Bible in duytsche (Delftse bijbel 1477)

§ Capittel .xxxvij

1

HEc maecte hi beseleel: een arke van houte van sethim. die had in die lengte twe cubitus ende enen haluen: in die wijde ende in die hoochte was elc een cubitus ende enen haluen.

2

Ende hi dectese buten ende binnen mit alte finen

[p. *125]

goude. Ende hi maecte haer om ende om ene gulden crone

3

ende goot vier gulden ringhen te haer vier hoocken: twe ringhen in die een zide: ende twe ringhen in die ander zide.

4

Ende grendelen maecte hi van houte van sethim. ende omleidese mit goude:

5

ende die stack hi in die ringhen die waren an die ziden vander arcke om te draghen die arcke.

6

Ende hi maecte oec die propiciatorie dats die oracule van alte finen goude in die lencte twe ende een half cubitus: ende een cubitus ende een haluen in die wijtheit.

7

hij maecte oec twe cherubinnen gesmeedt van goude ende die settede hi an beide ziden vanden porpiciatorie:

8

die een cherubin int eynde vander eenre zide ende die ander cherubin int ander eynde van die ander zijde Twe cherubin in beiden eynden vander porpiciatorie:

9

ende si strecten haer vloghelen wt. ende bedecten die propiciatorie: ende si saghen die een op dander ende oock die propiciatorie.

10

Ende hi maecte oock een tafel van houte van sethim. ende hadde in lancte twe cubitus. ende in wijthede een cubitus: ende hadde in hoocheit een cubitus ende een half.

11

Ende hi omleidese mit alte finen goudt. ende hi maecte haer al omme ende omme een lijst:

12

ende in die lijste macte hi een gouden crone doer ghegraueert vier vinger breet: ende bouen dese selfde crone maecte hij een ander gouden crone.

13

Hi maecte oec vier gouden ringhen. ende die settede hi in die vier hoeken an elken voet vander tafel ieghen die crone:

14

ende daer in dede hi grendelen datmen die tafel mochte draghen:

15

ende dese grendelen maecte hij vanden houte van sethim. ende hij ommeleydese mit goudt

16

ende hi maecte vaten te menigherhande behoefte vander tafele. phiolen. nappen ende ghedecte ende wieroecs vaten van finen goude: daermen die verssche offerhande in offeren soude.

17

Hi maecte oec enen candelaer gesmeet van alte finen goude. Ende wt sine staecken quamen gardekens of riedekens. nappen draeyende sciuen ende lelien:

18

ses in elken zide. Drie gardekens of drie riedekens in die een zide: ende drie in die ander zide.

19

An elc gardeken waren drie nappen ghebonden al euen ront. ende draeyende sciuen oec ende lelien: ende drie nappen ghebonden al euen ront in dat ander gardekijn draeiende sciuen oec ende lelyen. Dat werc vanden ses gardekens was ghelijc: die quamen vten staecke vanden candelaer.

20

Mer inden staecke vanden candelaer waren vier nappen ghebonden al euen ront. ende draeyende sciuen an elcx ende oec lelien te gader:

21

onder twe gardekens waren te drien steden: draeyende sciuen die te gader ses gardekens worden. comende wt enen staeke

22

Ende aldus waren vten candelaer die draeyende sciuen ende gardekens: al ghesmeet van alte finen goude

23

Hi maecte oec ses lichtuaten mit haren tangeskens. ende vaten daermen in blusschede dat men afghenepen had: van alte finen goude.

24

Die candelaer mit al sijn vaten woech een talente gouts.

25

Hi maecte oeck van hout van sethim een outaer des thymiamatis. ende hi had enen

[p. *126]

cubitus in die lengte ende in die wijde ende in die hoechte twe cubitus: ende wt sinen hoke quamen hoernekens:

26

ende hi beleidse mit alte finen goude. mit sinen roester ende mit sine wanden. ende sijn hoernekens. Ende hi maecte hem al om ende om ene crone aureolam:

27

ende twe gulden ringhen aen elke zide onder die crone: datmen daer grendelen in steken soude. ende datmen den outaer soude moghen draghen.

28

Ende dese grendelen makede hi van hout van sethim. ende ouerdectese mit gulden platen.

29

Ende hi maecte olie salue ter heilicheden: ende thimiamata van alte fine specien mitten werke eens crudenaers.