Bible in duytsche (Delftse bijbel 1477)

§ Capit .xxvij.

1

DU suls oec maken een outaer van houte van sethim. ende die sal hebben vijf cubitus in die lengte: ende in die wide also vele dat is viercant: ende drie cubitus in die hoechte

2

Ten vierhoecken sullen

[p. *109]

hoernen wt hem comen: ende du sulsten ouerdecken mit coper.

3

Ende du sulste tot sijnre behoef maken ketelen om die assche te ontfaen. ende tanghen ende crauwels: ende daermen dat vuer in draghen sal. Du sulste alle die vaten maken van coper.

4

Ende enen coperen roester ghemaect als een nette: ende in sijn vier hoeken sullen vier coperen ringhen wesen.

5

ende die suldi legghen onder den haerde vanden outaer. Ende die roester sal wesen totten middewaert vanden outaer.

6

Du suls oec maken van houte van sethim twe grendelen vanden outaer ende die suldi ouerdecken met coperen platen.

7

ende du sulstese steken doer ringhen: ende si sullen wesen van beiden ziden vanden outaer om te draghen.

8

Du en suls den outare niet maken gheheel mer binnen ydel: ende also di inden berghe ghetoghet is.

9

Du suls oec maken een vri hof vander tabernakel: ende in die zwtzide daer of ten zuden waert. sullen wesen tenten van ghesponnen vlas Die een zide sal houden in die lencte hondert cubitus:

10

ende twintich columpmen mit so vele coperen voeten: ende sullen die hoefden silueren hebben mit haren groefden ringhen.

11

Oec sullen wesen in die noirtzide. langhes tenten hondert cubitus lang: ende twintich colummen. ende also vele mit ghetale coperen voeten: ende haer hoefden mit haeren groefden ringhen sullen wesen silueren.

12

Mer in die wijde des vrijthoues die ten westen waert scouwet so sullen tenten wesen vijftich cubitus lang: ende tien colummen ende also veel coperen voeten.

13

Ende in die wijde des vrijthoues dat ten oesten waert scouwet soe sulen vijftich cubitus wesen:

14

ende in die een side sullen sijn tenten van vijftien cubitus lang ende drie colummen. ende also vele voeten

15

ende in die ander zijde sullen tenten wesen vijftien cubitus lang ende drie colummen. ende also vele voeten.

16

Mer ten inganc vanden vrijthoue. salmen maken een tente. twintich cubitus lang. van zide blaeu ende root ende gheel twewerf gheuerwet. ende wit van menigherhande verwe ende werc mitter naelden ghewracht. Ende si sullen hebben vier colummen: mit also vele voeten.

17

Alle die colummen vanden vrijthoue al om ende om. sullen worden verdect mit silueren platen: ende hebben silueren hoefden: ende coperen voeten.

18

In die lengte sal dat vrijthof beslaen hondert cubitus: ende in die wijde vijftich Ende die hoochte sal wesen vijf cubitus: ende men salt maken van linen laken: ende het sal hebben copreen voeten

19

Du suls alle die vaten vanden tabernakel te sinen doen ende te sijnre behoef. beide die staeken vanden tabernakel ende vanden vrijthof maken van copere

20

Ghebiede den kijnderen van israhel. dat si di brenghen alte puere olye van olyuen bomen. dat ghestoten si mit enen stoter: dattet licht altoes mach barnen des nachts

21

inden tabernakel des oercontscaps buten die gordine die ghehanghen is in die tabernakel des oercontscaps: ende aaron ende sijn sonen sullent setten. op dat si tot des morghens licht.voer den here. Dit sal ene

[p. *110]

ewelike oefeninghe wesen in haren nacomelinghen vanden kinderen van israhel