Bible in duytsche (Delftse bijbel 1477)

§ Ca .viij.

1

DIe here sprac tot moysen ende seide.

2

Neem aaron mit sijnen sonen. ende haer clederen ende olie der consecracien: een calf voer die sonde. twe rammen. een korst mit deruen broden:

3

ende du suls al dat volc vergaderen ter doren vanden tabernakel.

4

Moyses dede also die here beuolen hadde ende hi vergaderde alle die menichte voerden dore des tabernakels

5

ende seide. Dit is die redene die die here gheboden heeft te doen.

6

Ende te

[p. *139]

hant so offerde hi aaron ende sijn sonen

7

Ende doe hise ghedwoghen hadde. so clede hi den biscop met enen hemde. ende gordene toe met enen gordel. ende hij dede hem den blaeuwen roc an ende dede daer bouen dat superhumerael:

8

ende hi gordet toe mit enen gordel ende setter dat rationael an daer in was leringhe ende waerheit.

9

Ende hi decte hem dat hoeft mit enen miter: ende daer bouen iegen sijn voerhoeft settede hi die gulden plate gheconsacreert in heilicheden: also hem die here beuolen hadde.

10

Ende hi nam olye der consecracien: ende daer mede saluede hi den tabernakel mit al sijn toebehoren.

11

Ende doe hi den outaer heilghende seuenwarf had besprenghet. so saluede hi en ende alle sijn vaten: ende hi heilichde dat lauoer mit sinen voete mitter olyen.

12

Ende hi storte die oly op aarons hooft: ende salueden ende consacreerden.

13

Ende doe hi sijn sonen gheoffert ende consacreert had: soe clede hise mit lijnen rocken ende gordese mit enen gordel: ende sette hem miters opt hoeft also die here beuolen had.

14

Ende hi offerde een calf voer die sonde. Ende doe aaron ende sijn sonen die handen op sijn hooft gheleit hadden.

15

so dode hijt ende sciep vanden bloede: ende hi netter sijn vingher in ende taste die hoornen vanden outaer al om ende om. Ende als hien ghesuuert had ende gheheilicht: soe storte hi dat ander bloet an sijn fundamente.

16

Mer dat vette dat ouer die inaderen was ende dat netken vander leuer ende die twe nieren mit haren vetten verbrande hi opten outaer:

17

ende hi verbarnde buten den tenten dat calf mitten velle ende vleysch ende mitten misse: als die here beuolen had.

18

Hi offerde oec enen ram in holocauste. Ende als aaron ende sijn sonen die hant op sijn hooft gheleit hadden.

19

so dode hien: ende storte sijn bloet al om ende om den outaer.

20

Ende hi hielt den ram in stucken. sijn hoeft ende sijn leden ende al dat vet verbrande hi mitten vuer:

21

mer hi dwoech die inaderen te voren ende die voeten int water. Ende hij verbrande den ram opten outaer altemael om dattet was holocaust van harden sueten roec den here: also hem die here beuolen had.

22

Ende hij offerde den anderen ram. in der papen consecracie: ende aaron ende sijn sonen leiden die handen op sijn hoeft

23

Ende doent moyses ghedoot hadde: soe nam hi van dien bloede ende taster mede dat einde van aarons rechter ore. ende den dume van sijnre rechter hant: ende van sijn rechter voet.

24

Ende hi heeft gheoffert aarons so sonen. Ende doe hi ghetast hadde een yghelijcs rechter ore mitten bloede van des gheofferden rams: ende die dumen van den rechter handen ende voeten: soe storte hi dat ander bloet al om ende om op den outaer.

25

Mer dat vette van die staert. ende al dat vet dat ouer die inaderen was: ende dat netken vander leuer ende die twe nieren mit haren vetten ende mitter rechter scouder sceide hi.

26

Ende moyses nam vteen korue mitten deruen broden die voer den here was een broot sonder hefdeach. ende enen eyerkoec besleghen mit olye ende enen deruen cooc. ende dit leide hi op dat vette ende

[p. *140]

op die rechter scouder:

27

ende hi leuerdet al te gader aaron ende sijnen sonen. Ende doe sijt gheheuen hadden voerden here:

28

soe namt moyses weder wt haren handen ende verbrandet opten outaer des holocaustes: om dattet was offerhande der consecracien ende roke van harden sueten sacrificie den here.

29

Hij nam oec die borst in sinen deele vanden ramme der consecracien ende hieffe op voerden here: also hem die here beuolen hadde.

30

Ende moyses nam salue. ende bloet dat op den outaer was ende hi bespreinghedet op aaron ende op sijn clederen: ende op sijn sonen ende op haer clederen. Ende als hijse gheheilicht had in haren clederen: so gheboet hi hem ende seide.

31

Siedet vleisch voer die dore vanden tabernakel: ende daer etet. Ende eet oec die broden der consecracien die in die korue legghen: also mi die here gheboden heeft segghende. Aaron ende sijn sonen sullent eten.

32

Mer so watter ouerbliuen sal vanden vleysche ende vanden broden. dat sal dat vuer verteren

33

Ghi en sullet oec niet gaen vter doren vanden tabernakel binnen seuen daghen voer dien dach dat voldaen sal worden die tijt van uwer consecracien. Want in seuen daghen so eindet die consecracie alsoet nv ghedaen is:

34

om dat die zede vander sacrificien sal worden voldaen.

35

Dach ende nacht suldi bliuen in die tabernakel: wachtende des heren bewaernisse dat ghi niet en sterft. Want aldus so ist mi beuolen.

36

Ende aaron ende sijnen sonen deden al dat die here sprac bi moyses hant