Bible in duytsche (Delftse bijbel 1477)

§ Capittel .xxiiij.

1

OEc seide die here tot moysen. Com op totten here. du ende aaron ende nadab ende abiu ende die tseuentich ouders van israhel. ende ghi sult van verre aenbeden

2

Ende moyses sal alleen opcomen totten here: ende die ander en sullen niet naerre comen: ende dat volc en sal mit hem niet op comen.

3

Dus quam moyses: ende vertelde den volc alle des heren woerden ende sijn vonnissen. Ende alle dat volc antwoerde. mit eenre stemmen. Alle des heren woerden die hi ghesproken heeft. sullen wij doen.

4

Ende moyses screef alle des heren woerden: ende hij stont des morghens vroech op ende stichte den heer een outaer ten voete vanden berghe: ende twaelf titelen na die twaelf gheslachten van israhel.

5

Ende hi sende ionghelinghen vanden kinder van israhel ende si offerden holocauste: ende sij doden vredelike victimen den heer. twaelf calueren.

6

Ende moyses nam half dat bloet ende dedet in coruen: mer die ander dele storte hi opten outaer.

7

Ende hi nam dat boec vander beloeften. ende lasset daer. ende dat volc hoerde. Ende si seiden. Alle dat die heer ghesproken heeft sullen wij doen: ende wij sullen

[p. *105]

ghehoersaem wesen.

8

Ende moyses nam vanden bloede ende spreidet inden volke Ende seide Dit is dat bloet der beloeften dat die heer mit v ghedaen heeft: op alle dese redenen.

9

Ende moyses ende aaron. ende nadab ende abiu. ende die tseuentich ouders van israhel: gingen op.

10

ende sij saghen god van israhel. Ende onder sijnen voeten saghen si dat werck als van enen saphirus stene: ende ghelijc den hemel als hi claer is.

11

Nochtan en leide hi sijn hant niet bouen die kinder van israhel die verre wech waren ghegaen Ende sij saghen gode: ende si aten ende sij dronken.

12

Ende die heer seide tot moysen. Com op tot mi inden berghe. ende du suls daer bi mi wesen: ende ic sal dij gheuen twe stenen tafelen ende die wet ende die gheboden die ic v ghescreuen heb: dattuse den kinderen van israhel sulste leren.

13

Ende moyses ende iosue sijn dienre stonden te samen op: ende doe moyses op gods berch ghinc.

14

soe seide hi totten ouders. Beide ons al hier: tot dat wij weder comen sullen tot v. Ghi hebt wit v aaron ende hur: so wat sake dat onder v rijst die suldi hem segghen

15

Ende doe moyses op ghegaen was. soe bedecte een wolke den berch:

16

ende gods glorie woende bouen op synai ende bedecte den berch mit een wolke ses daghen. Ten seuenden daghe. so riep die heer moysen van midden der duysterheit.

17

Want die ghedaente van des heren glorie was ghelijc barnende vuer opten top vanden berghe: in der kinder van israhels aenscouwen.

18

Ende moyses ghinc in midden den neuel. ende ghinc opten berch: ende hij was daer veertich daghen. ende veertich nachten