Bible in duytsche (Delftse bijbel 1477)

§ Capittel .I.

1

ENde die here riep moysen: vanden tabernakel der oercontscap ende seide hem.

2

Spreket den kinderen van israhel: ende du sulste tot hem segghen. Een mensche van v luden die den here offert ene offerhande. ende offert ene victime van quicke dat is van ossen of van scapen:

3

ist dat sijn offerhande holocaust sijn sal ende vanden vee: soe sal hi offeren ter doren vanden tabernakel der oerkontscap een onbesmet mannekijn. om hem den here ghenoechlijc te maken.

4

Ende hi sal die handen legghen op sijn hostien hoeft: ende hi sel ghenoechlijc sijn: ende profitelijc in suueringhe.

5

Ende hi sal dat calf doden voer den here

[p. *131]

ende aarons des papen sonen sullen sijn bloet offeren. ende storten al om ende om den outaer. dat is voer die doer vanden tabernakel.

6

Ende si sullent velle oftrecken vander offerhande. ende houden die leden in sticken:

7

ende si sullen dat vuer ondersteken inden outaer. mer daer voer sullen si daer in legghen een hoop houts

8

ende daer bouen sullen si legghen die leden die ghehouwen sijn. dat is te weten dat hoeft ende al dat an die leuer hanghet.

9

mer die binnenste ende die voeten sullen si dwaen mit water: ende die paep salt verbernen opten outaer in holocauste ende in sueten roke den here

10

Ende is die offerhande van quicke van scapen of van gheyten holocauste: soe sal hi offeren een eeniarich lam ende sonder smette:

11

ende hi sal doden inder zide vanden outaer die ten noorden waert scouwet. voer den here. Ende aarons des papen sonen sullen storten sijn bloet opten outaer. al om ende om:

12

ende si sullen die leden deilen. dat hoeft ende alle dat an die leuer hanghet: ende si sullen legghen opt hout daer men dat vuer onder steken sal.

13

Mer die inaderen ende die voeten sullen si dwaen mit water ende alst al gheoffert is so salt die paep verbernen opten outare in holocauste ende harden sueten roke den here.

14

Mer waer die offerhande des holocaustes van voghelen van tortelen of van duuen ionghen:

15

so salse die paep offeren ten outaer. ende hi sal dat hoeft ten halse trecken ende scoren een wonde ende tsal bloet doen loepen opten cant vanden outaer:

16

mer die croppe vanden strote ende die plumen. sal hi werpen ten oestzide vanden outaer In die stat daermen die asschen in pleghet wt te storten.

17

Ende hi sal die vloghelen breken. ende hi en salse niet sniden: noch mit yser deylen: ende hi salse verbernen opten outaer. ende steken dat vuer onder dat houte. Dit is holocaust ende offerhande van harden sueten roke den here.