Bible in duytsche (Delftse bijbel 1477)

§ Capittel .v.

1

SOndicht een ziele ende heeft hij ghehoert den stemme eens die zwoir. ende des hi is oerconde dat hijt sach of wiste ende en seit hijs niet. soe sal hi haer quaetheit draghen.

2

Een ziel die tast yet onsuuers. of dat doot is van eenre beesten. of bi hem seluen doot is. of enich ander crupende dier ende verghet hare onsuuerheit. so sal sijs misdadich sijn ende sij misdoet:

3

ende tast si iet van des menschen onsuuerheit. na al-

[p. *135]

der onreinicheit daermen mede pleghet worden besmet ende sijs vergeet ende daer na bekent: so sal si der sonden sculdich sijn.

4

Een ziel die ghezworen heeft ende wt haer lippen heeft laten gaen dat hy iet quaets of guets doen soude ende heeft hi dat mit ede versekert ende mit woerden.

5

ende verghet sijs ende verstaet si daer na haer sonde: si sal penitenci doen voer haer sonde.

6

ende si sal offeren een lam of een gheyt vanden cudden: ende die paep sal voer haer sonde bidden ende voer haer.

7

Mer en mach sij gheen quicke offeren. so sal si offeren twe tortelen of twe duuen ionghen den here: die een voer die sonde. die ander in holocaust:

8

ende si salse den pape gheuen Ende hi sal die eerste offeren voer die sonde ende hi sal haer hoeft wringhen ten vloghelen waert. also dattet anden hals bliue hanghende ende dat hijs al met allen niet of en trec:

9

ende mitten bluede sal hi besprenghen die want vanden ontaer. Ende soe wat bloet datter ouer blijft salmen doen drupen ten fundament vanden outaer: want het is voer die sonde.

10

Ende die ander duue sal hi verbranden inden holocaust alsmen pleghet: ende die pape sal voer hem ende voer sijn sonde bidden: ende si sal hem worden verlaten.

11

Ende en vermach sijn hant niet te offeren twe tortelen. of twe duuen ionghen: so sal hi offeren voer die sonde een thiende deel van ephi blomen. Si en sal daer gheen oli in doen noch gheen wieroec op legghen: want het is voer die sonde:

12

ende si salt den pape leueren: ende hi sal daer een hantuol of sceppen ende verbernent opten outaer in des gheens ghedenckenisse diet offerde.

13

ende bidden voer hem ende suueren: ende dat ander deel sal hi in ghiften hebben.

14

Endedie here sprac tot moysen ende seide.

15

Een ziel ist dat si die oefeninghen breect ende si sondicht inden dinghen die gode gheheilicht sijn bi roekeloesheden. sij sal voer voer haer misdaet offeren enen onbesmetten ram vanden cudden. diemen copen mach om twe cicle na ghewichte vander sanctuarie:

16

ende hi sal die scade wederkeren die hi ghedaen heuet. ende hi sal daer dat een vijftendeel op leggen ende leuerentden pape: ende hi sal voer hem bidden den ram offerende. ende het sal hem worden verlaten.

17

Ende ist dat een ziel sondicht in roekeloesheden ende si een dinc doet dat in des heren wet verboden is ende verstaet si haer quaetheit dat sij haer sonde sculdich is:

18

si sal enen onbesmetten ram vanden cudden offeren den pape na die mate ende dat micken vander sonde: ende hi sal voer haer bidden om dat si onwetende dede:

19

ende het sal haer woerden verlaten: want si misdede inden here bi onwetenhede