Bible in duytsche (Delftse bijbel 1477)

§ Ca .xxxij.

1

ALs dat volc sach dat moyses langhe merrede vanden berghe te comen: so vergaderden si ieghen aaron ende seiden. Stant op: ende maect ons goden die voer ons gaen. Want wij en weten niet wat ghesciet is moysi den man. die ons wt egipten leide.

2

Ende aaron seide tot hem. Doet of die gulden inaures. van uwer wiuen. ende van uwer sonen ende uwer dochteren oren: ende brenctse tot mij.

3

Ende dat volc dede dat hi beuolen had: ende brachten die

[p. 117]

inaures tot aaron.

4

Ende doe hise ontfaen hadde. so formeerde hijse mit geghesmouten werck: ende maecter of een ghegoten calf. Ende si seiden. Israhel dit sijn dijn goden: die dij vten lande van egipten gheleit hebben.

5

Ende doe dit aaron ghesien hadde so maecte hi een outaer daer voer: ende riep mit eens herauts stemme. ende seide. Morghen ist des heren feeste.

6

Ende sij stonden vroech op ende offerden holocaust ende danckelike hostien: ende dat volc sat etende ende drinckende: ende si stonden op spelen.

7

Die here sprac tot moysen ende seide. Ganc ende gaet neder: dijn volc dattu wt egipten gheleit hebste heeft ghesondicht.

8

Si sijn haest ghegaen vanden weghe dien du hem ghetoent hebste. Ende si hebben hem ghegoten een calf ende hebben dat aenghebedet: ende si hebben hem hostien gheoffert ende si seiden. Israhel dit sijn dijn goden die dij vten lande van egipten gheleit hebben.

9

Ende echter sprac die here tot moysen. Ic ansie dat dit volc van harder necken is.

10

Laet mi dat ic mijnen toren teghens hem vergrammen mach ende ic salse te niet maken: ende ic sal dij maken in een groot volc.

11

Mer moyses bat den heer sijnen god ende seide Here waer om vergramt dijn toren ieghens dijn volc. dattu wt egipten hebste gheleit: in groter starcheit ende in vromer hant:

12

Ic bidde: om dat die van egipten niet sullen moghen segghen: hi heeftse scalkelijc wtgheleit. om dat hijse inden gheberchten doden soude: ende ofdoen vanden lande. Dijn gramscap gheruste: ende wes goedertieren op dijns volcs quaethede.

13

Ghedencke dijnre knechten abrahams ysaacs ende israhels: die du bi di seluen ghesworen hebs ende gheseit. Ic sal v saet menichfoudighen ghelijc den sterren des hemels: ende al dit lant daer ic of ghesproken heb dat sal ic uwen sade geuen: ende ghi sultet altoes besitten.

14

Ende die heere wort beuredet: so dat hi dat quaet niet doen en soude dat hi gesproken had iegen sijn volc.

15

Ende moyses keerde weder vanden berghe: ende bracht in sijn hant twe tafelen der oercontscap. die in beiden ziden bescreuen waren:

16

ende ghemaect mit des heren werck. Ende des heren scrifte was ghegroueert inden tafelen.

17

Ende doe iosue hoerde dat gerucht vanden volc dat riep. so seide hij tot moysen: men hoert inden scaren gherucht vanden stride.

18

Moyses antwoerde. Ten is gheen roop der gheenre die ten stridewaert raden: noch der gheenre gheruchte diemen dwinghet te vlien: mer ic hore der gheenre stemme die singhen.

19

Ende doe moyses biden tenten comen was so sach hi dat calf ende den reye: ende hi wort seer gram ende worp die tafelen vter hant: ende bracse ten voeten vanden berghe.

20

Ende hi begreep dat calf dat sij ghemaect hadden ende verbrandet ende bracket te puluer: ende dit sprede hij in dat water: ende gaf den volke van israhel daer of drincken

21

Ende moyses seide tot aaron Wat dede di dit volc: dattu aldus grote sonde op hem ghebracht hebste:

22

Ende aaron antwoerde. Mijn here en belghe hem

[p. *118]

niet. Want du kenste dit volc dattet bereet is ten quade.

23

Si seiden mi Make ons goden die ons voergaen. Want wij en weten niet wat gheschiet is desen moysi: die ons vten lande van egipten leide.

24

Ende ic seide haer. Wie van uwen luden heuet gout: Si brochtent ende gauent mij. ende ic worpet int vuer: ende dit calf quammer wt.

25

Doe moyses dit volc sach dattet gheblotet was. Want aaron haddet gherouet om die scande der smetten. ende haddet bloot gheset onder die vianden:

26

ende hi stont in die poorte vanden tenten ende seide So wie des heren is hi come bi mij Ende al leuijs sonen vergaderden tot hem

27

Ende moyses seide hem. Dit seit die heer god van israhel. Elc man die doe sijn swaert op sijn dye. Gaet ende keert weder vander eenre poorten ter ander poorten ten midden doer die ghetenten: ende elc slae sijnen broeder ter doot ende sijnen vrient ende sijnen naesten.

28

Ende leuijs sonen deden na moyses woert: ende in dien daghe worter versleghen omtrent drie ende dertich dusent menschen.

29

Ende moyses seide. Ghi hebt huden uwe handen gheheilicht den here. elc in sijn kint ende in sijn broeder: soe dat v sal worden ghegheuen benedictie.

30

Ende doe die ander dach quam so sprac moyses ten volke. Ghi hebt alte groten sonde ghesondicht. Ic sal opgaen totten here: of icken in enigher maniere sal moghen bidden voer uwe misdaet

31

Ende hi keerde weder totten here ende seide Ic bidde here. dit dijn volc heeft ghesondicht een grote sonde: want sij maecten hem gulden goden.

32

Verlaet hem dese misdaet: of een doe dij des niet: so plame mij vte dien boke dien du ghescreuen hebste.

33

Die here antworde hem. Dien mij sondicht: dien sal ic wt mijn boke plamen.

34

Mer ganc du: ende leide dit volc daer ic dij gheseit heb. Want mijn enghel sal voer dij gaen. Mer inden daghe der wraken so sal ic dese haer sonde oec visiteren.

35

Dus sloech die here dat volc om die misdaet vanden calue: dat aaron maecte