Bible in duytsche (Delftse bijbel 1477)

§ Capittel .xxxix.

1

VAn zide blaeu ende root gheel ende tweewerf gheuerwet ende van linen so makede hi clederen. die aendoen soude aaron. als hi diende inden heilighen also die here moyses beual.

2

Hier om maecte hi een superhumerael van goude ende van zide blaeu root ende gheel twewerf gheuerwet ende van linen: ende van menigherhande werck.

3

Ende hij sneet gulden folien: ende dundese in draden dat mense mochte draeyen mitten webbe vanden eersten verwen:

4

ende hi maecte twe lijsten die te gader quamen ten eynde in beide die ziden.

5

ende een gordel van desen seluen verwen: also die here moyses beuolen hadde

6

Hij bereyde oec twe onichen stenen.

[p. *128]

besleghen ende besloten in goude: ende ghegroueert alsmen pleghet te grauen mitten namen der kinder van israhel Ses namen in den enen steen. ende ses in die ander: na ordinancie van haerre gheboerten.

7

Ende hi settese inden ziden vanden superhumerael. in herdencken der kinder van israhel: also die here moysen beuolen had.

8

Hi maecte oec mitten werck vander naelden een racionael naden werc vanden superhumerael van goude ende van ziden blaeu root ende gheel ende twewerf gheuerwet van linen:

9

viercant. ende dubbelt vander maten eenre hantbreet:

10

ende daer in sette hi vier ordinancien van stenen.

11

Int eerste vaers was sardius. ende thopasius. ende smaragdus: int ander carbcunnlus saphirus ende iaspis:

12

int derde ligurius. achates ende ametistus:

13

int veierde crisolitus. onichinus. ende berillus: dese waren omsloten ende omleit mit goude na haren ordinancien.

14

Ende dese twaelf stenen waren ghegrauen mitten namen der twaelf gheslachten der kinder van israhel: dat is elken steen had enen name

15

Si maecten inden rationael kethene van finen goude die aen een hinghen:

16

ende twe haecskens. ende also vele guldene ringhen. Oec setten sij ringhen in elke zide vanden rationael daer twe gulden kethenen wthinghen:

17

die si hechten inden haecskens die bouen in den hoernen stonden an dat superhumerael.

18

Dese vergaderden hem voer ende achter: datmen dat superhumerael ende dat rationael daer mede te gader hechten

19

an dat gordel nauwe te gader ghedwonghen. ende noch starcker te gader gheuoghet mitten ringhen. dien si te gader bonden mit enen blaeuwen webbe dat sij niet sloppelijc riden en souden. ende dat die een vanden anderen niet en souden scheiden: also die here moysen beual.

20

Si maecten oec den roc vanden superhumerael. al blaeuwe.

21

ende enen caproen ieghen die middewert bouen. ende si maecten enen zoom al om ende om den caproen geweuen:

22

ende si maecten beneden aen die voeten appelen garnaten ende zide blaeu root ende geel ende twewerf gheuerwet ende van ghesponnen vlas:

23

ende bellekens van alte finen goude. die si setten tusschen die appele van garnate beneden anden some al om ende om den roc: na elc gulden bellekijn een appele van garnate:

24

ende mit desen dinghen dus verciert ghinc die bisscop in. als hi sijns dienstes. plach te gebruken: also die here moysen beual.

25

Si maecten oec witte linen rocken mit gheweuenen wercke aaron ende sinen sonen

26

ende miters mit haren cronen van linen laken:

27

ende oec die broken van witten linen laken:

28

met dat gordel van ghesponnen vlas: ende van zide blaeu. root ende gheel. ende twewerf gheuerwet mit menigherhande werck. also die here moysen beual.

29

Si maecten oec die platen der heiligher eerwaerdicheits van alte finen goude: ende si screuen daer in also men steen pleghet te groueren dat heilighe des heren:

30

ende si an dwonghense mitten blaeuwen miter. also die here moysen beuolen had

31

Dus was volmaect alle dat werc

[p. *129]

vanden tabernakel. ende vanden dake der oercontscap. Ende die kinder van israhel deden al dat die here beuolen had moysen:

32

ende si offerden den tabernakel. ende al sijn dac ende sijn huysraet: die ringhen. die tafelen. die grendels. die colummen. die voeten.

33

ende dat ouerdecsel vanden gheroden weders vellen. ende een ander ouerdecsel van blaeuwen vellen: die gordine.

34

die arcke. die grendels. die propiciatorie.

35

die tafele mit haren vaten. ende mitten broden der proposicien.

36

die candelaer. die lichtuaten. ende haer toebehoeren mit olie.

37

den gulden outaer ende die salue. die thimiama van specien.

38

ende die tente inden inganc van den tabernakel.

39

den coperen outaer. den roester. die grendels. ende alle sijn vaten: dat lauoer mit sijnen voete. die tenten vanden vrijthoue. ende die colummen mit haren voeten:

40

die tenten inden inganc vanden vrijthoue. ende sijn coerden ende die stecken. Ende niet en ghebracker vanden vaten: die gheboden waren te maken in den dienst des tabernakels ende inden dake der beloften.

41

Ende die heilighe clederen die die papen besichden in die sanctuarie. dat is te weten aaron ende sijn sonen.

42

offerden die kinder van israhel: also die here beuolen had.

43

Ende doe moyses alle dese dinghen volmaect sach: so ghebenedide hi hem