Bible in duytsche (Delftse bijbel 1477)

Ca .xxxvi

1

BEseleel maecte ende ooliab. ende allen die wijse mannen. den welken die here wijsheit ende verstandenis ghegheuen had. dat si smeden consten dat notorftich was ter behoef der sanctuarien: ende dat die heer gheboden had.

2

Ende doe moyses gheropen had ende alle die gheleerde mannen. dien die heer ghegheuen had wijsheit ende wetenheit ende die hem seluen williclijc ghegheuen hadden om dat werck te maken:

3

so leuerde hi hem alle die giften der kinder van israkel. Ende doe si daghelijcs werkende waren: so bracht dat volc des morghens dat si belouet hadden.

4

Waer bij dat die werclude ghedwonghen waren te comen tot moysen ende seiden.

5

Dat volc brenct meer dant notorftich is.

6

Hier om gheboet moyses te ropen met eens herauts stemme Man of wijf en brenghe niet meer ten werke vander sanctuarien.

7

Ende daer wort ghecesseert vanden giften te offeren. om dat ghenoech wesen soude an dat gheoffert was ende om dats oec ouerbliuen soude.

8

Ende alle die wijs waren van herten te volmaken dat werck vanden tabernakel. si maecten tien cortinen. van vlas ghesponnen ende van zide blaeu root ende gheel twewerf gheuerwet: ende van menigherhande werck. mitter naelden ghewracht.

9

Ende die een van desen had acht ende twintich cubitus in die lengte: ende vier in die wijde Een mate was van allen den cortinen

10

Ende hij voechde die vijf cortinen die een an die ander: ende die ander vijf hechte hij te gader.

11

Ende hij maecte blaeu lissen inder eerster cortinen lijste in elke zijde. ende in die lijste van die andere cortine oec:

12

so dat die lissen te gader comen souden: ende datmense te gader voghen soude.

13

Waer bi dat hij goot vijftich gulden ringhen. diemen hechten soude inder cortinen lissen: ende datter soe een tabernakel worden soude.

14

Hi maecte oec van gheyten haer elf flassaerden: om te ouerdecken dat dack vanden tabernakel.

15

Die ene flassaerde had in die lengte dertich cubitus: ende in die brede vier cubitus. Alle die flassaerden waren van eenre maten

16

Ende die vijf daer of voechde hi te gader ouer die een zide: ende die ander ses verscheiden.

17

Ende hi maecte vijftich lissen inden lijste vanden eenen flassaerde

[p. *124]

ende vijftich in die lijste vander ander flassaerde datmense te gader voghen soude:

18

ende vijftich coperen spannen daer men dat dack mede te gader hechten soude: so dat van allen den flassaerden een decsel worden soude.

19

Hij maecte oec een ouerdecsel des tabernakels van weders vellen gheroot: ende een ander ouerdecsel daer bouen van blaeuwen vellen.

20

Hi maecte oec die tafele vanden tabernakel van houte van sethim staende.

21

Die lengte vander eenre tafelen was tien cubitus: ende die breide hielt anderhaluen cubitus.

22

Twe inhouden waren in elke tafele: datmen die een an die ander voghen soude. Dus maecte hij aen alle die tafelen vanden tabernakel.

23

Vanden welken datter twintich waren ter zwtziden wert iegen die zuydenwint:

24

mit veertith silueren voeten. Men leiden twe voeten onder elke tafele van beiden ziden der hoocken: daer die in houwen vanden ziden inden hoocken. geeindet worden.

25

Ende ter ziden van den tabernakel die scouwet ten noorden wert. soe maecte hi twintich tafelen ende veertich silueren voeten:

26

twee voeten onder elken tafelen

27

Mer ieghen die westzide dat was te dier ziden vanden tabernakel die die zee scouwet. maecte hi ses tafelen:

28

ende twe ander telken hoocken vanden tabernakel achter

29

die gheuoghet waren van onder tot bouen ende si stonden te samen in eenre voghinghe.

30

Dus maecte hi ten beiden ziden ten hoocken: so datter te gader waren acht tafelen. ende dat si hadden sestien silueren voeten: dat waren twe voeten onder elke tafel.

31

Hi maecte oec van hout van sethim vijf grendelen om te onthouden die tafelen vander eenre ziden vanden tabernakel.

32

ende vijf ander om die tafelen mede te gader te voghen vander ander zide: ende sonder dese. vijf ander grendele ter west ziden vanden tabernakel teghen die zee.

33

Hi maecte oec enen anderen grendel: die te middewaert vanden tafelen vanden enen hoocke totten anderen hoocke gaen soude.

34

Ende die tafelen vergulde hi: ende goot haer voeten silueren. Ende haer ringhen maecte hi gulden: daermen die grendelen soude moghen doersteken: ende die grendelen ouerdecte hi oec mit gulden platen.

35

Ende hi maecte oec een gordine menigherhande mitter naelden ghewracht van zide blaeu root ende gheel twewerf gheuerwet ende van ghesponnen vlas mit werck mitter naelden ghewracht:

36

ende vier colummen van houte van sethim die hi vergulde mit haren hoofden: ende goot haer silueren voeten.

37

Hi maecte oech een tente inden inganc vanden tabernakel van zide blaeu root ende gheel twewerf gheuerwet ende ghesponnen vlas. mit menigherhande werck:

38

ende vijf colummen mit haren hoofden. ende hi ouerdectese mit goude: ende goet haer voeten coperen: ende ouerdectese mit goude