Bible in duytsche (Delftse bijbel 1477)

§ Ca .xiij.

[p. *145]

1

DIe here sprac tot moysen ende aaron ende seide.

2

Een mensche in wes vleysch ende huyt riset menigherhande verwe of puyste of iet dat blinckende schijnt dat is te weten die plage van lazarien: men sallen bringhen tot aaron den paep. of tot enighen van sijnen sonen.

3

Ende als hi ghesien heeft die lazarie in die huyt ende dat haer verwandelt in witte verwe. ende dat die ghedaente der lazerien nederre is dan dat ander vleysch ende huyt: dats die plage van lazarien: ende na des papen wille salmen wt wisen.

4

Mer is in die huyt blinckende withede. ende niet neder dan dat ander vleysch. ende dat haer is vander eerster verwen: so sellen die paep seuen dage besluten

5

ende inden seuenden dage sal hien besien ende en is die lazarie dan niet voert ghewassen. ende en ist ouer die eerste stede niet ghegaen in die huyt: so sal hien noch seuen ander daghe besluten:

6

ende inden seuenden daghe sal hien besien. Ende is dan die lazarie doncker ende en is si dan niet gewassen in die huyt. so sal hien suueren want het is scorftheit: ende die mensche sal dwaen sijn clederen. ende hi sal al suuer sijn.

7

Mer ist dat hi vanden pape ghesien was ende na dien eynde weder ghegheuen is der suuerheit dat die lazarie weder wasset soe salmen tot hem brenghen:

8

ende men sal hem wijsen ter onsuuerheit.

9

Ist dat in een mensche is die plaghe van lasarie so salmen bringhen totten pape. ende hi sallen besien.

10

Ende als in die huyt witte verwe is ende si des haers verwe verwandelt heeft. ende dat vleysch leuende schijnt:

11

soe salment vonnissen harde oude lazari. ende in die huyt gheboren. Ende die pape sallen ontreynen. ende en sallen niet besluten: want het is claerlic onsuuerheit.

12

Mer ist dattet ghebloeyt is die laxarie al om ende om lopende in die huyt. ende sij al dat vleysch ouerghegaen heeft vanden hoefde totten voeten. wat onder dat sien vanden oghen valt:

13

soe sallen die paep besien. ende sallen vonnissen dat hij ghehouden is: mit harde suuer lazarie. om dat sij al in witheit verwandelt is ende hier om sal die mensche suuer sijn.

14

Mer wanner dat vleische in hem leuende schijnt. dan sal hi onsuuert sijn

15

mit des papen vonuisse: ende men sallen onder die onsuuere rekenen Want leuende vleisch dat mit lazarien bestort wort: is ontsuuert.

16

Mer verwandelt si weder in witheit.

17

ende ouergaet si alle die mensche: so sallen die paep besien. ende hi sallen wijsen suuer.

18

Dat vleisch ende die huyt daer een zweer in gheresen is ende ghenesen.

19

ende inder zweren stat een litteiken is wit of onder root: men sal dien mensche bringhen totten paep:

20

ende als hi siet dat die stat vander lazarien nederre is dan dat ander vleysch. ende dattet haer wit worden is: soe sallen die paep ontreynen. Want die plaghe van der lazarien is gheresen inden zwere.

21

Mer is dat haer vander eerster verwen ende het litteiken doncker is. ende het nie nederre en is dan dat vleysch daer omtrent: so sal hien seuen daghe besluten.

22

Ende ist dat si dan ghewassen is.

[p. *146]

soe sal hien vonnissen lazare:

23

mer statet in sijn stat. so is dat litteiken vanden zwere: ende men sal den mensche suueren.

24

Dat vleysch ende die huyt die dat vuer verbrant heeft. ende ghenesen is ende heeft een wit of een root litteiken: die pape salt besien.

25

Ende siet ist verwandelt in witheit. ende die stat nederre is dan dat ander vleysch: soe sal hien onsuuer wt wisen: want int litteiken is gheresen die plaghe vander lazarie.

26

Mer en is die verwe vanden hare niet verwandelt. ende en is die plaghe niet nederre dan dat ander vleysch. ende die ghedaente van lazarie doncker is: so sal hien besluten seuen daghen:

27

ende inden seuenden daghe salmen besien Is die lazarie ghewassen in die huyt so sal hien onsuuer wtwisen:

28

mer blijft die witheit staende in haer stat niet claerghenoech. so is die wonde vanden brande. ende hier om salmen suueren: want het is dat litteiken vanden brande.

