Bible in duytsche (Delftse bijbel 1477)

§ Ca .xvi

1

SI tiden wech van helim ende alle die meninhte vanden kinderen van israhel quamen inder wildernissen syn. die tusschen helim ende sinay is: inden vijftienden dage vander ander maent na dien dat si wt den lande van egipten ghegaen waren.

2

Ende alle die vergaderinghe der kinder van israhel murmureerden: inder wildernissen teghen moysen ende aaron.

3

Ende die kinder van israhel seiden tot hem. Ende of wi doot waren ouermits des heren hant in dat lant van egipten: doe wij saten bouen den potten vanden vleysch. ende broot aten in satheden. Waer om hebdi ons gheleit inder wildernissen: om dat ghi alle die menichte doden soudt met hongher?

4

Ende die here seide tot moysen. Sich ic sal v reghenen broot vanden hemel. Dat volc sal wtgaen ende vergaderen alle daghe. dat sijs ghenoech hebben: dat icse prouen mach. weder si in mijn wet wanderen sullen. of niet.

5

Mer inden sesten daghe so sullen si bereiden dat si indraghen sullen: ende het sal dubbelt wesen na dat sij elcs daghes plaghen te gaderen.

6

Ende moyses ende aaron seiden tot alle den kinderen van israhel. Tauont suldi weten dat v die here gheleidet heuet wt den lande van egipten:

7

ende vroech suldi des heren glorie sien. Want ic heb ghehoert uwe

[p. *94]

murmuracie teghen den here. Want wat sijn wij: dat ghi teghen ons murmureert?

8

Ende moyses seide. Die here sal v tauont teten gheuen vleysch. ende morghen vroech broot in satheden: om dat hij uwe murmuracie heuet ghehoert daer ghi mede teghen hem murmurede. Want wat sijn wij? Want v murmuraci en is teghen ons niet: mer teghen den here.

9

Ende moyses seide tot aaron. Segt alle der vergaderinghe der kinder van israhel. Coemt voert voer den here Want hi heuet uwe murmuracie ghehoert.

10

Ende doe aaron sprac tot alle die vergaderinghe der kinder van israhel: soe saghen si ter wildernissen waert. Ende sich des heren glorie openbaerde in dien wolke

11

Ende die heer sprac tot moysen ende seide.

12

Ic heb ghehoert der kinder van israhels murmuracie. Spreect tot hem. Tauont suldi vleysch eten: ende morgen vroech suldi worden ghesadet van brode: ende ghi sult weten dat ic die heer v god bin.

13

Aldus gheschiede des auonts ende het quamen velthoenre op ende bedecten die tenten:

14

ende des morghens vroech lach dat saet al om ende om die tenten. Ende doe hi dat bouenste vanden lande bedect hadde. So scheent inder wildernissen cleyn als oft mit enen mortierstoc ghestoten waer inder ghelikenisse dat rijp opt lant leyt.

15

Ende doe dat die kinder van israhel ghesien hadden: so seiden si onderlinghe. Manhu? dat bediet. Wat is dat? Want si en wisten niet wattet was. Ende moyses seide hem Dit is broot dat v die heer ghegeuen heeft teten.

16

Dit is twoert dat v die heer beuolen heeft Vergadert elcx daer of al so vele dat gijs genoech hebt teten tot elken hoofde een gomor. Ghi sultet so nemen: na ghetal vanden zielen die inden tabernakel wonen.

17

Ende die kinder van israhel deden also: ende si vergaderden. die ander meer. die ander min:

18

ende si matent bider maten gomor Noch die meer vergadert hadde. had meer: noch die min bereit hadde. vant min: mer ygheliken na dat sij eten mochten vergaderden si.

19

Ende moyses sprac tot hem. Niemant en late daer van bliuen tot morghen vroe.

20

Ende si en hoerden hem niet. Mer die sommighe van hem lietent totten morghen toe: ende het began te vloeyen van wormen. ende het vervuylde. Ende moses wort teghen hem toernich

21

Mer si vergaderdent des morghens vroe. yghelijc: also veel als ghenoech mach wesen teten. Wanneer die sonne heet ghewordden was: so smeltedet.

22

Ende inden sesten daghe. se vergaderden sij dubbelde spijse: dat is twe gomor voer ygheliken mensche. Ende alle die princen der menihten quamen. ende verteldent moysi.

23

Ende hij seide hem. Dit ist dat die heer ghesproken heeft. Die ruste des sater daghes. is geheilicht den here Morgen so watter te werken is dat duet ende dat te koken is dat koket. Mer watter ouerblijft dat houdet tot morghen.

24

Ende die kinder van israhel deden also als moyses gheboden hadde. ende het en vuylde niet: noch men vanter gheen wormen in.

25

Ende moyses seide. Eet dat huyde. want

[p. *95]

het is des heren saterdach: ende men en sals inden acker huden niet vinden.

26

Ses daghen suldijs vergaderen. mer inden seuenden dach so ist des heren saterdach: ende hier om en salmens niet vinden.

27

Die seuende dach quam: ende sommighe vanden volke ghinghen wt ende si en vondens niet.

28

Ende die here seide tot moysen. Hoe langhe en wildi mine gheboden niet houden: ende wachten mine wet?

29

Besiet dat v den here heuet ghegheuen den saterdach: ende dat hi daer om inden sesten daghe heuet ghegeuen dubbelde spisen. Een yghelic bliue bi hem seluen: ende inden seuenden daghe. en gae niemant van sijnre stat:

30

ende dat volc vierde inden seuenden daghe.

31

Ende dat huys van israhel. hiete des broots naem man. Ende het was witte als coriander saet: ende sijn smake was als smake van blome met honighe.

32

Ende moyses seide tot aaron Dit is dat woert dat die heer gheboden heeft Volle daer of een gomor. ende men houdet inden gheslachten hier na comende: dat si kennen moghen dat broot. daer ic v mede voede inder wildernissen: doe ghi gheleet wort vten lande van egipten.

33

Ende moyses seide tot aaron. Neem een vat: ende doet daer in man. also veel als in een gomor gaen mach. ende legt op voerden here om te behouden voer uwen gheslachten

34

also die here moysi beual. Ende aaron leide dat in die tabernakel om te behouden.

35

Die kinder van israhel aten man veertich iaer: tot dat sij quamen int lant daer si in wonen souden. Met deser spijsen worden si gheuoedet tot dat sij gheraecten ant lant van chanaan.

36

Gomor is dat thiende deel van ephy