van sijnen rechteren voete.

26

Mer hij sal doen in sijn luchter hant een deel vander olyen:

27

ende daer in sal hi netten sijn vingher van sijn rechter hant ende besprenghen seuenwerf ieghen den here

28

ende hi sal tasten dat eynde van sijnen rechter oer des gheens diemen suuert. ende die dumen vander rechter hant ende vanden rechteren voet: in die stat daer hi dat bloet leide dat wtghestort is voer die misdaet.

29

Mer dat ander deel vander olyen dat in die luchter hant is. dat sal hi doen op des gheens hoeft die daer ghesuuert wort datten den here ghenoghe voer hem:

30

ende een tortele of een duue ionghe

31

sal hij offeren voer die misdaet: ende dat ander in holocauste mit sijnen libamenten.

32

Dit is des lasers sacrifici diet alle niet hebben en mach tot sijnre suueringhe.

33

Ende die here sprac tot moysen ende aaron ende seide.

34

Als ghi ghecomen

[p. *149]

sult sijn int lant van chanaan. dat ic v gheuen sal in besittinghe: is dat inden huysen is die plaghe van lasarie:

35

so sal die ghene gaen dies dat huys is ende boetscappent den pape. ende segghen. mi dunct dat in mijn huys is die plaghe van lazarien.

36

Ende die paep sal beuelen dat sijt al vten huse draghen eer hi daer in coemt. om te besien oft die lazarie si: dat sij alle niet onsuuer en worden die int huys sijn. Ende daer na sal hi daer in comen om des huys lazarie te besien:

37

ende als hi besien heeft aen die wanden gelijc pocken die gelijc sijn van bleecheden of van rootheden. ende nederre dan die ander.

38

soe sal hi vter dore vanden huse gaen ende te hant sal hijt seuen daghen besluten:

39

ende ten seuenden daghe sal hi weder comen ende besient. Vint hi dat die lazarie ghewassen is.

40

so sal hi beuelen die stenen wt te werpen daer die lazarie in is: ende si sullense werpen buyten die steden in een onsuuer stat:

41

ende hi sal dat huys binnen doen scauen al om ende om. ende dat ghemul vander scauinghe sal hi werpen buten der steden in een onsuuer stat:

42

ende hi sal daer ander stenen weder doen legghen voer die wech ghedaen sijn. ende hi sal dat huys doen placken mit ander mortere.

43

Mer ist dat na dien dat die stenen wtgheworpen sijn. ende dat ghemul wtghedraghen is. ende dat huys mit ander aerden gheplagt is.

44

als die paep daer in coemt ende siet dat die lazarie wederghekeert is ende die wanden bespreinghet mit smetten: soe is een ghedurich lazari: ende een onsuuer huys

45

Ende si sullent te hant breken: ende sijn stenen ende dat hout ende al dat ghemul sullen si buyten der poorten draghen ende werpen in een onsuuer stat

46

Die int huys coemt alst besloten is hi sal onsuuer sijn totten auonde:

47

ende die daer in slaept ofte eet hi sal sijn cleder dwaen.

48

Mer als die paep daer in coemt siet hi dat die lazarie niet ghewassen en is in dat huys na dattet anderwerf gheplagt is: soe sal hijt suueren ende gheuent weder ghesont.

49

Ende in sijn suueringhe so sal hi nemen twe musschen ende cedrinen hout ende enen roden draet ende den ysope:

50

ende hi sal die een mussche doden in een aerden vat bouen leuende wateren.

51

ende hi sal nemen dat cedrinen hout. ende den ysope ende den roden draet. ende die leuende mussche. ende hij salt al netten inder ghedoder musschen bloet ende in die leuende wateren. ende hij sal dat huys seuenweruen besprenghen:

52

ende hi salt suueren beide inden bloede der ghedoder musschen ende inden leuenden wateren. ende inder leuender musschen. ende inden cedrinen houte ende inder ysopen. ende inden roden drade.

53

Ende als hij die mussche heeft laten wech vlieghen inden acker vri: soe sal hi voer dat huys bidden ende het sal na rechte ghesuuert worden.

54

Dit is die wet van alre lazarien ende quetsinghen.

55

van lazarie van clederen ende van husen.

56

van die litteiken ende van wtbrekende puysten: van lichtende smetten ende daer die verwen in menigherhande gedaente verwandelt sijn:

57

om datmen sal weten mogen

[p. *150]

te wat tiden yet suuer of onsuuer wesen sal moghen.