Bible in duytsche (Delftse bijbel 1477)

§ Capittel .ij.

1

EEn ziele die offeren sal den here offerhande van sacrificie: bloem van meel sal sijn haer offerhande. Ende sij sal daer olie op stortten ende legghen daer wieroec op:

2

ende si salt draghen tot aarons des papen sonen. Ende een van hem luden sal nemen een hantuol vander blomen ende vander olye ende alle den wieroec: ende hi sal dat herdeincken legghen opten outaer. in herden sueten roke den here.

3

Mer datter ouerblijft vander sacrificien dat sal aarons sijn. ende sijnre sonen heilich der heilighen den here vander offerhanden.

4

Ende alstu suls offeren sacrificie ghebacken inden ouen van blomen. dat is te weten brode sonder hefdeech ghekneden ende besleghen mit olie. ende vladen sonder ghist mit olye bestreken:

5

sal dijn offerhande sijn wt eenre pannen. van blomen ghekneden mit olie sonder hefdeech

6

so sulstuut in cleynen sticken breken. ende storten daer op olie.

7

mer sal die sacrificie sijn van enen roester: so salmen oec die blome mit olye kneden:

8

ende als du dit den here offers. so sulstuut leueren in des papen hant. Ende als hi dat gheoffert heeft. so sal hi vander sacrificien nemen dat herdeincken:

9

ende verbernent

[p. *132]

opten outaer inden roec der sueticheit den here

10

Mer so wat datter ouer blijft sal aarons sijn ende sijnre sonen: heilich der helighen van des heren offerhanden.

11

Alle die offerhande diemen den here offert salmen doen sonder hefdeach. ende men sal niet ghehefdeach noch ghehonicht verbranden in des heren sacrificie.

12

Allene suldi offeren die primicien daer of ende ghiften: mer men en salse niet legghen opten outaer in roke der sueticheit.

13

Soe wat sacrificie du offeren suls. du sulstese menghen mit soute: ende du en sulste niet oftrecken van dijnre sacrificien dat sout der beloeften des heren dijns godes. In allen sacrificien sulstu sout offeren.

14

Mer ist dattu offeren suls ghiften den here dat eerste van dinen vruchten. van aderen die noch groeyen: soe sulstuse sengen biden vuer. ende brekense ontween in gelike van mele. Ende aldus sulstu den here dijn primicien offeren:

15

ende du sulster oly op ghieten ende wieroec op legghen want het is des heren offerhande.

16

ende hier of sal die paep verbernen in herdeincken der ghiften een deel vanden ghebroken meel. ende vander olyen. ende al den wieroec