Bible in duytsche (Delftse bijbel 1477)

§ Ca .xxxi.

1

ENde die heer sprac tot moysen ende seide.

2

Sich ic heb gheropen bi name beseleel huri soon die hurs sone was van iudas gheslachte:

3

ende ic hebben veruolt met gods gheeste. mit vroetscap ende verstandenisse ende conste: in alre hande wercken.

4

om te peysen watmen maken mach ende smeden van goude ende van siluere. ende van copere.

5

ende in marmore. ende in gemmen. ende in menigher manieren van houte

6

Ende ic heb hem enen gheselle ghegheuen ooliab achisamechs sone: van dans gheslachte. Ende in elcs gheleerts herte so heb ic wijsheit ghegheuen. om dat sij maken sullen al dat ic di beuolen hebbe:

7

die tabernakel der beloeften. ende die arke der oercontscap ende die propiriatorie die op haer is: ende alle die vaten vanden tabernakel.

8

ende die tafel ende sijn vaten. den fijnsten candelaer mit sijnen vaten:

9

ende den outaer des thymiata ende des holocaustes. ende alle haer vaten: ende dat lauoer mit sijnen voete:

10

aaron den pape ende sijnen sonen heilighe clederen inden dienste dat si ghebrukich worden haere officien in den heilighen:

11

ende olye der saluinghe. ende thimiama van specien inder sanctuarie. Al dat ic di beuolen hebbe sullen sij dij maken.

12

Ende die here sprac tot moysen ende seide.

13

Spreect den kinderen van israhel: ende segt tot hem. Besiet dat ghi mijnen saterdach wachtet want hi is een teiken tusschen mij ende v ende in uwen gheslachten: dat ghi weten moghet dat ic die here bin die v heilighe.

14

Wacht mijnen saterdach. Want hi is v heilich. Dien besmet: hi sal den doot steruen. Ende dier werc in doet: sijn siel sal veruaren van midden sijnen volc.

15

Ses daghen sulstn werc doen: ende inden seuenden dach so ist saterdach: heilighe rust den here. So wie in desen daghe werc duet. hi sal steruen.

16

Die kinder van israhel wachten den saterdach: ende si vieren in haren gheslachten Het is ene ewelike beloefte

17

tusschen den kinderen van israhel ende mi: ende een ewelijk teiken. Want is ses daghen maecte god hemel ende aerde: ende inden seuenden daghe so cesseerde hi van allen werke.

18

Ende doe dese redenen gheeyndet waren: soe gaf die here moysi opten berch van synai. twee stenen tafelen der oercontscap. die ghescreuen waren mit gods vingher