Bible in duytsche (Delftse bijbel 1477)

§ Ca .xxxviij.

1

SI maecte oec van houte van sethim den outaer des holocaustes: viercant vijf cubitus wijt. ende iij cubitus hoech:

2

ende sijn hoernen quamen wt sijn hoken: ende hi ouerdecten mit coperen platen.

3

Ende hi bereide te sijnre behoeften menigherhande vaten van coper. potten. tanghen. crauwels haken ende vuervaten.

4

Ende hi maecte sinen roester coperen als een nette ghemaect is: ende onder den roester in die middewaert vanden outaer den haert

5

ende hi goet vier ringhen telken hoeke vanden roester een rijng: om die grendelen daer in te steken ende den outaer daer mede te draghen.

6

Ende die grendelen maecte hi van houte van sethim: ende hi dectese mit coperen platen:

7

ende hi stacse in die ringhen die stonden in die ziden vanden outaer. Mer dien outaer en was niet gheheel. mer hol. van tafelen ghemaect: ende binnen ydel

8

Hi maecte oec een coperen lauoer mit sijnen voete: vander wiuen spieghelen die laghen in die dore vanden tabernakel.

9

Ende hi maecte dat vrijthof. in welcs zwtzide waren tenten van linen laken hondert cubitus lanc:

10

ende twintich coperen colummen mit haren voeten: der colummen hoefden ende alle die groueringhe des wercs was silueren.

11

Ende ter noertzide waren also vele tenten ende colummen ende voeten. ende die hoefden vander colummen waren vander seluer maten ende vanden seluen werke ende vanden seluen metale.

12

Mer in die zide die west wert was so waren tenten van vijftich cubitus lang: ende tien colummen mit haren coperen voeten: ende der colummen hoefden waren silueren ende die ghegroueringhe des wercx.

13

Mer teghen dat oest so ghereide hi tenten vijftich cubitus lang.

14

ende inden ziden waren tenten vijftien cubitus lang. ende mit drie colummen ende mit so vele voeten.

15

want tusschen dese twe ziden so maecte hi den inganc vanden tabernakel ghelijcke tenten die vijftien cubitus lang waren: ende drie colummen ende also veel voeten.

16

Hi hadde alle die tenten vanden vrijthoue gheweuen van ghesponnen gaerne.

17

Die voeten van den colummen waren coperen: mer haer hoofden waren silueren mit haer groueringhe: mer oec so ouerdecte hi die colummen vanden vrijt houe mit siluer

18

Ende hi maecte inden inganc vanden tabernakel ene tente. van zide blaeu root gheel ende twewerf gheuerwet ende van ghesponnen vlas mit menigherhande werck die twintich cubitus had in die

[p. *127]

lengte: ende die hoochte was van vijf cubitus: na die mate die alle die tenten vanden vrijthoue hadden.

19

Inden inganc waren vier colummen. mit coperen voeten: ende haer hoefden ende haer groueringhen waren silueren.

20

Hi maecte oec metalen alle die stecken vanden tabernakel ende vanden vrijthoue al om ende om.

21

Dit sijn die instrumenten vanden tabernakel der oercontscap. die ghetelt waren bi moyses ghebode inder leuyten oefeninghen by ythamar aarons des papen soons hant

22

die beseleel hurijs soon die hurs sone was van iudas gheslachte volmaect had also die here gheboden hadde bij moysen:

23

mit sinen gheselle ooliab die achisamechs sone was van dans gheslachte: die oec een voerbarich wercman was van hou te. ende van plument ende mitter naelden werckende van menichrande werc. van zide blaeu root gheel twewerf gheuerwet van linen garen.

24

Alle dat gout dat verdaen wort inden wercke der sanctuarien. ende dat in ghiften gheoffert wort was neghen ende twintich talenten. ende seuen hondert ende dertich ciclen: ter maten vander sanctuarien.

25

Ende dat ghetal vanden siluere was hondert talenten dusent seuen hondert ende vijf ende tseuentich ciclen ter maten vander sanctuarien

26

een half cicle van elken hoefde want het was gheoffert van dien die ten ghetale leden van twintich iaren out ende daer bouen van ses hondertdusent ende drie dusent. ende van vijfhondert ende vijftich man van wapenen

27

behaluen dit so waren daer hondert talenten siluers: daer die voeten vander sanctuarien of ghegoten waren ende van den inganc daer die gordine hanghet Hondert voeten waren ghemaect van hondert talenten: telken voete een talent gherekent.

28

Mer van den dusentighen ende seuen hondert ende vijf ende tseuentich cyclen so maecte hi die hoefden vanden colummen: dien hi oec clede mit siluer.

29

Daer waren oec gheoffert twe ende tseuentich dusent talenten coper. ende daer bouen vierhondert ciclen:

30

ende daer waren of ghegoten die voeten inden inganc vanden tabernakel der oercontscap. ende die coperen outaer mit sinen roester. ende alle die vaten die te besighen behoerlic waren:

31

ende die voeten vanden vrijthoue. beide al om ende om inden inganc. ende die stecken vanden tabernakel ende vanden vrijthoue al om ende om.