Bible in duytsche (Delftse bijbel 1477)

§ Ca .xxviij.

1

DOet comen tot di aaron dijn broeder mit sijnen sonen van middewaert der kinder van israhel. dat sij paepscap ghebrukich worden te mijnre behoef aaron. nadab ende abiu. eleazar. ende ythamar:

2

ende du suls dijnen broeder aaron maken een heilich cleet in glorie ende in schoenheit

3

Du suls segghen allen den ghenen die wijs sijn van herten. die ic veruollet heb mitten gheest der wijsheit: dat si aaron dijnen broeder maken clederen in glorie ende in schoonheit. daer hi sal worden ghewiet ende mi daer in dienen

4

Want dit sullen die clederen sijn die sij maken sullen. Een rationael ende een superhumerael: enen nauwen linen rock: een miter. ende een gordel. Sij sullen heilighe cledere maken: aaron dijnen broeder. ende sijnen sonen dat sij mi worden ghewijt in paepscap.

5

Ende si sullen nemen gout ende zide blaeu roet ende gheel twewerf gheverwet ende wit.

6

Ende si sullen maken een superhumerael van goude ende zide blaeu roet ende gheel twewerf gheuerwet ende van witten ghesponnen gaerne. al mitter naelden ghewracht.

7

In beiden zide ten eynde soe salt hebben twe lijsten gheuoeghet: dat si an een vergaderen.

8

Want alle dat geweefte daer of ende alle die menigherhantheit van werke sal wesen van goude. ende die zijde blaeu root ende gheel twewarf gheuerwet ende van witten ghesponnen garen.

9

Ende du suls nemen twe onichen stenen. ende du sulste daer in grauen israhels sonen namen:

10

die ses namen in den eenen steen. ende die ander ses namen inden anderen steen na ordinancie hare gheboerten

11

du sulstese graueren met graueraers werke. ende mit wtgrauinge eens lapidarius israhels sonen namen. ende die sluten ende omlegghen mit goude:

12

ende du sulste setten in beiden ziden des superhumeraels. in een herdencken den kinderen van israhel. Ende aaron sal draghen haer namen voerden here op beide die scouderen: om een herdencken

13

Du suls oec van goude maken haken:

14

ende twe kethengens te gader hanghende van alte finen goude: dien du anden haken hanghen suls.

15

Du suls oec maken een rationael des vonnissen mitter naelden ghewrocht naden gheweefte des superhumeraels: van goude van zide blaeu roet ende gheel tweewerf gheuerwet ende van witte gaerne.

16

Het sal viercant wesen ende dubbelt. Het sal een hantbreet hebben ter maten. beide in die lencte ende in die wijde:

17

ende du sulste daer in setten vier ordinancien van stenen. Int eerste vers sal wesen die steen sardius. ende topasius ende smaragdus.

18

Int andere vers sal wesen carbunculus saphirus ende iaspis.

19

Int derde sal wesen ligurius achates ende ametistus

20

Int vierde sal wesen crisolitus onichinus ende berillus. Si sullen in hare ordinancien wesen ghesloten in goude:

21

ende si sullen hebben der kinder naem van israhel. Ende alle die stenen salmen graueren mit twaelf namen. mit elker name naden twaelf gheslachten.

22

Du

[p. *111]

suls maken inden rationael van alte fine goude kethene te gader hanghende

23

ende twe gulden rijnghen die du setten suls op beide die eynden vanden rationael:

24

Ende du sultese die gulden kethenen voeghen in die rijnghen die int eynde vanden rationael zijn:

25

ende die eynden vanden kethenen sulstu hechten daer in tween haecskens in beiden ziden vanden superhumerael datten racionael wert scouwet.

26

Du suls oec maken twe gulden rijncskens. ende die suldi setten opt eynde vanden racionael. in die lijsten die ieghen die superhumerael sijn: ende te sinen achterwaert scouwende:

27

ende oec noch twe ander gulden rijnghen. die men setten sal in beide die ziden vanden superhumerael beneden. dat scouwet teghen dat aensichte vander nederster voghinghe. datment hechten mach mitten superhumerael te gader.

28

ende men sal dat racionael mit sijnen rijngen ende mitten rijnghen vanden superhumerael te gader trecken. mit enen blaeuwen webbe: dat die gewrachte voghinghe bliue. so dattet racionael ende dat superhumerael die een vanden anderen niet sceiden en moghen.

29

Ende aaron sal draghen der kinder van israhels namen op sijn borst inden racionael des vonnissen. als hi in die sanctuarie gaen sal: te enen eweliken herdencken voer den here.

30

Ende du suls setten inden racionale des vonnissen. leringhe ende waerhede. ende die sullen in aarons borst wesen als hi ingaen sal voerden here: ende hi sal der kinder van israhels vonnisse draghen in sijn borst: voer den here altoes

31

Du suls oec maken een rock vanden superhumerael al blaeu:

32

ende in sijn middewaert sal bouen een caproen wesen. ende die lijste sal geweuen wesen al om. also men pleghet te maken in die achterste eynde vanden clederen: om dat si niet licht schoren en sullen.

33

Du suls oec maken beneden ten voeten vanden seluen rocke al om ende om. van zide blaeu ende root ende gheel twewarf gheuerwet als appelgarnate. ende du sulster tusschen hangen in midden bellen:

34

aldus dattet si een gulden belle ende een appel garnate: ende echter een ander gulden belle ende appelgarnate:

35

ende daer mede sal aaron ghecledet wesen inder officien des dienstes: so datmen gheluyt horen mach als hi die sanctuarie ingaet ende wtcoemt. in des heren aenscouwen: ende dat. hi niet en sterue.

36

Du suls oec maken van alte finen goude een plate: ende daer in suldi grauen met eens grauers werc dat heilighe den here.

37

Ende du sulsten binden mit enen blaeuwen webbe of gordele: ende si sal sijn bouen die miter ende hanghen voer des bisscops hoeft

38

Ende aaron sal draghen der gheenre quaetheden. die die kinder van israhel offeren ende heilighen sullen: in al hare ghiften ende gauen. Ende dese plaet sal wesen altoes op sijn voerhoeft: dat hem die here goedertieren si.

39

Ende du suls den rock toe hechten mit witten gaerne: ende du suls maken een witten linen miter ende een gordel mitter naelden ghewracht.

40

Oec suldi aarons sonen bereiden linen rocken. ende gordels. ende mite-

[p. *112]

ren in glorien ende schoenheit:

41

ende mit al desen sulstu aaron dijnen broeder cleden. ende sijn sonen mit hem ende haere alre handen sulstu wyen: ende du sulstese heilighen. dat si mi in paepscap ghebrukich worden.

42

Du suls oec maken linen broeken dat si ouerdecken dat vleysch haere vuijlheit. vanden lendenen toten dyen:

43

ende die sullen besighen aaron ende sijn sonen. als sij inden tabernakel der oercontscap gaen sullen. of als si ten outaer ghenaken sullen te dienen in die sanctuarie: dat sij van misdadicheden niet en steruen. Dit sal aaron ende sijnen sade na hem ewelijc wettich wesen.