Bible in duytsche (Delftse bijbel 1477)

§ Ca .vij.

1

DIt is oec die wet van der hostien voer die misdaet Si is heilich der heilighen.

2

Hier om daer men dodet die holocaust: daer salmen oec doden die victime voer die misdaet Ende haer bloet storten omtrent den outaer.

3

Si sullen daer offeren die stert ende dat vette dat die inaderen ouerdect heeft:

4

die twe nieren ende die vetheit die neuen den nyeren is. ende dat net vander leuer mitten nyeren:

5

ende die paep salse verbranden opten outaer. Het is des heren brant voer die misdaet.

6

Elc man vanden paepliken gheslachte sal van desen vleysche eten in een heilighe stat: want het is ghelich der heilighen.

7

Also men die hostie offert voer die sonde: also offert men voer die misdaet. Want dese twe hostien sal een wet sijn. Ende sal behoren den pape diese offeren sal.

8

Die pape die die victime vanden holocaust offert hi sal haer vel hebben.

9

Ende alle die sacrificie van blome datmen inden ouen bact. ende watmen ghereit opten roester of in die panne van blome sal dies papen sijn. diet offert:

10

weder sij besleghen sijn mit olye of droghe sijn. Alle aarons sonen salmen effen mate deilen elken sonderlinghe.

11

Dit is die wet der hostien van paeyselicheden: die men den here offert.

12

Ist dat die offerhande wesen sal om beloefte ende danc: so sullen si offeren brode sonder hefdeach. besleghen mit olye ende derue pannekoke mit olye bestreken. ende ghebackenblome besleghen mit menghelinghe van olye:

13

ende oec ghehefdeachde broden mitter hostien van dancke diemen offert voer paeyselicheden:

14

ende van dien offert men een voer primicien den here: ende het sal des papen sijn die der hostien bloet storten sal.

15

Ende daer of salmen vleisch eten op dien seluen dach ende niet en sal bliuen tot smorghens.

16

Ist dat yemant van beloefte al willens hostien offert: men salse op dien seluen dach eten. Mer ist dat yet tot des morghens blijft: men macht eten.

17

Mer so wat die derde dach vint: dat vuer salt verbernen ende verteren.

18

Soe wie op den derden dach eten sal vleysch der hostien van paeyselijcheden: sijn offerhande sal te niet worden den ghenen diese offerde: mer meer sal alsulke ziele misdadich wesen der ouerdaet die haer mit dustanigher spisen besmetten sal

19

Dat vleysch dat iet

[p. *138]

onreins ghenaect heuet en salmen niet eten: mer men salt verbernen mitten vuer die onreyn is die sal daer of eten

20

Een besmette ziel die ghegheten heeft vanden vleysche der hostien van paeyselicheden die den here gheoffert is. si sal veruaren van haren volke:

21

ende die ghetast heeft eens mensche of eens beesten onsuuerheit of enich dinc dat besmetten mach. ende etet van dustanighen vleysche: si sal veruaren van haren volke.

22

Ende die here sprac tot moysen ende seide.

23

Spreect den kinderen van israhel. Ghi en sult niet eten vette van coeyen. noch van scapen. noch van gheyten.

24

Mer ghi sult hebben in alre handen oerbaer: dat vette vanden ghestoruen corre ende vander beesten die ghedoot is van een ander beeste.

25

So wie eten sal dat vette datmen sculdich is te offeren in des heren brande: hi sal vervuaren van sijnen volke.

26

Dat bloet van gheenre beesten en suldi oec nemen te spise: beide van voghelen ende van quicken.

27

So wat ziel dat bloet eten sal: sal veruaren van haren volke.

28

Ende die here sprac tot moysen ende seide.

29

spreket den kinderen van israhel zeggende. Die den here offert victime van paeyselicheden:

30

hi sal daer mede offeren sacrificie dat is sijn libamenten. Hi sal in die hande houden die hostien vette: ende die borst Ende als hijse beide offerde ende den here heeft gheconsacreert soe sal hijse den paep leueren:

31

ende hi sal dat vette verbarnen opten outaer: mer die borst sal aarons sijn ende sijnre sonen.

32

Ende oec sal hi in des papen voerdel vallen vander hostien der paeyselijcheden die rechter scouder.

33

So wie van aarons sonen die offeren sal tbloet ende dat vette: hij sal hebben te sijnen deel die rechter scouder.

34

Want ic heb ontfanghen vanden kinderen van israhel van haren paeyselicheden hostien die borst der opheffinghe ende die scouder der offscheidinghe: ende ic hebse ghegheuen aaron den pape. ende sijn sonen in ewelike wet van alden volc van israhel.

35

Dit is aarons consecracie ende sijnre sonen in des heren oefeninghen. inden daghe datse moyses offerde dat si paepscap ghebrukich souden worden:

36

ende dat hem die here gheboet te gheuen vanden kinderen van israhel met eweliker religioen: in haren gheslachten.

37

Dit is die wet vanden holocaust ende vander sacrificien voer die sonde ende voer die misdaet: ende voer die consecracie ende voer die victimen. der paeyselicheden

38

die die here moysen. beual opten berch synai: doe hi der kinder van israhel ontboet inder wildernissen van synai: dat si den here haer offerhanden offeren souden