Bible in duytsche (Delftse bijbel 1477)

§ Ca .xi

1

DIe here sprac tot moysen ende aaron ende seide.

2

Segt den kindere van israhel. Wacht alle dat ic v ghescreuen hebbe: dat ic v god mach sijn. Dit sijn die beesten die ghi eten sult van alle die beesten der aerden.

3

Alle dat die claeuwe ghedeilt heeft ende edercauwet inden quicke dat suldi eten

4

Mer so wat dat edercauwet ende claeuwen heeft die niet ghedeilt en sijn. gelijc die cameel ende sijns ghelijc. dat en suldi niet eten: ende ghi sultse onder die onsuuer achten.

5

Die cyrogril die edercauwet ende en deilt die clauwen niet hi is onsuuer:

6

die hase oec edercauwet ende en deilt die claeuwe niet:

7

dat varken deylt die claeuwe ten edercauwet niet:

8

desen vleysch en suldi niet eten noch haren corre ghenaken want si sijn onsuuer:

9

dit sijn die int water sijn: ende

[p. *143]

die gheoerloft sijn teten. Alle dat vinnen ende scellen heeft beide in die zee ende in die riuieren ende in viuers dat suldi eten

10

Ende so wat dat vinnen of scellen niet en heeft van dien die int water leuen ende berueren: dat sal v te verouwaerden sijn om te vereysene. Haer vleysch en suldi niet eten:

11

ende ghi sult haer corre scuwen

12

Alle die gheene vinnen of scellen en hebben int water si sullen besmet sijn

13

Dit sijn die ghi vanden voghelen niet eten en sult. Ende si sijn v te scuwen Den aern. den grijp dat waterhoen.

14

den wuwe den ghier na sijnen gheslachte:

15

ende al dat gheslachte van den rauen in sijnre manieren:

16

den struys. den vledermuys. ende dat brant voghelkijn ende den hauic: na sijnen geslachte:

17

den vle.

18

den duker.

19

den oudeuader ende den zwane. ende die heeft eens ezels hooft den onocrotel. ende den pellicaen. Ende den herodiaen ende charadrion na sinen gheslachte: den nacht vle den opinpere.

20

Ende al van den voghelen dat op vier voeten gaet sal v te veronwaerden sijn

21

So wat dat oec gaet op vier voeten ende dat achter die been langher heeft daert mede sprinct op die aerde.

22

dat en suldi niet eten: also die breemzen sijn in haren gheslachte ende atthacus ende opiomachns. ende die spelthane: elc na sijnre maniere.

23

Want so wat inden voghelen. vieruoeten heeft dat sal v te veronwaerden sijn.

24

ende so wie haren doden corren ghenaect hi sal besmit worden. ende sal onsuuer wesen totten auont:

25

ende ist noot da hi yet van desen doot moet draghen soe sal hi sijn cleder dwaen. ende hi sal onsuuer sijn totter sonnen onderganc

26

Want elc beeste die claeuwen heeft ende diese niet en deilt. noch en edercauwet. dat sal onsuuer sijn: ende so wat dat sij ghenaect dat sal worden besmet.

27

Dat ouer sijn handen gaet van allen beesten die gaen ouer vier voeten: dat sal onsuuer sijn. Die haren doden corren ghenaect hi sal worden besmet totten auont:

28

ende die dusdanighe corre draghet hi sal sijn cleder dwaen. ende onsuuer sijn totten auont: want alle dese sijn v onsuuer.

29

Dese salmen oec rekenen onder die onsuuere van dien die berueren inder aerden: die wesel ende die muys ende die cocodrille. elc na sijn gheslacht.

30

die migale die cameleon. ende die stellio. ende die lacerta ende die mol:

31

dese sijn alle onsuuer. Die haren doden corren ghenaket hij sal onsuuer sijn ten auonde:

32

ende op so wat dat yet van haren corren valt dat sal worden besmet Beide houten vaten ende cleder ende voedersel. ende hare. ende in so wat datmen werck doet men salt dwaen mit water. ende si sullen onsuuer wesen totten auonde: ende aldus sullen si daer na worden ghesuuert.

33

Mer een aerden vat daer yet van desen in valt dat sal worden besmet: ende hier om salment breken.

34

Alle die spise die gi etet wort daer water op ghegoten. so sal sij onsuuer sijn: ende alle verscheit diemen drinct wt enighe vate sal onsuuer sijn.

35

Ende so wat vat van dusdanighen corre daer op valt die doot sijn. het sal onsuuer sijn: weder het sijn ouens. of fornaysen men salse breken. ende sij sullen onsuuer sijn

[p. *144]

36

Mer fonteinen cisternen ende putten. ende alle vergaderinge van water sal suuer sijn. Die haer dode corre ghenaket hij sal worden besmet.

37

Valtet op saet ten sals niet besmitten.

38

mer beghiet yemant dat saet mit water ende daer na dat saet wort genaket mit haren corren: soe salt te hant besmet worden

39

Sterft een beeste die v gheoerloft is teten: die haeren corre ghenaket hi sal onsuuer sijn totten auont.

40

Ende dier iet of ghegeten heeft of ghedraghen. hi sal sijn cleder dwaen ende onsuuer sijn totten auont.

41

Al dat cruupt bouen der aerden dat sal v te verondwaerden sijn: ende men en salt niet nemen in spise.

42

So wat dat mit vier voeten gaet ende cruupt ouer die borst ende vele voeten heef of dat hem seluen ouer die aerde trect dat en suldi niet eten: want het is te veronwaerden

43

En wilt uwe ziel niet besmetten: ende en ghenaect niet van dien dat ghi niet onsuuer en sijt.

44

Want ic bin die here v god. Ghi sult heilich sijn: want ic bin heilich: en besmet uwe ziele niet in ghene crupende dieren dat in die aerde wort beruert.

45

Want ic bin die here die v gheleit heb vten lande van egipten: om dat ic v god soude sijn. Ghi sult heilich sijn want ic bin heilich.

46

Dit is der beesten wet ende der voghelen ende van elker leuender ziele die beruert wort int water. ende die cruypt inder aerden:

47

om dat ghi onderscheit kennen sult tusschen suuer ende onsuuer: om dat ghi sult moghen weten wat gi eten sult ende wat ghy sult veronwaerden