Bible in duytsche (Delftse bijbel 1477)

§ Capit .iiij

1

DIe here sprac tot moysen ende seide

2

Spreket den kinderen van israhel. Een ziel die ghesondicheit heeft bi onwetentheden. ende van des heren gheboden die hi gheboden heeft datmen niet en soude doen yet heeft ghedaen:

3

ist een paep die ghesaluet is die ghesondicht heeft. ende doet hi dat volc misdoen: so sal hi voer sijn sonde offeren een onbesmet calf den here.

4

Ende hi salt brenghen ter dore vanden tabernakel der oercondscap. voerden here: ende hi sal sijn hant op sijn hoeft legghen: ende hi salt den here offeren.

5

Ende hi sal sceppen van des calfs bloede: ende draghent in die tabernakel der oercondscap

6

Ende als hi sijn vingher heuet ghenet int bloet. so sal hi hem seuenweruen bespreinghen voer den here: ieghen die gordine vander sanctuarien.

7

Ende sal van dien seluen bloede legghen op die hoornen vanden outaer des thimiamatis die den here harde bequaem is: dat is inden tabernakel der oercondscap Mer al dat ander bloet sal hi storten ten voete vanden outaer des holocaustes. voer den inganc vanden tabernakel.

8

Ende hi sal des calfs vette offeren voer die sonde: beide dat ouer die inaderen is. ende al datter binnen is.

9

die twe nieren ende dat netken dat vette vander leuer mitter nieren.

10

also men offert vanden calue der hostien van payselicheden: ende hi salt verbranden opten outaer des holocausts.

11

Mer dat vel ende alle dat vleysche. mitten hoefde ende voeten ende mitten inaderen ende mitten misse

12

ende mit alle den anderen lichame. sal hi draghen buyten den tenten in een suuer stat daermen die assche in pleghet te storten: ende daer sal hijt al verbranden op enen hoop houtes: ende dat salmen verbranden daermen die assche wt stortet

13

Ende ist dat al die scaren van israhel verrokeloest hebben. ende bi ongheleertheden hebben ghedaen dat teghen des heren gebot is. ende si daer na hare sonde verstaen:

14

so sullen si offeren een calf voer die sonde. Ende si sullent brenghen ter dore vanden tabernakel:

15

ende die ouders vanden volke sullen die handen legghen. op sijn hoeft voerden here. Ende als dat calf gedodet is in des heren aenscouwen.

16

soe sal een paep die ghesaluet is draghen van sijnen bloede in die tabernakel der oercondscap:

17

ende hij sal sijn vnigher daer in netten. ende besprenghent seuen warf ieghen die gordine.

18

Ende hi sal van dien seluen bloede legghen op die hoernen vanden outaer des holocaustes: die voer den here is inden tabernakel der oercontscap Mer dat ander bloet sal hi stortten neuen den voete van den outaer des holocaustes: die inder doren is vanden taberna-

[p. *134]

kel der oercondscap.

19

Ende hi sal nemen al sijn vette. ende verbrandent opten outaere.

20

ende hi sal doen mit desen calue also hi eerst dede: ende als die pape voer hem bidt soe sal die here hem goedertieren sijn.

21

Mer dat calf sal hi draghen buten den tenten ende verbarnent also hi dat eerste calf dede: want dat voir der menichten sonden is.

22

Ist dat een prince heuet ghesondicht ende heeft hi bij onwetenheden ghedaen een dinc van velen dat in des heren wet verboden is ende hij daer na sijn sonde verstaet:

23

soe sal hi den here offeren een hostie een onbesmet bock van gheiten:

24

ende hi sal sijn hant legghen op sijn hoeft. Ende als hien geoffert heeft in die stat daermen die holocaust pleghet te doden voer den here. om dattet voer die sonden is:

25

so sal die paep netten sijn vingher in der hostien bloet voer die sonde. ende tasten daer mede die hoornen vanden outaer des holocaustes. ende dat ander sal hi storten tot sijn voete:

26

mer dat vette sal hi opten outaer verbarnen alsmen pleghet te doen van hostien van paeyselicheden. Ende die paep sal bidden voer hem ende voer sijn sonde: ende si sal hem worden verlaten.

27

Ist dat een ziel van den volke vanden lande heuet ghesondicht bi onwetenheit soe dat hi doet yet van dien die in des heren wet verboden sijn. ende hi misdoet.

28

ende bekent hi sijn sonden. so sal hi offeren een onbesmette gheit:

29

ende hi sal die hant legghen opter hostien hooft die voer die sonde is: ende hi salse offeren in die stat des holocaustes.

30

Ende die paep sal nemen van den bloede an sijnen vingher: ende hi sal tasten die hoornen vanden outaer des holocaustes. ende dat ander bloet sal hi storten te sinen voet.

31

Ende hi sal daer of nemen al dat vette also men te nemen pleghet vanden victimen van paeyselicheden: ende hi salt verbranden opten outaer in roke der sueticheden den here: ende hi sal daer voer bidden: ende het sal haer verlaten worden.

32

Mer offert hij van quicke voer die sonde die victime dat is te weten een ombesmit scaep:

33

so sal hi die hant op sijn hoeft leggen: ende offerent in die stat darmen pleghet te slaen die hostien van holocaust

34

Ende die paep sal nemen vanden bloede aen sijn vingher: ende sal daer mede tasten die hoornen vanden outaer des holocaustes. ende dat ander bloet sal hi storten te sinen voete.

35

Ende hi sal al dat vette daer of nemen. also men dat vet pleghet te nemen vanden rammen diemen offert voer paeyselijcheit. ende hy salt verbranden opten outaer in des heren brande: ende hi sal voer hem ende voer sijn sonde bidden: ende het sal hem verlaten worden