Bible in duytsche (Delftse bijbel 1477)

§ Ca .xxxv.

1

ALs die menichte vergadert was vanden kinderen van israhel. so seide moyses tot hem. Dit ist dat die here gheboden heuet te doen.

2

Ses daghen suldi werck doen. Ende die seuende dach sal v wesen heilich: saterdach ende des heren ruste. die daer in werck doet. men sallen doden.

3

Binnen den saterdach so en suldi gheen vuer ontsteken in alle uwe woninghen.

4

Ende moyses seide tot alle der vergaderinghe der kinder van israhel. Dit is die reden dien die here beuolen heeft segghende.

5

Verscheit van v die pri-

[p. *122]

micien den here Willich ende van gereider herten offertse den here. Dat is gout ende siluer. ende coper.

6

blaeu zide ende gheel ende root twewerf gheuerwet ende wit vlas. haer van gheyten.

7

ende weders vellen gheroot ende blaeu: hout van sethim. ende olye. om die lichtuate te ontsteken.

8

ende datmen olie maect ende salue. ende harde suete thimiama:

9

onichen stenen ende gemmen. ter vercieringhe vanden superhumerael ende racionael.

10

So wie van v luyden wijs is. hij come ende make dat die here beuolen heeft:

11

dat is die tabernakel. ende sijn ouerdecsele ende sijn dack. die ringhen ende die tafelen mitten grendelen. die stecken ende die voeten.

12

die arcke ende haer grendelen die propiciatorie. ende haer gordine die men daer voer hanghen sal:

13

die tafele mit haren grendelen ende hare vaten. ende mitten broden der voerlegghinge:

14

den candelaer op sijn lichte te onthouden. ende sijn vaten ende sijn lichtuaten. ende olye ten voedinghe van vuer:

15

den outaer des thymiamatis ende sijn grendelen. ende olye der saluinghe ende thimiama van specien: die tente der doren vanden tabernakel.

16

den outaer des holocaustes ende sijn coperen roester mit sijnen grendelen ende sijn vaten: ende dat lauoer ende sijnen voet:

17

die cortinen vanden vrijthoue mit haren colummen ende haer voeten: die tente des ingancs vanden vrijthoue.

18

die stecken vanden tabernacule ende vanden vrijthoue. mit haren coerden:

19

clederen die men besighen sal inden dienst der sanctuarien: aarons des bisscops clederen ende sijnre sonen: dat si mi ghebrukich worden in paepscap.

20

Ende alle die menichte der kinder van israhel ghinghen wech. van moyses aenscouwen:

21

ende brachten mit harder ghereder ende deuoter herten. den here die primicien. om te maken dat werck vanden tabernakel der oercontscap. Soe wat dat notorftich was ter oefeninghe ende ten heilighen clederen.

22

gauen die mannen mitten wijuen: armillen. ende inaures. vingherlinghen ende dextralien Men versceide elc gulden vat in des heren ghiften.

23

So wie dat had zide blaeu root of gheel tweewerf gheuerwet. wit vlas ende gheiten haer. ende rammen vellen gheroot ende gheblaeut.

24

siluer ende gout metael ende coper si offerdent den here: ende hout van sethim ter menigherhande oerbaer.

25

Mer die gheleerde wijuen die quamen si gauen oec dat sij ghesponnen hadden zide blaeu ende root ende gheel ende vlas.

26

ende haer van gheyten: dit ghauen si al mit haer eyghen wille.

27

Mer die princen die brachten die onichen stenen ende die gemmen ten superhamerael ende ten racionael:

28

specien ende olye om die lichtuaten mede te doen barnen: ende om te ghereiden salue. ende om thimiama te maken van harden sueten roec.

29

Alle die mannen ende die wijuen offerden den heer mit deuoter herten ghiften: om datmen den here die werken maken soude also hi beuolen had mit moyses hant. Alle die kinder van israkel. heylichden den here hare willichlike dinghen

30

Ende moyses seide totten kinderen van

[p. *123]

israhel Siet die here heuet gheropen bi name beseleel hurijs soon. die hurs sone was. van iudas gheslachte:

31

ende hij heeften veruolt mit gods geeste mit wijshede. ende verstandenisse ende mit conste. ende mit alre wetenheit:

32

om te ghepeysen ende te maken alle werck in goude ende in siluer ende coper ende in yser

33

ende in die stenen te groueren ende in timmerwerck. So wat men vinden mach op smeden werck: heeft hi in sijn hert ghegheuen.

34

Ende ooliab achisamechs sone. van dans gheslachte

35

Hi heeftse beide geleert mit wijsheden: dat sij maken sullen tymmerwerck ende gheplumiet werck ende opten vinger ghewracht van zide blaeu root gheel tweewerf gheuerwet ende van linen dat sij alle weuen: ende dat sij alle nyewe dinghen vinden sullen