Bible in duytsche (Delftse bijbel 1477)

Capittel .x.

1

NAdab ende nabiu aarons sonen namen haer wieroecuaten. ende daer deden si vuer in ende leiden daer wieroec bouen ende offerden voerden here vreemt vuer: dat hem niet beuolen en was.

2

Ende vanden here quam vuer wt ende verteerdese: ende si bleuen doot voerden here.

3

Ende moyses seide tot aaron. Dit is dat die here ghesproken heeft. Ic sal worden gheheilicht in dien die my sullen ghenaken: ende ic sal worden gheeert inden aenscouwen van alle den volke. Doe dat aaron hoerde soe sweech hi.

4

Ende moyses riep misahel ende elisaphan. oziels aarons oems sonen: ende seide tot hem. Gaet ende draghet uwe broederen vanden aenscouwen der sanctuarien: ende draechtse buyten den tenten.

5

Ende si ginghen te hant ende namense also si laghen ghecleet mit linen rocken: ende worpense daer buyten also hem beuolen was

6

Ende moyses sprac tot aaron ende eleazar ende ythamar sijn sonen. En wilt uwe hoefden niet ondecken. ende en wilt uwe clederen niet scoren. dat ghi machschien niet en sterft: ende dat op alle die vergadering gheen belghenscap en worde. Vwe broederen ende alle dat huys van israhel bewene den brant dien de here verwecte:

7

mer en gaet ghi niet vter doren vanden tabernakel anders suldi veruaren. Want die olye der heiligher saluinghe is op v. Ende si deden al na moyses ghebot

[p. *142]

8

Ende die here seide tot aaron.

9

Wijn ende al dat droncken maken mach en suldy niet drincken. du ende dijn sonen als ghy gaen sult inden tabernakel der oercondscap op dat ghi machschien niet en sterft Want het is ewelic gebod in uwen gcheslachten:

10

ende dat ghi hebben moghet const ende ondersceidenheden. tusschen heilich ende onnutte. ende tusschen besmet ende suuer:

11

ende dat ghi leren moghet den kinderen van israhel alle mijn wet die ic tot hem ghesproken heb bi moyses hant.

12

Ende moyses sprac tot aaron: ende tot eleazar ende ythamar sijn sonen. die ouerghebleuen waren. Neemt die sacrificie die ghebleuen is van des heren offerhande ende eet die sonder hefdeacht broot neuen den outaer: want het is heylich der heylighen.

13

Ghi sult eten in die heilighe stat dat dy ende dijnen sonen ghegheuen is. van des heren offerhanden: also mij beuolen is.

14

Gi sult oec eten in een harde suuer stat. du ende dijn sonen. ende dijn dochteren mitti:

15

die borst die gheoffert is. ende die scouder die verscheiden is. Want dese sijn dij ende dijn kinderen opgheleit vanden salichliken hostien der kinder van israhel: om dat si opgheheuen hebben voer den here. di borst ende die scouder ende dat vette datmen verbrant inden outaer ende om dat si te di ende te dijnen sonen behoren. mit eweliker wet: also die here beuoleu heeft

16

Hier en binnen doe moyses sochte den bock die gheoffert was voer die sonde so vant hien verbrandet: ende hi wort verbolghen op eleazar ende ythamar aarons sonen die ghebleuen waren ende hi seide.

17

Waer bij en hebdi niet ghegheten in die heilyghe stat die hostie die voer die sonde is. want si is heilich der heilighen. ende si is v ghegheuen dat ghi draghen sult der menichten quaetheit ende dat ghi voer hem bidden sult in des heren aenscouwen:

18

sonderlinghe om dat van dien bloede niet en was ghedraghen inder sanctuarie. ende ghi sout hebben ghegheten in die sanctuarie also het mij beuolen is?

19

Aaron antwoerde Huden is gheoffert voerden here victime voer die sonde ende holocaust: mer mi is ghesciet also du sies. Hoe mocht icse eten: of den here ghenoghen inden castumen mit drouer herten?

20

Doe dat moyses hoerde: soe ontfinc hi ghenoech ghedaen.