29

Een man of een wijf op wies hoeft of op wies baert die lazarie groeit:

30

die paep sallen besien. Ende is die stat nedere dan dat ander vleisch. ende dat haer bloet is. ende cleynre dant pleghet hi salse onsuuer wt gheuen: want het is die lazarie vanden hoefde ende vanden baerde.

31

Mer siet hi dat die stat vander smittinghe ghelijc is den vleysch daer neuen. ende dat haer swarte: so sal hien seuen daghe besluten:

32

ende inden seuenden daghe salmen besien Ende en is die smette niet ghewassen. ende dat haer van sijnre verwen is. ende der plaghen stat ghelijc den anderen vleische:

33

so salmen den mensche scheren sonder inder smitten stat: ende men sallen seuen ander daghe besluten.

34

Sietmen inden seuenden daghe dattie plaghe bliuet staen in haer stat. ende en is si niet nederre dan dat ander vleisch. so sal hien suueren: ende als hi sijn clederen ghedwogen heeft so sal hi suuer sijn.

35

Ende ist dat na sijnre suueringhe echter die smitte wast in die huyt.

36

so en sal hi niet meer soken weder dat haer in bleker verwen is verwandelt: want hi is openbaer onsuuer

37

Mer blijft die smitte staende. ende is dat haer swart: so sal hi weten dat die mensche ghenesen is: ende sij sullen sekerlijc ghesont wt wijsen.

38

Een man of een wijf in wies huyt die claerheit openbaert:

39

die pape sallen besien. Wort hi ghewaer dat onder die huyt scinet doncker bleecheit: so sal hi weten dattet ghene lazarie en is. mer het is een smet van witter verwen: ende die mensche is suuer.

40

Een man wt wies hoeft dat haer valt. hi is caluwe ende suuer.

41

Ende valtet haer wten voerhoefde hij is voer caluwe ende suuer

42

Mer ist dat in die voer caluheit of in die after caluheit verriset witte of rode verwe.

43

ende die paep dat siet: so sal hien wtwijsen sonder twiuel vander lazarien: die gheresen is in die caluheit.

44

So wie dat besmet is mitter lasarien. ende mit des papen wil wtghewijset is:

45

hi sal hebben onbenayde cleder ende sijn hoeft blote. ende sijnen mont mit enen clede ouerdect: ende hi sal hem seluen ropen vuyl ende besmet.

46

alle den tijt dat hi lasers is ende onsuuer so sal hi alleen wonen buyten

[p. *147]

den tenten.

47

Een wollen of een linen cleet dat die lazarie heeft

48

in werp of in weuel of watmen maect vanden vellen:

49

is die smette root of witte dier an is. so salment lazarie rekenen: ende men salt den pape tonen.

50

Ende hi salt besien ende beslutent seuen daghen:

51

ende ten seuenden daghe sal hijt besien. vint hi dattet ghewassen si: soe ist een ghedurighe lazarie:

52

ende hi sal dat cleet onsuuer wtgheuen ende al daert in gheuonden wort: ende hier om salment verbernen mitten vuer.

53

Mer siet hij dat sij niet gewassen en is.

54

so sal hijt beuelen ende sij sullen dat dwaen. daer die lazarie in is ende hi salt weder besluten seuen ander daghe.

55

Ende siet hij dat di eerste gelikenisse niet en is weder ghekeert ende nochtant die lazarie niet ghewassen en is: so sal hijt onsuuer wtwijsen ende verbernent mitten vuer: om dattet ghespreit is int bouenste vanden clede of al ouer mit lazarien.

56

Mer is die stat der lazarien doncker na dien dattet cleet ghedwoghen was: so sal hijt of scoren ende scheident vanden ghehelen.

57

Mer ist dat voertmeer in die steden die te voren onbesmet waren: openbaer lopen de ende onghestadighe lazarie so salment mitten vner verbernen

58

Mer houtse op soe sal hijse anderweruen dwaen mit water dattet suuer sij: ende het sal onbesmet sijn.

59

Dit is die wet der lazarien van wollen ende van linen clederen. ende van weuel ende van werpe. ende van allen behoef van pelsen: hoement suueren sal of besmetten