Bible in duytsche (Delftse bijbel 1477)

§ Ca .xvij.

1

DOe alle die menichte der kinder van israhel dus voirt ghetijt waren vter woestijnen syn. bi hoer woninghen. so sloeghen si tenten in raphidim: na des heren woert: ende daer en was gheen water den volc drincken te gheuen.

2

Ende sij stonden teghen moysen. ende seiden Ghif ons water dat wi drincken moghen Ende moyses seide Wat bescheldi teghen mi? Ende waer om becoerdi den here?

3

Dus hadde daer tvolc dorst om ghebrec vanden watere: ende si murmureerden teghen moysen ende seiden. Waer om deetstu ons wt egipten gaen: om dattu ons ende onse kinderen ende onse beesten soudes doden van dorst?

4

Ende moyses riep anden here ende seide Wat sal ic desen volke doen? Noch ouer een luttel: ende si sullen mij stenen.

5

Ende die here seide tot moysen. Ganc voer dat volc: ende neemt mit dij vanden ouderen van israhel: ende neemt in dijn hant die roede daer du die riuiere mede sloghes. ende ganc.

6

Sich ic sal daer voerdi staen. opten steen oreb: ende du salste den steen slaen: ende daer sal water wt comen. dat dat volc drincken mach. Ende moyses dede also voer den ouders van israhel.

7

Ende hi hiet den naem van dier stat becoringhe. om den twist der kinder van israhel: ende om dat si den here becoerden ende seiden. Is die here in ons luyden of niet.

8

Ende amalech quam: ende vocht ieghens die kinder van israhel in raphidim.

9

Ende moyses seide

[p. *96]

tot iosue. Kies di mannen: ende ganc morghen wt ende vecht teghens amalech. Ende ic sal staen opten top vanden berghe: ende hebben gods roede in mijn hant

10

Ende iosue dede also moyses seide: ende vocht teghens amalech. Ende moyses ende aaron ende hur. ghinghen opten top van den berch

11

Ende als moyses sijn hant op hief so verwan israhel. Mer liet hijse een luttel weder dalen: so verwan amalech.

12

Want moyses handen waren zwaer Ende si namen enen steen ende leiden onder hem. ende moyses sat daer op: ende aaron ende hur. hielden hem sijn handen op in beiden ziden. Ende aldus en worden hem sijn handen niet moede: totter sonnen onderganc.

13

Ende iosue iaechde amalech ende sijn volc. in des swaerts mont.

14

Ende die here seide tot moysen. Scrijft dit in enen boeck om te ghehueghen: ende te leueren in iosuees oren. Want ic sel ofdoen van onder den hemel die ghehueghenisse van amalech.

15

Ende moyses stichte een outaer: ende hiet sinen naem. die here is mijn verheffing.

16

ende seide. Want des heren hant allene: ende gods strijt sal wesen teghen amalech: ende gheslachte in gheslachten