Bible in duytsche (Delftse bijbel 1477)

§ Capittel .iij.

1

IS sijn offerhande hostie van paeyselijchede. ende wil hi offeren ossen. so sal hi offeren voer den here een mannekijn of een wijfken onbesmet.

2

Ende hi sal sijn hant legghen op sijnre victimen hoeft: ende men salse doden inden inganc vanden tabernakel der oercontscap. Ende aarons des papen sonen sullen sijn bloet stortten al om ende om den outaer:

3

ende si sullen offeren vanden hostien der paeyselijcheden den here in offerhande dat vette dat ouer die inaderen is. ende al dat vette datter binnen is.

4

die twe nieren mitten vette daer die nyeren mede ghedect sijn. ende dat netken vander leueren ende mitten nyeren

5

ende si sullent verbranden opten outaer in holocaust ende dat vuer onder dat hout steken in offerhande van alte sueten roke den here.

6

Mer ist dat sijn offerhande is van scapen. ende die hostie van paeyselijcheden: weder hi offert een manneken of een wijfken: si sullen sijn alle onbesmet.

7

Offert hi een lam voer den here.

8

soe sal hi sijn hant op sijnre victimen hoeft houden: ende men salse doden voer den inganc van den tabernakel der oercontscap. Ende aarons sonen sullen sijn bluet storten al om ende om den outaer:

9

ende si sullen offeren vander hostien der paeyselijcheit den here sacrificie dat ruete ende alle den stert mitten nyeren ende die vetheitt die den buyc ouerdect heeft ende al die inaderen.

10

ende beide die nyeren mitten vette dat neuen die nieren is. ende dat net vander leueren mitten nieren:

11

ende die paep salse verbernen opten outaer in voetsele des vuers ende van des heren offerhande.

12

Ist een gheite sijn offerhande. ende offert hijse den here:

13

soe sal hi sijn hant legghen op sijn hoeft: ende hi sallen doden inden inganc vanden tabernakel der oercontscap Ende aarons sonen sullen haer bloet stortten al om ende om den outaer:

14

ende si sullen daer of nemen een voetsel van des heren vuer. dat vette

[p. *133]

dat den buyc ouerdect heeft. ende dat alle die inaderen dect.

15

beide die nieren mitten vette dat neuen die nieren is. ende dat netken vander leuer mitten nyeren:

16

ende die paep salse verbernen opten outaer. inden voetsele des viers ende den herden sueten rooc den here.

17

Alle vette sal des heren sijn in eweliken rechte in uwen gheslachten ende in al uwen woninghen: ende ghi en sult al met allen niet eten tvette noch bloet