Bible in duytsche (Delftse bijbel 1477)

§ Ca .vi

1

ENde die here sprac tot moysen ende seide.

2

Een ziel die sondicht. ende den here versmaet ende lochent sijnen naesten sijn pandt die gheloeft was sijnre trouwen. of die met crachte heuet ontdwonghen. of onrecht ghedaen

3

of die geuonden heeft enich dinc dat verloren was ende des misdadich is ende daren bouen voer sweert. of enich ander dinc ghedaen heuet van velen daer die menschen in pleghen te sondighen:

[p. *136]

4

wort hi verwonnen vander misdaet hi sal al heel weder gheuen den here dien si die scade ghedaen heeft al dat si bi loesheden wilden onthouden:

5

ende hier en bouen sal sier dat vijfte deel toe doen.

6

Mer voer haer sonde sal si offeren enen ombesmetten ram vanden cudde: ende si sullen den pape gheuen na die mate ende dat micken vander misdaet:

7

ende hi sal voer haer bidden voerden here. ende het sal haer verlaten worden voer elc dat sij doet daer sij in sondighet.

8

Die here sprac tot moysen. ende seide

9

Beuele aaron ende sijn sonen Dit is die wet vanden holocauste. Men salt verbernen inden outaer alle den nacht tot smorghens. Ende dat vuer sal vten seluen outaer sijn.

10

Ende een paep sal aen doen een roc. ende die linen broec. ende hi sal die asschen wtdoen die dat verbarnde vuer verteert heeft. ende hi salse setten neuen den outaer.

11

ende hi sal die eerste cleder wt doen: ende hi sal ander cleder aendoen ende draghense buten den tenten: ende hi salse in een harde suuer stat doen ende verbarnen te assche.

12

Want dat vuer sal altoes inden outaer barnen ende alle daghe sal die paep dat voeden. smorghens hout onderstekende: ende hi sal daer die holocaust bouen legghen. ende verbarnen dat vette vanden paeyseliken hostien.

13

Dit vuer sal eweliken wesen: ende en sal nemmermeer ghebreken inden outaer.

14

Dit is die wet vanden sacrificie ende libamenten die aarons sonen souden offeren voerden here ende voerden outare.

15

Die paep sal nemen een hantuol van blome die besleghen of ghekneden is mit olye. ende alle den wieroec. die op die blome gheleit is: ende hi sal dat verbranden inden outaer in een ghedenckenisse van harden sueten roke den here.

16

Mer dat ander deel vander blomen sal eten aaron mit sijnen sonen sonder hefdeach: ende hi salt eten in een stat vander sanctuarien des tabernakels.

17

Want hier om en salment niet hefdeachghen: om datmen een deel daer of offert in des heren brande. Het sal sijn heilich der heilighen: als voer die sonde ende misdaet

18

Die mannen van aarons gheslachte. sullen allene dat eten. Dit sal wettelijc ende ewelijc wesen in uwen gheslachte van des heren sacrificien. Soe wie hem ghenaken sal hi sal worden gheheilicht.

19

Ende die here sprac tot moysen ende seide.

20

Dit is aarons ende sijnre sonen offerhande die si den here sullen offeren inden daghe haerre saluinghe. Si sullen offeren een thiendendeel blomen van ephi in die ewelike sacrificie Ende die een helft smorghens ende die ander helft des auonts:

21

ende men salse beslaen mit olye ende backense in die panne.

22

Ende die pape die naden vader volghen sal hi salse offeren al werme den here in roke der sueticheit: ende men salse al verbranden inden outaer.

23

Want der papen sacrificie salmen al verbarnen: ende niemant en sal daer of eten.

24

Ende die here sprac tot moysen. ende seide.

25

Spreect aaron ende sijnen sonen. Dit is die wet van der hostien voer die sonde. In die stat daermen die holocaust offert. daer sal mense doden voer den here. Het is hei-

[p. *137]

lich der heilighen.

26

Die paep diese offert hi salse eten in een heilich stat. inden vrijthoue vanden tabernakel.

27

So wat sijn vleysch ghenaket dat sal gheheilicht worden. Wort een cleet mit haren bloede besprenct so salment dwaen in die heilighe stat.

28

Ende een aerden vat daermense in ziedet salmen breken: mer ist een coperen vat so salment scuren: ende dwaent mit water.

29

Elc man vanden paepliken gheslachte sal van dien vleysch eten: want het is heilich der heilighen.

30

Want die hostie diemen houdet voer die sonde. daermen dat bloet of draghet inden tabernakel der oercontscap om te suueren in die sanctuarie die en salmen niet eten: mer men sallse verbarne mittenn vuer.