Bible in duytsche (Delftse bijbel 1477)

§ Capit .ix.

1

MEr doe die achtende dach quam so riep moyses aaron ende sijn sonen ende die de meeste van geboerte waren wt israhel:

2

ende hi seide tot aaron. Neemt vanden vee een calf voer die sonde. ende enen ram in holocauste. beide onbesmet: ende offer die voer den here:

3

ende du suls segghen totten kinderen van israhel. Brengt enen bock voer die sonde ende een calf ende een iarich lam sonder smette in holocauste:

4

ende enen osse ende enen ram voer hostien in paeyselijcheden. ende offertse voerden here: ende tot elke soe offert blome besleghen mit olye in sacrificie. Want huden sal v die here openbaren.

5

Dus brachten sij alle dat moyses gheboden had. ter doren vanden tabernakel: ende doe daer alle die menichte bi stont so seide moyses.

6

Dit is die reden die v die here beuolen heeft: doetet ende v sal sijn glorie openbaren. Ende hi seide tot aaron. Ganc ten outaer: ende offer voer dijn sonde.

7

Ende offer holocaust: ende bid voer dij ende voer tvolc. Ende als du des volcs hostie gedodet hebste. so bid voer hem: also die here gheboden heeft.

8

Ende te hant ghinc aaron ten outaer ende offerde een calf voer sijn sonde:

9

ende sijn sonen brachten hem dat bloet daer of. Ende hi stacker sijn vingher in ende taste die hoornen vanden outaer: ende die ander storte hi te sijnen voete

10

Ende dat vette ende die nyeren ende dat netken vander leuer die voer die sonde sijn. offerde hi opten outaer: also die here moysen beuolen hadde

11

Mer dat vel ende vleysch daer of verbrande hi mitten vuer buten den tenten

[p. *141]

12

Hi dode oec die victime vanden holocauste Ende sijn sonen brochten hem haer bloet ende hi stortet al om ende om den outaer.

13

Sij brochten hem oec dese hostie in stucken ghehouden mitten hoefde ende met al die leden: ende hi verbrandse al opten outaer mitten vuer.

14

Ende sij dwoghen te voren mit water die inaderen ende die voeten.

15

Ende hij offerde voer des vocls sonde. ende dode den bock:

16

ende doe hij den outaer ghasuuert hadde so dede hi die holocaust.

17

ende libamente in sacrificie. diemen daer mede offerde ende hij verbrandet al opten outaer: sonder die castume vanden morghen holocaust.

18

Hij dode oec den osse ende den ram. des volcs hostien van paeyselicheden. Ende sijn sonen brochten hem dat bloet ende hi stortet opten outaer al om ende omme:

19

ende dat vette van den osse. ende die sterte vanden ram ende die nyeren mitten vette ende dat netken vander leuer leiden si op haer borst

20

Ende doe dat vette verbrant was inden outaer:

21

so verscheide aaron haer borst ende haer rechter scouder ende hiefse op voerden here: also hi moysen beuolen hadde.

22

Ende hi stac sijn hant wtwert ten volke ende benedide hem: ende doen hi aldus voldaen had die hostien voer die sonde ende die holocaust ende die paeyselike hostien. soe quam hi neder.

23

Ende doe moyses ende aaron in die tabernakel der oercontscap ghegaen waren ende weder wtghecomen: soe benediden si dat volc Ende des heren glorie openbaerde alder menichten:

24

ende siet dat vuer quam wt vanden hemel ende verteerde die holocauste ende dat vet die opten outaer waren. Ende doe dat die scaren saghen: soe loefden si den here ende vielen op haer aensichten daer neder