Bible in duytsche (Delftse bijbel 1477)

§ Capittel .xl.

1

DIe here sprac tot moysen ende seide.

2

In die eerste maent op den eersten dach vander maent so sulstu die tabernakel der oercontscap rechten:

3

ende du sulster die arke in setten.

4

ende du sulster die gordine voer hanghen: ende du sulster die tafele in brenghen. ende legghen daer op dat gheboden is naden zeden. Die candelaer sal staen mit sijnen lichtuaten.

5

Ende dat gulden outaer daer men die wieroec op barne t: voer die arke der oercontscappe. Du suls setten die tente inden inganc vanden tabernakel

6

ende voer dat sulstu setten den outaer des holocaustes.

7

Ende dat lauoer sulstu setten tusschen den outaer ende den tabernakel:

8

ende dat sulstu vol waters doen. Ende du sulste dat vrijthof omhanghen mit sijnen tenten: ende sijnen ingac.

9

Ende du suls nemen olye der saluinghe. ende du sulste saluen den tabernakel mit sijnen vaten dat si worden gheheilicht:

10

du suls saluen den outaer des holocaustes ende alle sine vaten:

11

dat lauoer mit sijnen voete. Du sulste al wien mitter olien der consecracien: dat si sijn heilich der heilighen.

12

Ende du sulste doen comen ten doren vanden tabernakel der oercontscap aaron ende sijn sonen: ende als si ghedwoghen sijn met water

13

soe sulstuse cleden mitten heilighen clederen. dat sij mij dienen: ende dat haer saluinghe profitelijc worde in eweliker paepscap.

14

Ende moyses dede al dat die here beuolen had.

15

Dus wort gherecht die tabernakel. in die eerste maent: vanden anderen iaer. in den eersten daghe vander maent.

16

Ende moyses rechtet ende sette die tafelen. ende die voeten ende die grendels:

17

ende hi sette die colummen. ende hij spreide dat dac bouen die tabernacule. ende hi leide daer bouen dat ouerdecsel: al-

[p. *130]

so die here beuolen had.

18

Ende hi leide die oercontscap in die arcke. ende dede onder die grendels daer in: ende hi leide die oracule bouen.

19

Ende doen hi die arke ghebrocht had inden tabernakel der oorcontscap: soe hinc hij die gordine daer voer om dat hi des heren ghebot voldoen soude.

20

Ende hij sette die tafele inden tabernakel der oercontscap ter noort zide buyten die gordine:

21

ende hi leider op die broden der proposicien: also die here moysen beuolen had.

22

Hi sette oec den candelaer inden tabernakel der oercontscap ieghen die tafele. in die zwtzide:

23

ende hi sette die lichtuaten in haren ordinancien na des heren ghebot.

24

Hi sette oec den gulden outaer onder den dake der oercontscap. ieghen die gordinen:

25

ende hi verbrande daer op wyeroec van specien: also die here moysen beuolen had.

26

Hi sette oec die tente inden inganc vanden taberbakel der oorcontscap.

27

ende den outaer des holocaustes in die west zide der oercontscap: ende hi offerde daer in holocauste ende sacrificien also die here beuolen had

28

Ende dat lauoer sette hij tusschen den outaer ende den tabernakel der oercontscap ende dedet vol waters:

29

ende moyses ende aaron ende sijn sonen dwoghen daer in haer handen ende haer voeten.

30

als sij gaen souden binnen den dake der beloeften. ende si ten outaer souden gaen: also die here beuolen had moysi

31

Hi rechte oec dat vrijthof al om ende om den tabernakel ende den outaer: ende hinc daer al om ende om een tente.

32

Na dien dattet al voldaen was soe ouerdecte den tabernakel der oercontscap een wolke: ende die glorie des heren veruoldet.

33

Ende moyses en mochte niet gaen binnen den dake der beloeften: want een wolck had al ouerdect. ende des heren moghentheit blicte daer: want die wolc had al ouerdect.

34

Wanneer die wolc den tabernakel liet: so tiden die kinder van israhel wech. mit haren scaren.

35

Bleef si daer bouen hanghende: soe bleuen si in die selue stat.

36

Want des daghes so was des heren wolke bouen die tabernakel. ende een vuer des nachtes: daert die kinder van israhel saghen van alle haer woninghe.

§ Hier endet exodus