Bible in duytsche (Delftse bijbel 1477)

§ Capittel .xxix.

1

MEr dit sulstu oec doen: dat sij mij worden ghewiet in paepscap. Neem een calf vanden vee. ende twe onbesmette rammen:

2

ende derue broden. ende een korstgen die sonder heffe si die beslaghen sijn met olie. ende vladen sonder ghist ghesmeert mit olie. Al dit sulstu maken van tarwen blomen:

3

ende du sulstese legghen in een corf ende offeren se: ende du sulste doen comen voer die dore vanden tabernakel der oercontscap. dat calf ende die twe rammen.

4

ende aaron ende sijn sonen. Ende alstu den vader mit sijnen sonen hebste ghewasschen mit water.

5

so sulstu aaron cleden mit ziden clederen dat is mitten linen roc. ende mitten superhumerael. ende racionael ende dat sulstu toegorden mit enen gordele:

6

ende du sulste die miter setten op sijn hoeft. Ende die heilighe plate bouen die miter.

7

ende du sulste storten op sijn hoeft olye der saluinghe: ende in deser manieren sal hi worden gheconsacreert

8

Ende du sulste oec doen comen sijn sonen. ende du sulstese cleden mit linen rocken:

9

ende du sultese gorden mit een gordel. dat is aaron ende sijn sonen. ende du suls hem miters opt hooft setten: ende si sullen mit eweliker religione mijn papen wesen. Ende na dien dattu haer handen ghewiet hebste.

10

so sulstu doen brenghen dat calf voer den tabernakel der oercontscap. Ende aaron ende sijn sonen sullen die hant op sijn hoeft legghen.

11

ende du sulsten doden voer den here. neuen die dore des tabernakels der oercontscaps:

12

ende du suls nemen van des calf bloede. ende legghent mit dijnen vingher op den hoeck van den outaer mer sijn ander bloet sulstu storten voer die voet vanden outaer.

13

Ende du suls nemen alle dat smeer dat sijn inaderen ouerdecket. ende dat netken vander leueren. ende die twe nyeren. ende dat smeer datter bouen is ende du sulstet offeren ende verbernen opten outaer:

14

mer dat calfs vleysch ende sijn vel ende dat inaes sulstn bernen buyten den tenten: om dattet voer die sonde is.

15

Du suls oec nemen den enen ram: ende aaron ende sijn sonen sullen op sijn hoeft die handen legghen:

16

ende als du en gedodet hebste. so sulstu nemen van sijnen bloede ende stortent omtrent den outaer:

17

ende du sulste den ram in stucken slaen: ende du sulste dwaen sijn inaderen ende sijn voeten ende leggense op dat ghehouden vleysch ende op sijn hooft:

18

ende du sulste alle den ram offeren in brande opten outaer. Den here is die offerhande

[p. *113]

ende alre suetste roec van des heren victime.

19

Du suls oec nemen den anderen ram: ende aaron ende sijn sonen sullen op sijn hoeft die handen legghen.

20

Ende als du en ghedoot hebste. so sulstu van sijnen bloede nemen. ende sultet legghen opt einde van aarons rechter ore ende sijnre sonen. ende op die dumen van hare rechterhant ende voet: ende du sulste dat bloet storten opten outaer al om ende om.

21

Ende alstu ghenomen hebste vanden bloede dat opten outaer is. ende vander olye der saluinghe: so sulstu daer mede besprenghen aaron ende sine clederen ende sijn sonen ende haer clederen. Hem ende haer clederen gheheilicht.

22

soe sulstu dat ruete vanden ram nemen. ende den stert ende dat vet dat ouer den inaderen is. ende dat netken vander leuere. ende die twe nyeren ende dat ruete datter bouen is. ende die rechter scouder om dattet een ram is der consecracien:

23

ende een coec van enen brode. ende een korstgen die besleghen is mit olye. ende een pannekoec vten corue vanden deruen broden die gheset is in des heren aenscouwen:

24

ende du sulste alle dit setten op aarons ende sijnre sonen handen. ende du sultese heilighen opheffende voer den here.

25

Ende du suls al ontfaen van haren handen. ende du sulstet verbernen opten outaer in holocauste. alte sueten roke in des heren aenscouwen: want het is sijn offerhande.

26

Du suls oec nemen die borst vanden ramme daer aaron mede ghewiet is: ende du sulste heilighen ende heffense op voerden here: ende hij sal vallen in sijn dele.

27

Ende du suls heilighen die ghewiede borst ende die scoudere die du scheides vanden ram. daer aaron ende sijn sonen mede ghewiet waren

28

ende si sullen vallen in aarons ende sijnre sonen deel: mit eweliken rechte vanden kinderen van israhel: want het sijn die eerste ende dat beghin van haren danckeliken victimen die den here worden gheoffert.

29

Ende dat heilighe cleet dat aaron besighen sal. sullen sijn zonen hebben na hem. en daer in worden ghesalft ende haer handen sullen worden geconsacreet.

30

Soe wie van sinen zonen na hem biscop worden sal. hij sal seuen dagen dat cleet aen hebben: ende wie inden tabernakel der oercontscap gaen sal om te dienen in die sanctuarie.

31

Ende du sulste nemen den ramme der consecracien: ende du suls sijn vleysch zieden in een heylighe stat:

32

ende dat sal aaron eten ende sijn sonen. Si sullen oec eten die brode die in die corue sijn in die cleder camer vanden tabernakel der oercontscap.

33

om dat die sacrificie bequaem wesen sal: ende om dat hare handen sullen worden gheheilicht diet offeren. Gheen vreemt gheboren en sal daer of eten: want sij sijn heilich.

34

Ende ist datter vanden consacreerden vleische of brode yet blijft tot smorghens: soe suldi datter ouer loopt verbernen miten vuer. Men salt niet eten want si sijn gheheilicht

35

Du suls al doen dat ic dij beuolen heb op aaron ende sijn sonen. Seuen daghen sulstu haer handen consacreren:

36

ende du suls elcs dages offeren een calf voer die sonde om te suueren Ende alstu geoffert hebste die holocauste der suueringhe

[p. *114]

so sulstu den outaer suueren: ende du sulsten saluen in heilicheden.

37

Seuen daghen sulstu den outaer suueren ende heilighen ende hij sal wesen heilich der heiligen So wie datten tasten sal hi sal worden gheheilicht.

38

Dit is dattu doen suls inden outaer. Elcs daghes twe iarighe lammeren eenpaerlic

39

dat een lam smorghens ende dat ander lam des auonts:

40

ten enen lam sulstu offeren een tienden deel blome die besleghen si met ghestotene oly. die in maten hebbe dat vierendeel van hin: ende wijn te storten daer op van die selue mate in dat een lam.

41

Mer dat ander lam sulstu des auons offeren. nader zede der offeringhe des morghens: ende na dien dat wij gheseit hebben in roke der sueticheit.

42

Dit is den here sacrificie mit ewigher offeringhe in uwen geslachten. ter doren vanden tabernakel der oercontscappe. voer den here: daer sal ic setten totti te spreken.

43

Ende daer sal ic die kinder van israhel ghebieden: ende dat outaer sal worden gheheilicht in mijnre glorien.

44

Ende ic sal heilighen die tabernakel der oercontscap mitten outaer. ende aaron mit sijnen sonen: dat si mij ghebrukich worden in paepscappe.

45

Ende ic sal wonen in midden der kinder van israhel: ende ic sal hem een god wesen:

46

ende sij sullen weten dat ic bin die here haer god diese wt egipten gheleit hebbe. om dat ic onder hem bliuen soude: ic bin die here haer god