Bible in duytsche (Delftse bijbel 1477)

§ Ca .xxx.

1

OEc sulstu maken een outaer om thimiama daer op te barnen van houte van sethim:

2

ende hi sal hebben een cubitus in die lengte. ende een in die wijde. dat is viercant: ende twe cubitus in die hoechte. Hoernekens sullen wt hem comen:

3

ende du sulstese ouerdecken mit alte finen goude: beide sijn roester ende sijn wanden al om ende om. ende sijn hoernen.

4

Ende du sulste hem al om ende om maken een crone aureola: ende twe gulden rijnghen onder die crone in elke zide: datmen daer grendelen doersteken mach. ende datmen den outaer draghe.

5

Ende die grendelen sulstu maken van houte van sethim: ende ouerdeckense mit goude.

6

Ende du suls den outaer setten teghen die gordine die hanghet voer die arke der oercontscap. voer die propiciatorie daer die oercontscap mede gedecket wort. daer sal ic mitti spreken:

7

ende aaron sal daer op bernen wieroec. suetelijc rukende Des morghens als hi die lichtuaten suueren sal. so sal hi dat ontsteken:

8

ende des auonts als hijse setten sal so sal hi voer den heer ontsteken eweliken thimiama in uwen gheslachten.

9

Ghi en sult daer op niet offeren thimiama van anderen maecsele noch offerhande noch victime: noch ghi en sulter ghene versche dinc op storten.

10

Ende eenwarf des iaers sal aaron op sijn hoernen bidden. inden bloede dat gheoffert wesen sal voer die sonden: ende hi sal daer op gheureden In uwen geslachten sal dit wesen heilich der heilighen den here.

11

Ende die here sprac tot moysen ende seide.

12

Als du nemen suls die somme vanden kinderen van israhel bi ghetale so sal elc den here gheuen prijs voer sijn zie-

[p. *115]

le ende ten sal gheen plaghe in hem wesen als si ghetelt sullen sijn.

13

Want dit sal elc gheuen die ten name gaet: enen halue cycle na ghewichte vanden tempel. Een cyclus heeft twintich hellinghen. Een half deel vanden siclus salmen den heer offeren.

14

Diemen inden ghetale heeft van twintich iaren ende daer bouen hi sal den prijs gheuen.

15

Die rike en sal ten haluen ciclus niet toe doen: ende die arme en sals niet minderen.

16

Ende du suls nemen dat ghelt dat ghebracht is vanden kinderen van israhel. ende leuerent ten werke vanden tabernakel der oercontscap. dat si haer ghedencken voerden here: ende dat hi haere zielen ghenadich worde.

17

Ende die here sprac tot moysen ende seide

18

Du suls oec maken een coperen lauoer mit sijn voete om te dwaen: ende du sulstet setten tusschen die tabernakel der oerkontscap ende den outaer. Ende daer in salmen dat water doen

19

ende aaron ende sijn sonen sullen daer in dwaen hare handen ende haer voeten:

20

als sij in die tabernakel der oercontscap gaen sullen. ende als si gaen sullen ten outaer. om daer den here thimiama te offeren:

21

op dat sij niet en steruen. Dit sal ewelijc wettich wesen hem ende sijnen sade na hem volghende.

22

Ende die heer sprac tot moysen ende seide.

23

Neem die specien vander eerster mirren ende wtuercoren vijfhondert ciclen. ende van cynamome die helft dat is twe hondert ciclen ende vijftich: ende van calamo twe hondert cyclen ende vijftich.

24

van cassia vijfhondert ciclen inden ghewichte vanden sanctuarie: ende die mate hin van olye van olyuen.

25

Ende du suls maken olye der saluinge heilighe. salue ghemaect mitten werck eens apotecarij:

26

ende du sulste daer mede saluen die tabernakel der oercontscap. ende die arke des testaments.

27

ende die tafele mit haren vaten. den candelaer ende datter toebehoert. den outaer van thimiama

28

ende des holocausts. ende alle die huysraet die tot haerre behoeften hoert:

29

ende du sulstese al heiligen ende si sullen zijn heilich der heilighen Diese ghenaken sal hi sal worden gheheilicht.

30

Du suls aaron ende sijn sonen saluen: ende heilichtse dat si mij ghebrukich worden in paepscap.

31

Ende du sulste den kinderen van israhel segghen. Dese olye der saluinghe sal mi heilich wesen in uwen gheslachten.

32

Men sal daer mede gheens menschen vleysch saluen. Ende also het ghemaect is en suldi gheen ander maken: want het is gheheilicht: ende het sal v heilich wesen.

33

Een mensche die alsulc maket. ende gheefter enen vreemden of: men sal hem verderuen van sijnen volc.

34

Ende die heer seide tot moysen. Neem die specien. stacten. ende onicham. ende gabbanum van goeden roke. ende vanden claersten wieroec: van allen sal wesen ghelijc ghewichte.

35

Ende du suls maken thimiama mit eens apotecarius werck ghemaect naersteliken onder ghemenghet. ende puyr: ende alte waerdich van heiliche den.

36

Ende alstu het al ghestoten hebste in alte cleynen puluer soe sulstu daer of legghen voer die tabernakel der oercontscap: in die stat daer ic dij openba-

[p. *116]

ren sal. Dit sal v wesen thimiama heilich der heilighen.

37

Acsulken dinc en suldi tot uwen besighen niet maken: want het is heilich den here.

38

So wat mensche die sulc dinc maket om dat hi den roeck besihgen sal daer of: hi sal veruaren van sijnen volke