Bible in duytsche (Delftse bijbel 1477)

§ Capittel .xix

1

IN die derde maent nae dat die kinder van israhel wt egipten ghegaen waren: in desen daghe so quamen si inder wildernissen van synai.

2

Want doe si ghegaen waren van raphidim ende si quamen tot inder wildernissen synai. soe sloghen si haer tenten in die selue stat: ende daer sloech iseahel sijn tenten teghen den berch.

3

Ende moyses ghinc op inden berch tot gode. Ende die here riepen vanden berghe ende seide. Dit sulstu segghen iacobs huse: ende du sulste boetscappen den kinderen van israhel.

4

Ghi saghet selue dat ic ghedaen hebbe die van egipten: ende hoe ic v ghedraghen heb op die vloghelen der aernen: ende hoe ic v tot mijnre behoef ontfaen hebbe.

5

Ist dat ghi mine stemme hoert. ende wacht mine beloeften:

6

ende ghi sult mi wesen een paeplic rijc: ende een heilich volc. Dit sijn die woerden die du spreken suls teghens den kinderen van israhel.

7

Moyses quam ende riep te gader die meeste vanden gheslachte des volcs. ende hi vertelde hem alle die redene die die here beuolen had.

8

Ende al dat volc antwoerde te gader. Alle

[p. *98]

dat die here ghesproken heuet. dat sullen wij doen. Ende doe moyses des volcs woerden den here gheseit had:

9

so seide hem die here. Nu sal ic te hant tot v comen in donckerheden van eenre wolken: dat mi dat volc sal moghen horen spreken totti: ende dat si di ewelic ghelouen. Aldus boetscapte moyses den here des volcs woerden.

10

Ende die here seide hem. Ganc ten volke: ende heylichtse huden ende morghen. ende si sullen dwaen haer clederen:

11

ende bereet wesen inden derden daghe Want inden derden daghe so sal die here nedercomen voer al dat volc. opten berghe van synai.

12

Ende du suls den volc terminen setten al om ende om: ende segghen tot hem Wachte v dat ghi opten berghe niet en gaet: ende en ghenaect sijnen terminen niet. Want so wie den berch ghenaken sal hi sal den doot steruen.

13

Gheen handen en sullen hem ghenaken: mer men sallen doden met stenen: of met ghescutten doerschieten. Weder dattet beesten of menschen wesen sullen. sij en sulllen niet leuen. Als die trompet beghint te luden: dan sullen si opten berch gaen.

14

Ende dus quam moyses neder ten volke: ende heylichdet. Ende doe si haer cleder ghedwoghen hadden:

15

so seide hi tot hem Ghi sult wesen ghereet inden derden daghe. ende die morghenstont begonste te lichten. Ende en ghenaket uweu wiuen niet.

16

Te hants was die derde dach ghecomen. ende sich men beghonste te horen donreslaghen. ende blixemen begonsten te blicken: ende alte dicken wolc bedecte den berch Ende die roop vander trompen beghonste starckelic te luyden: ende dat volc dat inden tenten was ontsach hem.

17

Ende doese moyses wtgheleit brochte den here te ghemoet vander stat der tenten. soe stonden si ten voete vanden berghe.

18

Want alle die berch van synai die roecte: om dat daer die here op was neder comen inden vuere: ende om datter roock op ghinc als van enen ouen. Soe was die berch hem allen veruaerlijc:

19

ende dat ghelnyt vander trompen wies alleincken meerre: ende men hoerdet vorder Moyses sprack: ende die here antwoerde hem.

20

Ende die here quam neder opten top vanden berch van synai: ende riep moysen int hoechste vanden berch. Ende doe moyses daer op ghegaen was:

21

so seide die here tot hem. Ganc neder ende voersegghe den volc: of sij machschien willen ouer die termine gaen om den here te sien: ende dat dan van hem luden mochte veruaren een grote menichte.

22

Ende die papen die totten here comen sullen si worden ghesuuert: op dat icse niet en verslae.

23

Ende moyses seide totten here. Dat volc en sal niet op moghen comen opten berch van synay. Want du oercondes: ende beuaelste ende seitste legghe terminen: omtrent den berch ende heilichten.

24

Die here seide hem Ganc ende ganc neder: ende du suls opcomen ende aaron metti. Mer die papen ende dat volc en sullen ouer die termine niet gaen: noch opcomen totten here: dat icse machschien niet en dode.

25

Ende moyses ghinc neder totten volc: ende verteldet hem alle.