Bible in duytsche (Delftse bijbel 1477)

§ Ca .xxv.

1

ENde die heer sprac tot moysen ende seide.

2

Segt den kinderen van israhel: dat sij mi brenghen primicien. Ghi sultse ontfaen. vanden mensche diese sijns willen offert.

3

Ende dit ist dat ghi ontfaen sult. Gout ende siluer ende coper

4

ende zide blaeu root gheel ende twewarf gheuerwet ende wit vlas. ende haer van gheyten.

5

ende weders vellen gheroot Ende blaeu vellen. ende hout van sethim:

6

ende olie om die lichtende vaet mede te doen barnen: specien van saluen ende thimiamata van goeden roke:

7

oniche stenen ende peerlen om te vercieren een ephot ende een racionael

8

Ende si sullen mi maken een sanctuarie ende ic sal in midden hem luden wonen.

9

na alder ghelikennisse vanden tabernakel die ic di togen sal: ende van allen den vaten in sijnre oefeninghe. Dus sulstu den tabernakel maken.

10

Ghi sult een arke van hout van sethim maken: ende die lancte sal wesen twe cubiten ende een half. ende haer wide een cubitus ende een halue: ende die hoechte een cubitus ende een half

11

ende du sultese vergulden van binnen ende van buten mit alre snnerste gout. Ende du sulste daer bouen maken al om ende om een gulden croon:

12

ende vier gulden ringhen die du setten sulste an die vier hoken vander arken. Die twe ringhen sullen wesen aen die een zijde ende die twe an die ander zijde.

13

Du sulste oec maken grendelen van houte van sethim: ende dn sultese ouerdecken mit goude.

14

Ende du sulte-

[p. *106]

se steken doer die ringhen. die in die ziden vander arcken sijn: datmense daer mede draghen mach.

15

Ende si sullen altoes wesen in die ringhen: ende men en salse daer nemmermeer wt trecken

16

Ende du suls in die arcke legghen die oerkontscap die ic dij gheuen sal.

17

Du sultse oec maken van alte suueren goude een propiciatorie. Die lancte sal houden twe cubiten ende enen haluen: ende haer wide een cubitus ende enen haluen

18

Du sultse oec maken twe cherubin gulden ende ghesleghen. in beiden zijden vanden oracule.

19

Die een cherubin sal wesen in die een zijde: ende die ander in die ander zide. Si sullen beide die ziden vanden proporciatorie decken

20

haer vloghelen wtspreidende. ende ouerdecken die oracule: ende si sullen die een den anderen anscouwen. ghekeert mitten aensichte ter proporciatorien waert.

21

daermen die arcke mede decken sal: daer du die oercontscap in legghen suls die ic dij gheuen sal.

22

Van daer sal ic dij ghebieden ende totti spreken: bouen die propiciatorie dat is te weten van middewaert die twe cherubin die sijn sullen bouen die arke der oercontscap. al dat ic bi dij ontbieden sal den kinderen van israhel.

23

Du sulste oec maken van hout van sethim een tafele. die twe cubiten heeft in die lencte: ende inder wijden een cubitus. ende in die hoochte een cubitus ende een halue:

24

ende du sultese vergulden mit alten puren goude. Ende du sulste haer maken een gulden lijste al om ende om:

25

inder lijsten sulstu maken een croon doergrauen die hoech sij vier vingheren: ende daer bouen sulstu maken een ander croon aureola.

26

Du suls oec bereiden vier gulden ringen: ende die sulstu setten in vier hoocken van deser tafelen. an elken voet.

27

Onder die crone sullen die gulden ringhen wesen. daermen die grendelen doer steken mach ende datmen die tafele mach draghen.

28

Ende die grendelen sulstu maken van houte van sethim. ende du sultese om legghen met goude: om onder die tafele te legghen.

29

Du suls oec bereiden proefnappen. ende violen. ende wieroecuate ende ghedecte. van alte suueren goude. daermen in offeren sal die libamente:

30

ende du sulste legghen op die tafele in mijn aenscouwen altoes broden der voerlegghinghe.

31

Du suls oec maken van alte finen goude enen ghesmeden candelaer: ende wt dien sullen comen wt sijn slhacht. riedekijn ende nappen ende rincsken te gader ende lelien.

32

Ende ses riedekijn sullen comen wt sine ziden: die drie wter eenre ziden: ende drie vter ander ziden.

33

Ende aen elke riedekijn sullen wesen drie nappen gebouden al euen ront: ende rincskens te gader ende lelien: ende oec sullen in die ander riedekijn wesen drie nappen in dier ghelijc euen ront: ende rincsken ende lelien Dit sal dat werc wesen vanden ses riedekijns: diemen wt den scachte maken sal.

34

Ende inden candelare sullen wesen vier nappen inder ghelijc euen ront: ende telken nap rincskens ende lelyen.

35

Ende rincskens onder twe riedekijns in drie steden: die te gader maken sesse. ende comen wt enen scachte.

36

Ende aldus sullen

[p. *107]

vten scachte comen die rincskens ende riedekijns: ende al salment smeden van alte finen goude.

37

Du sulste oec maken seuen lichtuaten: ende die sulste setten opten candelaer. dat si daer teghen lichten.

38

Men sal oec maken van alte finen goude: vier schaerkens daermen in blusschen sal datmen of nypen sal.

39

Al dat ghewichte vanden candelaer mit alle sine vaten. sal hebben enen talente van alte finen goude.

40

Merct ende maect naden exemplaer die dij ghetoent is opten berch